Azərbaycan xalqının gələcəyi, müstəqil Azərbaycanın gələcəyi gənclərin bu gün aldıqları bilik, təhsil və tərbiyədən asılıdır.
Heydər ƏLİYEV,
Ümummilli lider
Heydər Əliyev gənc nəslin tərbiyəsinə, təhsilinə, özlərinin milli mənsubiyyətini yüksək tutmasına, ölkəmiz üçün layiqli varislər olmasına həmişə böyük diqqət yetirmişdir. Ulu öndər gənclərə lazımi kömək göstərmiş, onlara müdrik tövsiyələrini, məsləhətlərini vermişdir. İstər müxtəlif illərdə tələbə olmuş gənclərlə görüşlərində, istər yeni dərs ilinin başlanması münasibətilə məktəblərdə keçirdiyi tədbirlərdə, istər ali məktəblərdə olduğu vaxtlarda və istərsə də gənclər forumunda etdiyi məruzə və çıxışlarında gənclərin fəaliyyətlərini yüksək qiymətləndirmişdir. O, Azərbaycan gəncliyinə həmişə nikbin nəzərlərlə baxmış, bugünkü gənclərin gələcəkdə ölkəmizi idarəedənlər olacağına inamını ifadə etmişdir.
Ümummilli lider 2 fevral 1996-cı ildə Azərbaycan gənclərinin Birinci forumunda etdiyi məruzədə gənclərə xitabən demişdir: “Hər bir Azərbaycan gənci cəmiyyətdə, Vətəndə, ölkədə öz vəzifələrini layiqincə yerinə yetirməyə çalışmalıdır. ...Azərbaycanın müstəqil gələcəyini təmin etmək üçün Vətəni sevməlidir, ölkəni sevməlidir, torpağı sevməlidir, xalqımızı sevməlidir, millətimizi sevməlidir, dilimizi sevməlidir, dinimizi sevməlidir, milli ənənələrimizi sevməlidir.”
Heydər Əliyevin gənclərimizə verdiyi dəyərlər, onların qarşısına qoyduğu vəzifələr və etdiyi tövsiyələr həm dövlət müstəqilliyimizdən əvvəlki illərdə (1969-1990), həm də müstəqillik əldə edildikdən sonrakı illərdə (1991-2003) özünün mahiyyətinə görə milliliklə bəşəriliyi özündə birləşdirən bir xətt üzrə inkişaf edir. Bunlar ulu öndərin gənclərimizi təhsilli, mənəviyyatlı, ləyaqətli, vətənpərvər, yüksək amallar uğrunda mübariz və s. dəyərlərə yiyələnmiş əsl vətəndaşlar kimi görmək arzusundan qaynaqlanır.
Ulu öndər gənclərin milli-mənəvi tərbiyə və milli ləyaqət hissinin çoxfunksiyalı və çoxistiqamətli konsepsiyasını vermişdir. Bu konsepsiyada milli-mənəvi tərbiyə, milli ləyaqət hissi heç də bir ifadə, bir məzmun və bir istiqamətlə məhdudlaşmır. Bu, bütöv və bütövləşmiş şəxsiyyətin mahiyyətini özündə əks etdirən və bir-biri ilə bağlı olan mənəviyyat kompleksini özündə birləşdirir. Milli mənəviyyat, milli ləyaqət məhz onların birliyi zəminində formalaşır və inkişaf edir. Sanki bir sapa düzülən incilər kimi bu kompleksə daxil olan kommponentləri aşağıdakı kimi xarakterizə etmək olar.
