Hazırda Qarabağ və Şərqi Zəngəzurda beynəlxalq standartlara cavab verən yolların salınması prioritet məsələ kimi daim diqqətdə saxlanılır. Reallaşdırılan belə layihələrdən biri də uzunluğu 41 kilometr olan Avşar–Salmanbəyli–Aşağı Avşar–Xocavənd avtomobil yoludur.
Magistralın çəkilişi ilə tanışlıq zamanı Xocavənd kənd icra nümayəndəsi Elçin Balakişiyev bildirdi ki, 14 min nəfər əhalinin yaşadığı 4 yaşayış məntəqəsinin sakinləri uzun illər yolsuzluqdan əziyyət çəkirdilər. Belə ki, bu yol əsasən çınqıl örtüklü və torpaq əsaslı olduğundan yağışın, suvarma və qrunt sularının təsirindən yararsız vəziyyətə düşmüş, yolda çala-çuxurlar əmələ gəlmiş, avtonəqliyyat vasitələrinin hərəkətində problemlər yaranmışdı. Bu səbəbdən də 5-10 dəqiqəyə gediləsi yola 20-30 dəqiqə vaxt sərf olunurdu. Təbii ki, belə bir problem üzündən maşınlar da tez-tez sıradan çıxır, yanacaq sərfi narahatlıq doğururdu. Ağır xəstələrin xəstəxanaya vaxtında çatdırılması isə müşkülə çevrilmişdi. Lakin II Qarabağ müharibəsindən sonra Avşar–Salmanbəyli–Aşağı Avşar–Xocavənd avtomobil yolunun istifadəyə verilməsi ilə bu çətinlik aradan qaldırıldı.
E.Balakişiyevin sözlərinə görə, yol problemi fermerlərin fəaliyətinə də mənfi təsir göstərirdi: “Bizim yaşayış məntəqələri əsasən kənd təsərrüfatı məhsullarının istehsalı üzrə ixtisaslaşıb. Ancaq yol çətinliyi üzündən fermerlər, kənd sakinləri yığılan məhsulu vaxtında sata bilmirdilər, nəticədə məhsulun bir hissəsi xarab olurdu”.
Yolun bərpası sahibkarlıq fəaliyyətinə geniş imkanlar açıb. Hazırda yolboyu ticarət və iaşə obyektləri fəaliyyət göstərir. Fermerlər yetişdirdikləri kənd təsərrüfatı məhsullarını rayon mərkəzinə və qonşu Ucar, Zərdab və Ağcabədi bazarlarına rahatlıqla apara bilirlər. Bu isə həmin yaşayış sahələrinin sosial-iqtisadi inkişafına böyük töhfə verir və ölkənin kənd təsərrüfatı potensialını gücləndirir.
Pünhan ƏFƏNDİYEV,
“Xalq qəzeti”nin bölgə müxbiri