Göygöl rayon sakinləri arasında keçirilən məmnunluq sorğusu böyük maraqla qarşılanmışdır.
Rayon icra hakimiyyətinin təşəbbüsü ilə təşkil olunan bu tədbirin məqsədi sakinlər arasında icra qurumu və onun strukturlarının fəaliyyətini qiymətləndirmək, elektron xidmətlərdən istifadə, həmçinin turizm potensialının inkişafı və sair sahələr üzrə fikir və təkliflərin öyrənilməsi olmuşdur.
Göygöl şəhəri, Balçılı, Toğanalı, Yeni Zod, Sarısu, Topalhəsənli, Şəhriyar, Dozular kənd və Göygöl Milli Park ərazisində “ASAN Könüllülər” təşkilatı, YAP Gənclər təşkilatı, Göygöl Gənclər Evi və Aqrar inkişaf könüllülərinin dəstəyi ilə keçirilən sorğuda 300-dən çox vətəndaş iştirak etmişdir.
Sorğunun nəticələrinə əsasən, sakinlər böyük fəallıq göstərərək yeni turizm subyektlərinin formalaşdırılması, aqrar sahədə olan su probleminin aradan qaldırılması, internetin sürətinin artırılması, qazlaşdırılmamış ərazilərə qaz xəttinin çəkilməsi, yeni yaşayış massivlərində yolların asfaltlanması və sair məsələlərlə bağlı təkliflər irəli sürmüşlər.
Hamlet QASIMOV,
“Xalq qəzeti”nin müxbiri