Mükəmməl təhsil
Heydər Əliyev gənclərin təhsil almasına, eyni zamanda, yaxşı təhsil almasına həmişə yüksək qiymət verməklə yanaşı, həm də buna böyük qayğı və diqqətlə yanaşmışdır. Təhsili millətin gələcəyi hesab etməklə Vətənin gələcəyinin gənclərimizin yaxşı təhsil almasından bilavasitə asılı olduğunu qeyd edən böyük öndər hələ müstəqilliyimizdən çox-cox əvvəllər (27 avqust 1977-ci iı, Tələbələrin respublika fəalları ilə görüşü) deyirdi: “Tələbələrin vəzifəsi yeniliklə ayaqlaşmaqdan, arası kəsilməyən artan informasiya axınından bacarıqla baş çıxarmaqdan, elmə dərindən, səylə, yaradıcılıqla yiyələnməkdən ibarətdir”.
Tələbəlik illərində alınan biliyi professional fəaliyyətin bünövrəsi hesab edən ulu öndər gələcəkdə cəmiyyətin inkişafı üçün daha səriştəli, daha bilikli və daha məlumatlı kadrlara tələbatın olacağını qeyd edərək göstərirdi ki, kamil mütəxəssislər kimi yetişmək, təhsili başa vurduqdan sonra fəal surətdə əməli fəaliyyətə qoşulmaq, cəmiyyətə, xalqa böyük fayda vermək üçün hələ tələbəlik illərindən buna hazırlaşmaq, bu illərin imkanlarından maksimum səviyyədə istifadə etmək lazımdır. Tələbəlik illərində bilik ehtiyatı toplanmalı, dərin və möhkəm bilik uğrunda mübarizə aparılmalıdır. Təhsildə, elmdə qələbə çalmaq üçün yorulmadan hər gün nə isə yeni bir şey öyrənməyə can atmaq lazımdır.
Heydər Əliyev müstəqilliyimizin ilk illərində respublikamızın bugünü və gələcəyi üçün yüksək təhsili və mədəniyyətə malik, dövrün tələblərinə cavab verə bilən mütəxəssislər hazırlanmasını xalqımızın qarşısında duran günün vacib vəzifələrdən biri hesab edirdi. Türkiyəyə təhsil almağa gedən tələbələr qarşısında çıxışında (5 oktyabr 1992-ci il, Naxçıvan və 7 fevral 1994-cü il, Bakı) bu tələbələrin Azərbaycanın gələcəyi üçün göndərildiyini, bununla bərabər, onlara xalqımıza xas olan mədəniyyət və mənəviyyat nümunəsi göstərmələrini də tövsiyə edirdi. Qeyd edirdi ki, Azərbaycanın dövlətini, dövlət siyasətini, iqtisadiyyatını və mədəniyyətini yalnız həqiqi ali təhsil, həqiqi bilik almış şəxslər inkişaf etdirə bilərlər.
Fəal həyat mövqeyi
Gənclərimizin fəal həyat mövqeyinə malik olması, demək olar ki, Heydər Əliyevin gənclərə bütün tövsiyələrinin nəticəsi, məsləhət və göstərişlərinin yekun müddəası kimi özünü göstərir. Yaxşı təhsil almaq və ölkənin həyatında fəal iştirak edə bilmək, üzərinə düşən məsuliyyəti axıra qədər dərk etmək, iradə zənginliyinə, mənəvi düşüncəyə sahib olmaq, qətiyyətli hərəkət etmək, ümumbəşəri mənəvi sərvətlərlə özünün daxili aləmini zənginləşdirmək və s. Bütün bunlar ulu öndərin gənclərin fəal həyat mövqeyinə malik ola bilmələri üçün onların yiyələnməli olduqları keyfiyyətləri özündə təcəssüm etdirən fəaliyyətin məzmununu təşkil edir. Hələ 1979-cu ildə Bakıda keçirilən Ümumittifaq elmi-praktik konfransda etdiyi məşhur məruzəsində Heydər Əliyev bu problemə böyük önəm verərək, bunun üçün insanların mənəvi-əxlaqi, əmək-estetik, vətənpərvərlik-beynəlmiləlçilik, ideya-siyasi və s. tərbiyəsinə malik olmağı yüksək qiymətləndirmişdir. 28 avqust 1982-ci ildə tələbə gənclərlə ənənəvi görüşündə o, gənclərə həyatın çətinliklərinə qarşı mübarizə aparmaq və cəmiyyətin faydalı üzvü olmaq üçün pak olmağı, əsl həyat qanunlarını öyrənməyi, əməkdə fədakar olmağı, yaradıcılıq axtarışları aparmağı, öz üzərlərində çox işləməyi məsləhət görürdü.
