Dünya Bankının maliyyə dəstəyi ilə icra olunan “Məşğulluğa Dəstək Layihəsi”nə bu il daha 1591 işsiz şəxs cəlb edilib. Beləliklə, layihəyə cəlb olunanların sayı 8114-ə çatıb. Bu barədə Əmək və Əhalinin Sosial Müdafiəsi Nazirliyindən aldığımız məlumatda bildirilib.

Qeyd olunub ki, ümumilikdə, 22 min şəxsin kiçik biznesə çıxışına dəstək verilməsi məqsədi daşıyan layihənin iştirakçıları üçün əvvəlcə təlimlər təş­kil olunur. Təlimlərin sonunda keçirilən qiymətləndirmədə biznes planlarını müdafiə edən şəxslər istehsal və xid­mət sahələri üzrə təsərrüfatlarını ya­ratmaları üçün avadanlıqla təmin olu­nurlar.

Layihənin məqsədi işsiz kimi qey­diyyata alınmış həssas qruplara aid şəxslərin (əlilliyi olan şəxslər, şəhid ailəsi üzvləri, ünvanlı dövlət sosial yar­dımı alanlar və s.) özünüməşğulluq üzrə kiçik bizneslərinin yaradılmasıdır. 

Məlumatda, həmçinin deyilir ki, “Məşğulluğa Dəstək Layihəsi" çərçi­vəsində bölgələrdə ictimai din­ləmələrin təşkil edilməsi prose­si davam edir. Növbəti ictimai dinləmə Oğuz rayonunda keçi­riləcək. Oğuz şəhərindəki Emin Abdullayev adına 2 saylı tam orta məktəbdə təşkil olunacaq tədbirdə iştirakçılara layihənin hədəf və məqsədləri, əhatə da­irəsi, icrası zamanı ətraf mühit və sosial məsələlərə dair tələb­lər barədə məlumat veriləcək.

Qeyd edək ki, Dövlət Məş­ğulluq Agentliyi tərəfindən bu ilin yanvar-aprel aylarında 106 min 330 şəxs aktiv məşğulluq tədbir­ləri ilə əhatə olunub. Onlardan 18 min 334 nəfəri “Əmək və Məşğulluq” altsis­temindəki vakansiya bankına yerləşdi­rilən boş yerlər üzrə işlə təmin edilib.

Həmin dövrdə 1624 nəfər özü­nüməşğulluq proqramına cəlb olunub. Təlim kurslarında iştirak etdikdən son­ra onların kiçik bizneslərini yaratmaları üçün aktivlərlə təminatı həyata keçirilir.

Yanvar-aprel aylarında 3 min 295 işsiz şəxs üçün işəgötürənlərlə əmək­daşlıq çərçivəsində peşə hazırlığı kursları təşkil edilib, 83 min 77 şəxsə isə peşəyönümü xidmətləri göstərilib.

Zərifə HÜSEYNOVA, “Xalq qəzeti”