Naxçıvan
15 İyun Milli Qurtuluş Günündə Naxçıvan şəhərində Heydər Məscid kompleksi istifadəyə verilib. Açılış tədbirində Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Fuad Nəcəfli, digər rəsmi şəxslər və dindarlar iştirak ediblər.
Naxçıvan Muxtar Respublikası Dini Qurumlarla İş üzrə Dövlət Agentliyinin direktoru Vüqar Babayev çıxış edərək bildirib ki, ölkəmizdə ulu öndər Heydər Əliyevin dini həmrəylik ideyaları və dövlət–din siyasəti uğurla davam etdirilir. Müstəqillik illərində muxtar respublikada 74 məscid tikilib, 95-i isə yenidən qurulub və bərpa olunub. Hazırda muxtar respublika ərazisində 214 məscid fəaliyyət göstərir.
Yeni məscid kompleksinin isə ümumi ərazisi 82 min 250 kvadratmetrdir. Məscidin minarələrinin hündürlüyü 38, gümbəzlərinin hündürlüyü isə 14 metrdən artıqdır. Binanın daxilində müqəddəs “Quran-i Kərim”dən ayələr həkk olunub. Burada eyni vaxtda 5 min nəfər ibadət edə biləcək.
Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Fuad Nəcəfli bildirib ki, bu gün ən böyük məscid binasının istifadəyə verilməsi yerli dindarlara qiymətli bayram töhfəsidir. “Heydər Əliyev İli” çərçivəsində, Milli Qurtuluş Günündə bu məscidin istifadəyə verilməsi böyük rəmzi məna daşıyır. Ulu öndər həmişə islami dəyərlərə hörmət və ehtiramla yanaşıb, belə ibadətgahların yaradılmasını arzu edib.
Fuad Nəcəfli yeni kompleksi ölkə Prezidenti İlham Əliyevin xalqımızın dini-mənəvi dəyərlərinə verdiyi qiymətin daha bir ifadəsi kimi dəyərləndirib, dindarları yeni məscidin istifadəyə verilməsi münasibətilə təbrik edib. Səlahiyyətli nümayəndə məscidə müqəddəs kitabımız “Quran-i Kərim” hədiyyə edib.
Sonra məsciddə ilk namazlar qılınıb, ehsan süfrələri açılıb, ulu öndər Heydər Əliyevin və şəhidlərimizin ruhuna dualar oxunub.
Sumqayıt
Gənclik şəhərində Milli Qurtuluş Gününə həsr olunmuş ümumşəhər bayram şənliyi keçirilib. Tədbirdə şəhər rəhbərliyi, Milli Məclisin komitə sədrləri Tahir Mirkişili, Hicran Hüseynova, idarə, müəssisə, təşkilat rəhbərləri və şəhər ictimaiyyəti iştirak ediblər.
Əvvəlcə iştirakçılar ümummilli lider Heydər Əliyevin adını daşıyan parkda unudulmaz dahi şəxsiyyətin abidəsini ziyarət edib, önünə tər çiçəklər düzüblər. “Kimyaçı” Mədəniyyət Sarayının tamaşa zalında davam edən toplantıda şəhər icra hakimiyyətinin başçısı Zakir Fərəcov bildirib ki, 1993-cü ildə ölkədə xaos və milli dövlətçiliyin yox olmaq təhlükəsi yarananda xalq öz xilaskarına üz tutdu. Ümummilli liderimiz taleyinə yazılmış xilaskarlıq missiyasını həmin ağır günlərdə öz üzərinə götürdü. Beləliklə də, xalqın təkidli tələbi ilə ulu öndərin hakimiyyətə qayıdışı xalqın qurtuluşu oldu.