Mənəvi saflıq
“İnsan cəmiyyətində ən yüksək yerdə mənəviyyat durur” – deyən ulu öndər mənəvi tərbiyəni şəxsiyyətin formalaşmasında əsas amil hesab etmiş, ona yiyələnməyin vacibliyini qeyd etmişdir. Mənəvi tərbiyəni təməl mədəniyyəti kimi şəxsiyyətin kimliyini, necəliyini müəyyənləşdirən başlıca meyar kimi dəyərləndirmişdir. “Mənəvi tərbiyəni daim artırmaq lazımdır və gənclərimizi yüksək mənəviyyat ruhunda tərbiyələndirmək lazımdır” – tövsiyəsini verən böyük öndər “mənəviyyat olmayan yerdə heç bir şey ola bilməz” – demişdir.
“Nə qədər böyük alim olursansa-ol, nə qədər böyük mütəxəssis olursansa-ol, nə qədər böyük dövlət xadimi olursansa-ol, əgər, mənəviyyatca şikəstsənsə, sənin heç bir qiymətin yoxdur” – Azərbaycan Tibb Universitetinin 70 illik yubileyində etdiyi çıxışda Heydər Əliyev dediyi bu sözlərlə mənəviyyatın insanlar üçün ən yüksək, ali dəyər olduğunu, insanı və insanlığı yüksəltdiyini qeyd edir. Bunlarla yanaşı, böyük şəxsiyyət mənəviyyatı qorumağın da vacibliyini diqqətə çatdırır.
Heydər Əliyev gənclərin mənəvi tərbiyə probleminə olduqca həssas mövqedən yanaşır və demək olar ki, onun bütün tərəflərinə toxunur. Mənəvi borc kimi anlayışın gənclərimizin şüurunda formalaşmasına mühüm qiymət verməklə yanaşı, gənclərdə yaşlılara hörmət etməyi, cəmiyyətdə nümunəvi davranışa malik olmağı, həssaslıq nümayiş etdirməyi, laqeydliyə və mənəvi yoxsulluğa qarşı mübariz olmağı zəruri hesab edirdi.
Bütün həyatı və fəaliyyəti dövründə müəllimə, onun şəxsiyyətinə böyük qiymət verən, “Şəxsən mən müəllimdən yüksək ad tanımıram” – deyən ümummilli lider, bununla yanaşı, təhsilalanların mənəvi-əxlaqi simasının formalaşdırılmasında müəllim şəxsiyyətinin çox qüdrətli amil olduğunu da qeyd etmişdir.
Böyük öndər bu keyfiyyətlərin ali məktəb müəllimlərində olmasını da zəruri sayır və göstərirdi ki, əgər tələbə öz müəllimlərinin, professorunun dərin bilikli, çalışqan, mənəvi cəhətdən saf, yüksək vətəndaşlıq məsuliyyəti olan bir insan olduğunu görürsə bu, onun tərbiyəsinə də güclü təsir göstərəcəkdir, tələbə bu keyfiyyətlərin təsiri altında tərbiyələnəcəkdir. Ali məktəb müəllimləri tələbə –gənclər üçün müsbət nümunə olmalıdırlar.
