Elə ki, yaz gəldi, Gəncənin yol kənarları da gül-çiçəyə bürünür, şəhər ərazisinə mövsümi güllərin əkini başlanır…
Şəhərin Mənzil-Kommunal Təsərrüfatı İstehsalat Birliyinin yaşıllaşdırma şöbəsi tərəfindən Müseyib Bağırov küçəsindəki körpüdə, hər iki tərəf və mərkəzi ərazilərinə əkilmiş mövsümi güllərə baxırıq. Biri digərindən gözəldir, cəlbedicidir… Şöbənin rəhbəri Elmar Əzizov da həmişəki kimi ərazidədir, iş prosesinə özü nəzarət edir.
– Baxın, bu, petunyadır, bu isə delfiniumdur, o kənarlardakı hanna sortudur, hamısını özümüz yetişdirmişik,–deyir.
Qeyd edək ki, bura gəlməzdən əvvəl şöbə işçiləri tərəfindən Heydər Əliyev meydanındakı və Cavadxan küçəsindəki güldanlara primula, kalseolyariya, sxizantus və marqarita güllərinin əkilməsini müşahidə etmişdik.
Bilirsiniz nə maraqlıdır? Gül-çiçəklərdən daha çox bu sahə işçilərinin hərəkətlərini izləmək. Çiçəklərin başına elə dolanırlar ki, sanki ana səhər tezdən övladını məktəbə yola salır, saçlarına sığal çəkir, ehmalca toxunur…
… Həmin gün qeyd etdiyimiz ərazilərdə mövcud yaşıllıqlara, güllərə və dekorativ kol bitkilərinə aqrotexniki qulluq göstərildi, suvarılması təmin olundu.
Bəli, Gəncənin park və xiyabanlarına, küçə və prospektlərinə, yaşayış məntəqələrinə gül əkini aksiyası davam etdirilir. Bir daha xatirladaq ki, gül və dekorativ kollar MKTİB-nin yaşıllaşdırma şöbəsinin istixanalarında yerli mütəxəssislər tərəfindən yetişdirilir.
Hamlet QASIMOV,
“Xalq qəzeti”nin bölgə müxbiri