Qeyd edilib ki, Heydər Əliyevin siyasi zəkası nəticəsində xalqımız XX əsrin çox çətin sınaqlarından müstəqil Azərbaycan dövlətini qurmaqla çıxdı. Azərbaycanı öz varlığı qədər sevən Heydər Əliyev onun gözəl bir guşəsi olan Sumqayıta da daim diqqət göstərirdi. Sumqayıtı bütün Azərbaycanın gözəl təcəssümü adlandırır və onun tərəqqisi üçün mümkün olan hər şeyi edirdi. Ulu öndər Sumqayıta hər səfəri ilə bu şəhərə sanki xeyir-bərəkət gətirir, gələcəyə möhkəm inam yaradırdı.
Natiq deyib ki, ümummilli liderin ən layiqli davamçısı Prezident İlham Əliyevin həyata keçirdiyi çox uğurlu daxili, xarici və iqtisadi siyasət nəticəsində Azərbaycanın əldə etdiyi nailiyyətlər qloballaşan dünyada dövlətimizi önə çıxarmışdır. 44 günlük Vətən müharibəsində Azərbaycan əsgəri, sözün əsl mənasında, xalqımızın böyük zəfər tarixini yazdı. Biz torpaqlarımızı azad etməklə dünyada qalib xalq, qalib dövlət kimi tanındıq.
Sonra Milli Qurtuluş Gününə həsr olunan sənədli film nümayiş etdirilib.
Abşeron
Ulu öndərin hakimiyyətdə olduğu dövrlərdə sürətli tərəqqi edən bölgələrdən biri də Abşeron olub. Xüsusən də dövlət müstəqilliyi illərində Heydər Əliyevin diqqət və qayğısı sayəsində rayon inkişaf edib, abadlaşıb. Bunun nəticəsi olaraq, 2006-cı ildə Xırdalan qəsəbəsinə şəhər statusu verilib.
Bayram tədbirlərində bütün bunlar barədə ətraflı danışılıb. Ulu öndərin adını daşıyan parkda təşkil olunan konsertdə müstəqil Azərbaycanın memarı Heydər Əliyevin 1993-cü ilin iyun aynda Bakıya gəlməsi və bundan sonra ölkədə həyata keçirilən irimiqyaslı işlər bir daha xatırlanıb. Bildirilib ki, tariximizə qızıl hərflərlə yazılmış 15 İyun Milli Qurtuluş Günü Azərbaycan xalqı üçün böyük ictimai-siyasi və tarixi əhəmiyyətə malikdir. Ulu öndər Heydər Əliyevin yenidən hakimiyyətə gəlməsi ilə ölkəmizdə vətəndaş müharibəsinin, dövlətçiliyin məhv olmasının və ölkənin parçalanmasının qarşısı alınıb. Azərbaycan dönməz tərəqqi yoluna qədəm qoyub.
Respublikamızın tanınmış incəsənət xadimlərinin müxtəlif repertuarlarla çıxış etdiyi və sakinlərin böyük coşqu ilə qarşıladığı konsert proqramı atəşfəşanlıqla sona çatıb.
Goranboy
Yaddaqalan, məzmunlu bir konfrans oldu. Adı da maraqlı idi. “Heydər Əliyev – əsrin adamı”.
Heydər Əliyevin Azərbaycana ikinci dəfə qayıdışına həsr olunan qısa bir filmin nümayişindən sonra rayon icra hakimiyyətinin başçısı Məhərrəm Quliyev məruzə ilə çıxış etdi. Rayon rəhbəri qeyd etdi ki, bugünkü konfrans “2023-cü il – Heydər Əliyev ili” ilə bağlı silsilə ümumrayon tədbirlərinin bir növ davamıdır. 15 İyun Milli Qurtuluş Gününə həsr olunan tədbir 30 il əvvəl ölkədə baş verən vətəndaş qarşıdurmasının, hakimiyyətdə olan səriştəsiz Xalq cəbhəsi–Müsavat cütlüyünün yaratdığı özbaşınalığın, qardaş qırğınının qarşısının alınmasında ulu öndər Heydər Əliyevin misilsiz xidmətlərinə həsr olunur.
Ümummilli liderin arzularını, ərazi bütövlüyümüzün bərpasını, torpaqlarımızın yağı düşməndən xilas edilməsini cənab Prezidentimiz, Ali Baş Komandan İlham Əliyev həyata keçirdi.