Vətənpərvərlik
Heydər Əliyev alovlu vətənpərvər və Vətənə, xalqa bağlı şəxsiyyət idi. O, gənclərimizə də vətənpərvər olmağı, Vətəni sevməyi mənəvi tərbiyənin əsas atributlarından biri kimi yüksək qiymətləndirir, gənclərimizin bu hisslərə yiyələnməsini vacib hesab edirdi. Hələ 1978-ci ildə Azərbaycan müəllimlərinin VI qurultayında etdiyi nitqində “Hər bir gənc vətəndaş öz ölkəsinin alovlu vətənpərvəri olmalıdır” – deyən Heydər Əliyev gənclərlə görüşlərindəki bütün çıxışlarında bu tövsiyəni, demək olar ki, bu və ya digər formalarda təkrar etmişdir. Ulu öndər vətənpərvərliyi ali dəyər kimi qiymətləndirmiş və özü böyük vətənpərvər, böyük vətəndaş olduğu kimi, gənclərimizin də bu keyfiyyətlərə malik olmasını zəruri hesab etmişdir.
Ulu öndər vətənpərvərlik anlayışına olduqca geniş prizmadan yanaşırdı: “İnsan gərək həyatının hər dövründə, fəaliyyətinin bütün sahələrində öz Vətəninin, ölkəsinin qayğısı ilə yaşasın, həm onun iqtisadiyyatının, həm siyasətinin, həm də mədəniyyətinin qayğısı ilə yaşasın. Bunlar hamısı vətənpərvərlikdən doğan bir şeydir. Vətəni qorumaq, torpaqlarımızı müdafiə etmək üçün hər bir gəncin hazır olmasını tərbiyə etmək lazımdır” – deyirdi.
Milli vətənpərvərliklə xalqımızın tarixinin sıx bağlı olduğunu nəzərə çarpdıran ümummilli lider keçmiş tariximizi düzgün qiymətləndirməyi və bunu gənclərin vətənpərvərlik hissinin artırılmasında mühüm amil sayırdı. Bununla yanaşı, İslam dininin mənəvi dəyərlərindən düzgün istifadə etməyi və bu dəyərlərin mənimsənilməsinin vacibliyini də qeyd edirdi.
Azərbaycançılıq məfkurəsi
Ümummilli liderin milli leksikonumuza deyil, Azərbaycan məfkurəsinə gətirdiyi “Azərbaycançılıq” ideyası xalqımızı birləşdirən mənəvi bağlılıq simvolu kimi böyük fəlsəfi, tarixi, siyasi, sosial və mənəvi mahiyyət daşıyır. Bu ideya xalqımızın, o cümlədən gənclərimizin təkcə tariximizi bilmək baxımından deyil, onlar üçün, həmçinin gələcək yol xəritəsi kimi böyük tarixi əhəmiyyətə malikdir. “Azərbaycan torpağında ən qədim zamanlardan indiyə qədər müstəqil dövlətlər olmuşdur. Biz bununla fəxr edirik və fəxr edə bilərik. Azərbaycançılıq hissiyyatını gənclərdə yaşatmaq lazımdır. Azərbaycanı sevmək, azərbaycançılıq hissiyyatını özündə cəm etmək deməkdir”, – deməklə ulu öndər həm də bu məfkurənin mahiyyətində müstəqilliyimizin dayandığını və Azərbaycana sevginin vacib olduğunu qeyd edir.
Tarixi irsimiz
Heydər Əliyev gənclərimizin tariximizi, keçmişimizi və tarixi köklərimizi öyrənmələrinə və yaxşı bilmələrinə, çox böyük önəm verirdi. Mənəviyyatın əsas kökləri, rişələri məhz tarixi keçmişimizdən qaynaqlandığından və bunları dərindən bilməklə sıx bağlı olduğundan, bunu həm də gənclərimizin bu günü və gələcəyi ilə bağlayırdı. Böyük öndər deyirdi: “Tariximizi, tarixi köklərimizi yaxşı bilmədən, onlara hörmət etmədən müstəqil dövlətimizi gələcəkdə yaxşı qura bilmərik. Ona görə də gənclər gərək öz köklərini, respublikamızın, xaqımızın tarixini bilərək bu gün də, gələcəkdə də vətənpərvərlik, Vətənə xidmət, Vətənə qayğı hissi ilə yaşasınlar.”
