Şamaxı rayonunda Ümumdünya Səhiyyə Təşkilatının (ÜST) ölkə ofisi tərəfindən ilkin səhiyyə xidmətləri ilə bağlı görülmüş işlərlə tanışlıq və bu sahədə təşkilatın ölkənin səhiyyə qurumları ilə gələcək əməkdaşlığına dair müzakirələrin aparılması məqsədilə Şamaxı rayonuna səfər təşkil edilib. Səfərdə İcbari Tibbi Sığorta üzrə Dövlət Agentliyi İdarə Heyətinin sədri Zaur Əliyev, Tibbi Ərazi Bölmələrini İdarəetmə Birliyinin (TƏBİB) icraçı direktoru Vüqar Qurbanov və ÜST-nin Azərbaycandakı nümayəndəsi Hande Harmancı iştirak ediblər.
Səfər zamanı ÜST-nin Şamaxı Təlim Mərkəzi, Şamaxı Ailə Sağlamlıq Mərkəzi (ASM) və Quşçu kəndində yerləşən ASM-də görüşlər keçirilib. Həmçinin ÜST-nin layihəsi çərçivəsində rayona gətirilmiş mobil klinikaların fəaliyyəti ilə tanışlıq olub. Görüşlərdə ÜST-nin ekspertləri və yerli səhiyyə işçiləri rayondakı ilkin səhiyyə xidməti sahəsindəki təcrübələrini paylaşıb və bu sahənin gələcək inkişafına dair fikir mübadiləsi aparıblar.
Səfərin yekununda Şamaxı Rayon İcra Hakimiyyətinin başçısı Tahir Məmmədovun iştirakı ilə ölkənin səhiyyə qurumları və ÜST arasında Şamaxı və digər bölgələrdə ilkin səhiyyə xidmətlərinin gücləndirilməsi sahəsində gələcək əməkdaşlıq perspektivləri müzakirə edilib.
Qeyd edək ki, ÜST Şamaxı rayonunda “İlkin Səhiyyə Xidmətləri üzrə Nümayiş” layihəsi, həmçinin Azərbaycan Tibb Universitetinin 6-cı kurs tələbələrinin iştirakı ilə Şamaxı Təqaüd Proqramı və digər tədbirlər həyata keçirib. Bu layihənin, eləcə də tədbirlərin məqsədi Şamaxıda əlçatan, keyfiyyətli və hərtərəfli ilkin səhiyyə xidməti modeli işləyib hazırlamaq, tibb işçilərinin bilik-bacarıqlarını artırmaq, həmçinin ilkin səhiyyə xidmətləri üzrə kadr potensialını gücləndirməkdir.
ÜST-nin ölkə ofisi son illər Azərbaycanda səhiyyə sisteminin gücləndirilməsi və universal tibbi təminata nail olunması məqsədi ilə həyata keçirilən islahatları dəstəkləmək üçün yerli səhiyyə tərəfdaşları ilə sıx əməkdaşlıq edir. Bu baxımdan ilkin səhiyyə xidmətlərinin gücləndirilməsinə dəstək ÜST-nin Azərbaycandakı ən önəmli prioritetlərindən biridir.
Z.BƏŞİRQIZI, “Xalq qəzeti”