AMEA-nın Gəncə bölməsinin sədri, akademik Fuad Əliyev çıxış edərək Heydər Əliyevin alimlərə, ziyalılara, yaradıcı adamlara, tarixi şəxsiyyətlərə göstərdiyi diqqət və qayğıdan danışdı. Qeyd etdi ki, Akademiyanın Gəncə filialının açılması da bilavasitə Heydər Əliyevin təşəbbüsüdür.
Konfransda Əməkdar jurnalist Hamlet Qasımov, mədəniyyət işçisi Gündüz Hacıyev və başqaları çıxış edərək 15 İyun Qurtuluş Gününün xalqımızın böyük bayramı olduğunu bildirdilər.
Zaqatala
Azərbaycanın dövlətçiliyinin möhkəmlənməsi və demokratik prinsiplərin bərqərar olması, hüquqi dövlət quruculuğu prosesinin uğurla həyata keçirilməsi məhz ümummilli lider Heydər Əliyevin adı ilə bağlıdır. Ulu öndər ikinci dəfə Azərbaycanın idarəçilik sükanı arxasına keçdikdən sonra xalqımızı qardaş qırğınından, vətəndaş qarşıdurmasından, müstəqilliyimizi itirmək təhlükəsindən xilas edib, müasir tariximizə dövlətçiliyimizin xilaskarı, banisi və qurucusu kimi daxil olub.
15 İyun Milli Qurtuluş Günü münasibətilə Zaqatala Rayon İcra Hakimiyyətinin və hüquq-mühafizə orqanlarının rəhbər şəxsləri, ictimaiyyətin nümayəndələri ulu öndərin Heydər Əliyev Mərkəzinin qarşısında ucaldılmış abidəsini ziyarət edib, önünə gül dəstələri düzüb, dahi rəhbərin xatirəsinə ehtiramlarını bildiriblər.
Tədbirdə vurğulanıb ki, həyatda elə əlamətdar günlər, hadisələr var ki, ölkənin, milyonlarla insanın taleyində, müqəddəratında həlledici rol oynayaraq bütöv bir xalqın yaddaşına əbədi həkk olunur, tarixinə qızıl hərflərlə yazılır. Azərbaycan üçün 1993-cü ilin 15 iyunu məhz belə tarixi hadisələrdəndir. Həmin əlamətdar tarixi gün ümummilli lider Heydər Əliyevin respublika rəhbərliyinə qayıdışı, dövlətçiliyimizin xilas anının başlanğıcı, Milli Qurtuluş Günüdür.
Çıxışlarda 1993-cü ilin iyununda respublikamızda baş verən ictimai-siyasi proseslərə geniş nəzər salınıb, dövlətçiliyimizin qorunması və vətəndaş qarşıdurmasının aradan qaldırılmasında ümummilli lider Heydər Əliyevin tarixi xidmətləri bir daha xatırlanıb. Vurğulanıb ki, müstəqil respublikamızın son illər əldə etdiyi uğurlar birbaşa Heydər Əliyevin adı ilə bağlıdır. Məhz ulu öndərin respublika rəhbərliyinə qayıdışından sonra ölkəmiz sürətli inkişaf yoluna qədəm qoyub, onun layiqli davamçısı İlham Əliyevin məqsədyönlü siyasəti nəticəsində ölkəmizin iqtisadi qüdrəti daha da artıb, müstəqil Azərbaycan dünya birliyində öz layiqli yerini tutub.
Yevlax
Şəhər İcra Hakimiyyətinin təşkilatçılığı ilə “Heydər Əliyev İli” çərçivəsində Milli Qurtuluş Gününə həsr olunmuş bayram konserti keçirilib.