Xalqımızın zəngin tarixi olduğunu dönə-dönə vurğulayan ulu öndər bu tarixi, xalqımıza məxsus mədəniyyəti, mənəviyyatı, milli dəyərləri gənc nəslə çatdırmağı və onları bu ruhda tərbiyə etməyi müəllimlərin, məktəbin müqəddəs borcu hesab edir və bunun çox vacib olduğunu qeyd edirdi.
Ulu öndər ta qədimdən bu günə qədər olan tariximizi, ədəbiyyatımızı gənclərin vətənpərvərlik, vətəndaşlıq, milli mənsubiyyəti ilə fəxr edə bilmək hissləri ilə sıx bağlı olduğunu göstərir, bunların bir-biri ilə qarşılıqlı əlaqədə, vəhdətdə olduğunu qeyd edirdi. O, hər bir Azərbaycan gəncinə tariximizi və Azərbaycan ədəbiyyatını yaxşı bilməyi tövsiyə edir və bildirirdi ki, tariximizi, tarixi keçmişimizi dərindən öyrənmədən vətənpərvər olmaq mümkün deyil.
Milli dəyərlərimiz
Ümummilli lider gənclərə ümumbəşəri dəyərlərə malik olmağı tövsiyə etməklə yanaşı, onlar tərəfindən milliliyin qorunmasını, milli adət-ənənələrə yiyələnməyi vacib bilir, bunların itməsini, adət-ənənələrin yaddan çıxarılmasını millət üçün böyük təhlükə hesab edirdi: “Ümumbəşəri dəyərlər, Azərbaycan xalqının milli-mənəvi dəyərləri hər bir gənc tərəfindən mənimsənilməlidir. Gənclərimiz milli ruhda tərbiyə olunmalıdırlar, bizim milli-mənəvi dəyərlərimizin əsasında tərbiyələnməlidirlər. Gənclərimiz bizim tariximizi yaxşı bilməlidir, keçmişimizi yaxşı bilməlidir, dilimizi yaxşı bilməlidir. Milli dəyərlərimizi yaxşı bilməlidir. Milli dəyərlərimizi, milli ənənələrimizi yaxşı bilməyən, tariximizi yaxşı bilməyən gənc vətənpərvərlər ola bilməz.” Azərbaycan Respublikası gənclərinin Birinci forumunda böyük öndərin dediyi bu sözlər həm də gəncliyimizin qarşısında qoyulan bir proqram yol xəritəsi idi.
Ulu öndər deyirdi ki, əsrlərin dərinliyindən bu günə qədər gəlib çatan adət-ənənələrimiz həmişə adamları saflığa, təmizliyə dəvət etmişdir. Milli və dini adət-ənənələrimiz məhz bu prinsipə əsaslanır. Bu gün biz də gəncləri paklıq, saflıq, yüksək əxlaq, yüksək mənəviyyat ruhunda tərbiyə etməliyik. Bununla biz nəinki cəmiyyətimizi qoruyacağıq, həm də gələcək nəsli sağlam saxlayacaq və həmin nəsildə cəmiyyətimiz, xalqımız üçün zərərli halların kök salmasının qarşısını alacağıq”.
Milli mənsubiyyətimiz
“Hər bir adamın milli mənsubiyyəti onun qürur mənbəyidir. Mən həmişə fəxr etmişəm, bu gün də fəxr edirəm ki, mən azərbaycanlıyam!” – Bu qiymətli fikirlər Heydər Əliyev tərəfindən gənclərimizə belə bir fəxarət hissini özlərində tərbiyə etmələri və bunu fəaliyyətləri ilə sübut edə bilmələri üçün sanki bir çağırış və nümunədir. Bu ifadəni bu gün fəxrlə hər yerdə deyə bildiyimiz üçün onu bizə yaşadanlara “Əbədi eşq olsun!”– deyirik.
