Dünən Naxçıvan şəhərindəki Gənclər Mərkəzində Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Fuad Nəcəfli muxtar respublikanın ictimai fəal gəncləri ilə görüşüb.

Səlahiyyətli nümayəndə Fuad Nəcəfli 2022-ci ilin dekabr ayından Azərbaycan Respublikası Prezidentinin müvafiq qərar­larından sonra Naxçıvan Muxtar Respub­likasında fəaliyyətə başlayan səlahiyyətli nümayəndəlik institutu barədə məlumat verərək bildirib ki, bu dövlət qurumu ölkə­nin və muxtar respublikanın həyatında yenilikdir. Bu idarəetmə qurumu mərkəzi hakimiyyəti xalqa daha da yaxınlaşdır­maq, icra proseslərini ahəngdarlaşdır­maq, problemlərin həllini sürətləndirmək məqsədilə yaradılıb. Əhali qrupları ilə hər görüş nümayəndəlik üçün bir ünsiyyət platformasıdır. 

Fuad Nəcəfli Azərbaycan Respublika­sında müstəqillik illərində aparılan dərin və əhatəli sosial-iqtisadi islahatlardan söz açaraq bildirib ki, ümummilli lider Heydər Əliyevin həyat fəlsəfəsi, Onun zəngin ide­ya irsi Azərbaycan xalqının mənəvi sər­vəti, məfkurə proqramıdır.

Bu gün dahi şəxsiyyətin möhkəm təməllər üzərində formalaşan siyasi xətti yaşayır və ölkəmizi davamlı uğurlara qo­vuşdurur. Uzun müddət münaqişə şə­raitində olan qonşu dövlət isə bu gün öz müstəqil siyasətini formalaşdıra, iqtisadi fəaliyyətini qura bilmir. Lakin ulu öndərin siyasi xəttinin nəticəsi olaraq müstəqil Azərbaycan qüdrətli dövlətə çevrilib. 

Səlahiyyətli nümayəndə Ali Baş Ko­mandan İlham Əliyevin rəhbərliyi ilə 44 gün davam edən Vətən müharibəsin­dən və qazanılmış tarixi qələbədən bəhs edərkən bildirib ki, bu Qələbədən sonra Azərbaycan və ondan ayrı düşmüş Nax­çıvan Muxtar Respublikası üçün böyük perspektivlər açılıb. Bu gün əsas məsələ kommunikasiyaların, nəqliyyat dəhlizləri­nin açılması, xalqın daha da firavan yaşa­masıdır. Bu gün Heydər Əliyev Fondunun apardığı siyasət də ölkəmizə uğurlar qa­zandırır. Hər bir prinsipial və fəal mövqeyi olan gənc bütün bu məsələlərdə kənarda qalmamalı,müstəqilliyimizin daha da möh­kəmləndirilməsinə və ictimai idealın uca tutulmasına töhfəsini verməlidir. 

Səlahiyyətli nümayəndə muxtar res­publikada ötən müddət ərzində nümayən­dəlik institutunun gördüyü işlərdən və qarşıda duran hədəflərdən də geniş danı­şıb. Fuad Nəcəfli Prezident İlham Əliye­vin müvafiq sərəncamı ilə təsdiq olunan “Naxçıvan Muxtar Respublikasının so­sial-iqtisadi inkişafına dair 2023-2027-ci illər üçün Dövlət Proqramı”nın əhəmiyyə­tini vurğulayıb, Dövlət Proqramının qəbul olunmasını muxtar respublikanın hərtərəf­li inkişafı ilə bağlı mükəmməl dövlət sənə­di adlandırıb və onun icrasında gənclərin fəal iştirakının zəruriliyini vurğulayıb. 

Sonra gənclər asudə vaxtın səmərə­li təşkili, hərbi-vətənpərvərlik tərbiyəsi, yay düşərgələri, mütəxəssislərin xarici ölkələrdə təhsil və təlim alması, ölkə və beynəlxalq yarışlarda iştirak, rəqəmsal­laşma, qrant müsabiqələrində iştitrak, kar­yera yüksəlişi kimi mövzularda mülahizə və təkliflərini söyləyiblər.

Sonda səlahiyyətli nümayəndə gənc­lərin suallarını cavablandırıb.

“Xalq qəzeti”