Heydər Əliyev Parkında baş tutan konsertin aparıcıları Milli Qurtuluş Gününün tarixi və əhəmiyyəti barədə ətraflı məlumat veriblər. Bildirilib ki, ulu öndərin missiyası yalnız Azərbaycan dövlətinin dayaqlarının möhkəmləndirilməsi, müstəqilliyin inkişafı və dövlətçilik tariximizin müasir mərhələsinin davamlılığının təmin edilməsi kimi şərəfli bir vəzifəni yerinə yetirməklə məhdudlaşmadı. Dahi rəhbər müstəqil Azərbaycan dövlətinin yaradılması konsepsiyasını həyata keçirdi, eyni zamanda Azərbaycan vətəndaşlarını birləşdirən, xalqımızı beynəlxalq aləmdə vahid məqsəd və məram uğrunda səfərbər edən milli təlim –“Azərbaycançılıq” ideologiyasını da yaratdı.
Heydər Əliyev siyasi kursunun layiqli davamçısı, Azərbaycan Respublikasının Prezidenti, Ali Baş Komandan İlham Əliyevin rəhbərliyi ilə müzəffər Azərbaycan Ordusu tərəfindən 44 günlük müharibə nəticəsində torpaqlarımızın erməni işğalçılarından təmizlənməsi tədbirdə iftixarla vurğulanıb. Həmin parlaq Qələbə və ümumilikdə Azərbaycanın saysız-hesabsız uğurlar qazanması bir daha onu göstərdi ki, müstəqil Azərbaycanın Qurtuluşuna imza atmış tarixi şəxsiyyətin ideyaları yaşayır və əbədi olaraq yaşayacaq!
Milli Qurtuluş Gününə həsr edilmiş bayram tədbiri konsert proqramı ilə davam edib.
Ağsu
Böyük el bayramı – Milli Qurtuluş Günü münasibətilə Ağsuda silsilə tədbirlər təşkil olunub.
Ümumrayon tədbiri öncəsi Dövlət Himni səsləndirilib və ulu öndər Heydər Əliyevin, dövlətçiliyimiz, ərazi bütövlüyümüz uğrunda şəhid olanların xatirəsi bir dəqiqəlik sükutla yad edilib. Sonra Heydər Əliyevin həyat və fəaliyyətini əks etdirən videofilm nümayiş etdirilib.
Toplantıda çıxış edən rayon icra hakimiyyətinin başçısı Rövşən Bağırov tarixi gün münasibətilə ürək sözlərini bölüşüb. “Milli dövlətçiliyimizin xilaskarı” adlı tədbirin “Heydər Əliyev İli” çərçivəsində keçirilən silsilə tədbirlərin davamı olduğunu bildirib. İcra başçısı ulu öndərin keçdiyi yolları və tarixi vərəqlədikcə onun atdığı addımların hər bir azərbaycanlını qürurlandırdığını qeyd edib.
Bildirilib ki, ümummilli lider hakimiyyətə gəlişi ilə ən geridə qalmış və təhlükələrlə üz-üzə olan Azərbaycanda siyasi sabitlik yaradılmasına nail oldu, ölkəni qısa bir vaxtda inkişaf etdirdi. 1993-cü ildə əvvəlcə Ali Sovetin sədri, sonra isə xalqın mütləq əksəriyyətinin səsini qazanaraq Azərbaycan Respublikasının Prezidenti seçilən ümummilli lider şöhrət və şərəf tariximizə silinməz səhifələr yazdı .
Toplantıda çıxış edənlər diqqətə çatdırıblar ki, xalqımız azərbaycanlı olması ilə ömrü boyu fəxr etmiş, milli qürur və iftixar mənbəyimiz olan Heydər Əliyevin ideallarına daim sadiqdir. Müzəffər Ali Baş Komandan, ata vəsiyyətini ləyaqətlə yerinə yetirən Prezident İlham Əliyevin uzaqgörən siyasəti, düşünülmüş islahatları və müdrik qərarları ilə müstəqil Azərbaycanın dinamik inkişaf yoluna çıxdığı, artıq bütün dünyada qalib dövlət sayılması xüsusi vurğulanıb.