Heydər Əliyev xarici ölkələrdə müstəqil dövlətimizin rəmzləri olan Azərbaycan Bayrağını görəndə, bu bayraq altında Azərbaycan Himni çalınarkən sevindiyini, yüksək əhval-ruhiyyədə olduğunu, bundan çox böyük qürur hissi keçirdiyini, iftixar hissi duyduğunu qeyd edirdi. Xüsusi olaraq vurğulayırdı ki, biz öz himnimizi, bayrağımızı özümüz qədər sevməliyik. Çünki bu, bizim Vətənimizə, millətimizə, dövlətimizə olan sədaqət, sevgi və məhəbbətin rəmzidir.
Vətəndaş şərəfi
Heydər Əliyev Vətənin çiçəklənməsi, onun inkişafı və dünya dövlətləri içərisində layiqli yer tutması üçün hər bir azərbaycanlının yüksək vətəndaşlıq keyfiyyətlərinə malik olmasını zəruri hesab edirdi. “İndi bizim təhsilimizin məqsədi gənc nəslə, uşaqlara təhsil verib onları gələcəyə hazırlamaqdır. Amma bununla yanaşı, ən böyük məqsədi Azərbaycan vətəndaşı hazırlamaqdır. Hər bir insan gərək, eyni zamanda, vətəndaş olsun. Mütləq vətəndaş olsun! Sadəcə ona görə yox ki, Azərbaycan vətəndaşıdır. Gərək dövlətinə sadiq, millətinə sadiq, ənənələrinə sadiq, xalqına sadiq vətəndaş olsun”.
Ulu öndər xarici ölkələrdə təhsil almağa gedən tələbələri Azərbaycanın səlahiyyətli nümayəndələri adlandırır və onlara Azərbaycan həqiqətlərini xarici ölkə vətəndaşlarına dönə-donə çatdırmağı, bu istiqamətdə yorulmadan fəaliyyət göstərməyi tapşırırdı. Bunlar təkcə tövsiyələr deyil, həmçinin Azərbaycan gənclərinin gedəcəkləri ölkələrdə özlərini bir sivil Azərbaycan vətəndaşı kimi ləyaqətlə təmsil etmələrinə dair onların qarşısına qoyulan vəzifələr idi.
Ana dilimizə sevgi
Dil xalqın varlığı, onu birləşdirən dəyər və kimliyini təsdiq edən əsas vasitələrdəndir. “Ananın südü bədənin mayası olduğu kimi, ana dili də ruhun qidasıdır” (F.Köçərli); “Dilini sevməyənin ürəyində millətpərvərlik duyğusu aramaq istiotdan bal dadı gözləməyə oxşar. Öz dili, öz ədəbiyyatı olmayan millət öz varlığından utanmalıdır” (Ö.F.Nemanzadə); “Dil xalqın namusu, tarixi, vicdanıdır. Dil xalqın böyük bir sərvəti və dövlətidir” (S.Vurğun). Görkəmli Azərbaycan ziyalılarının doğma dilimiz haqqında dedikləri bu dəyərli sözlər və ölməz kəlamlar ulu öndərimiz Heydər Əliyev tərəfindən həm tövsiyə xarakteri, həm də özünün məna tutumu ilə daha da zənginləşir. Ümummilli lider Azərbaycan dilini xalqımızın və millətimizin ən böyük, ən əziz sərvəti, milli sərvəti adlandırırdı.
Eyni zamanda, gənclərə başqa dilləri öyrənərkən öz ana dilini heç vaxt unutmamağı, bu dili başqa heç bir dilə dəyişməməyi özünün müdrikliyi və uzaqgörənliyi ilə bir daha tövsiyə edir: “Gənclərimiz nə qədər çox dil bilsələr, bir o qədər zəngin dünyagörüşə malik olacaqlar. Bu, müasir dünyanın tələbidir. Amma ən yaxşısı ondan ibarətdir ki, hər bir Azərbaycan vətəndaşı, hər bir azərbaycanlı öz ana dilini - Azərbaycan dilini, dövlət dilini mükəmməl bilməlidir”.
Heydər Əliyev öz çıxışlarında ana dili haqqında danışarkən onu haqlı olaraq tariximizlə bağlayır və onunla sıx əlaqələndirir. Göstərir ki, ana dilini sevməyən adam öz tarixini, ədəbiyyatını yaxşı bilməyəcəkdir. Mədəniyyətimizi, milli-mədəni ənənələrimizi bilməyəcəkdir, vətənpərvər olmayacaq və onda milli vətənpərvərlik duyğuları, hissiyyatı olmayacaqdır. Dilini unudan adam, şübhəsiz ki, milli keyfiyyətlərini də yavaş-yavaş unudacaqdır. Böyük öndər bunu yolverilməz hesab edirdi.
Dövlət müstəqilliyimiz dönməzdir, əbədidir
Heydər Əliyev Azərbaycanın müstəqilliyini müqəddəs bir əmanət kimi qoruyub saxlamağı xalqımızın, o cümlədən müasir gəncliyimizin şərəfli borcu və vəzifəsi olduğunu bəyan edirdi. Azərbaycan gənclərinin Birinci forumunda etdiyi dərin məzmunlu çıxışında demişdi: “Hər bir azərbaycanlı gəncin şərəfli borcu Azərbaycan Respublikasının dövlət müstəqilliyini qoruyub saxlamaqdan, inkişaf etdirməkdən ibarətdir. Bu, bizim çoxəsirlik tariximizdə böyük, şərəfli və tarixi nailiyyətdir”.
Heydər Əliyev müstəqilliyimizin böyük tarixi, hüquqi, siyasi, iqtisadi, mənəvi əhəmiyyətə malik olduğunu diqqətə çatdırmaqla onun hər bir Azərbaycan vətəndaşının mənəviyyatı olması, iradəsi və fikrinə çevrilməsini zəruri hesab edirdi. Bu gün fəxrlə deyə bilərik ki, ümummilli lider Heydər Əliyevin bu müqəddəs tapşırığı xalqımızın böyük oğlu, Azərbaycan Respublikasının Prezidenti cənab İlham Əliyevin müdrik daxili və xarici siyasəti sayəsində Azərbaycan xalqı və gənclərimiz tərəfindən ləyaqətlə yerinə yetirilir.
Ulu öndər müstəqilliyimizin qorunub saxlanılması üçün Vətənimizin ərazi bütövlüyünün təmin edilməsini və onu qorumağı əsas vəzifələrdən biri hesab edirdi. Heydər Əliyevin bu tapşırığı görkəmli sərkərdə, cənab İlham Əliyevin başçılığı ilə on minlərlə vətənpərvər oğullarımız, üç mindən artıq şəhidimiz, minlərlə qazilərimiz tərəfindən şərəflə yerinə yetirildi. Onlar öz cəsarətləri, Vətən sevgisi, qanları və canları ilə 44 günlük Vətən müharibəsində torpaqlarımızı erməni barbarlarının işğalından azad edərək müstəqilliyimizin yeni bir mərhələsinin zəfər təməlini qoydular. Bu gün Azərbaycan müstəqil dövlət kimi artıq dünya dövlətləri içərisində öz layiqli yerini tutaraq böyük bir inkişaf yolu ilə inamla irəliləyir.
44 günlük Vətən müharibəsində ölümün gözünə dik baxan, düşmənlərin üzərində misli görünməmiş tarixi qələbə çalan, bu gün respublikamızda və dünyanın bir sıra qabaqcıl ali təhsil ocaqlarında təhsil alan, Azərbaycanın sərhədlərini şərəflə qoruyan, Azərbaycan Bayrağını xarici ölkələrdə yüksəkliklərə qaldıran, müxtəlif mötəbər məclislərdə xalqımızı, dövlətimizi təmsil edən Azərbaycan gəncliyinin ulu öndərin bu tövsiyələrinə layiqli əks-səda verdiyini inamla söyləmək olar.
Müseyib İLYASOV,
Azərbaycan Dövlət Pedaqoji Universitetinin kafedra müdiri, professor