Daha sonra tədbir rayonun mədəniyyət və incəsənət ustalarının hazırladığı konsert proqramı ilə davam etdirilib.
Neftçala
Kürsahili şəhərdə düzənlənən tədbirin iştirakçıları ümummilli lider Heydər Əliyevin abidəsini ziyarət edib, önünə gül dəstələri düzüblər. Ulu öndərin və şəhidlərin ruhu bir dəqiqəlik sükutla yad olunub, Azərbaycan Respublikasının Dövlət Himni səsləndirilib.
Bayram tədbirində çıxış edən Neftçala Rayon İcra Hakimiyyətinin başçısı Mirhəsən Seyidov tariximizə Milli Qurtuluş Günü kimi daxil olan 1993-cü ilin 15 iyun gününün hər bir vətənpərvər azərbaycanlı üçün çox əziz olduğunu bildirib. Qeyd edib ki, 30 il öncə yenicə müstəqilliyini qazanan respublikamızı dağılıb məhv olmaqdan, vətəndaş qarşıdurmasından xilas edən ulu öndər Heydər Əliyevin uzaqgörən siyasəti sayəsində Azərbaycan öz müstəqilliyini və dövlətçiliyini qoruyub saxlayıb və daha da möhkəmləndirib.
Natiq ümummilli lider Heydər Əliyev siyasi kursunun Prezident İlham Əliyev tərəfindən uğurla davam etdirilməsini, Azərbaycanın daha da möhkəmlənməsi və qüdrətlənməsi istiqamətində görülən işləri konkret faktlarla diqqətə çatdırıb.
Digər çıxış edənlər də ulu öndərin hakimiyyətə qayıdışından sonra respublikamızın əldə etdiyi uğurlardan, Milli Qurtuluş Gününün müstəqilliyimizin tarixinə şanlı səhifə kimi yazılmasından söz açıb, unudulmaz dahi şəxsiyyətlə bağlı xatirələrini bölüşüblər.
Bayramla bağlı Biləsuvar Regional Mədəniyyət İdarəsinin hazırladığı musiqi proqramı coşqu ilə qarşılanıb.
Xocavənd
Milli Qurtuluş Günü münasibətilə Xocavənd qəsəbəsindəki Bayraq meydanında rəngarəng konsert proqramı təqdim olunub. Xocavənd Rayon İcra Hakimiyyəti və Kürdəmir Regional Mədəniyyət İdarəsinin birgə təşkilatçılığı ilə keçirilən tədbirdə idarə və müəssisələrin, hüquq-mühafizə orqanlarının rəhbərləri, məktəblilər, ictimaiyyət nümayəndələri iştirak ediblər.
Tədbirdə Milli Qurtuluş Gününün tarixi əhəmiyyətindən, ulu öndər Heydər Əliyevin xilaskarlıq missiyasından ətraflı bəhs edilib. Bildirilib ki, 1993-cü ildə yenicə müstəqilliyini qazanmış respublikamız dağılmaq, parçalanmaq təhlükəsi ilə üz-üzə qaldığı bir vaxtda ulu öndər Heydər Əliyevin qətiyyəti, bacarığı, təcrübəsi sayəsində Azərbaycan dövləti ona qarşı yönəlmiş qəsdlərdən uğurla çıxıb. Ümummilli liderin qətiyyəti xalqda böyük ruh yüksəkliyi yaradıb, inamımızı özümüzə qaytarıb, sabitlik və əmin-amanlıq yaradıb və bununla da 15 İyun şərəf və şöhrət tariximizə Milli Qurtuluş Günü kimi daxil olub.
Şənlikdə bəstəkar və xalq mahnıları, rəqs nümunələri təqdim olunub. Bayram konserti alqışlarla qarşılanıb, iştirakçılarda xoş əhval-ruhiyyə yaradıb.
Tahir RÜSTƏMLİ,
Əli ƏLİYEV,
İlqar HƏSƏNOV,
Hamlet ZEYNALOĞLU,
“Xalq qəzeti”