Tədqiqatçıların miqrendən əziyyət çəkən 200 nəfər üzərində apardıqları araşdırma göstərib ki, onların 90 faizi xəstəliyin ən azı bir səbəbini bilir. Mə­lum olmuşdur ki, ən çox rast gəlinən faktlar sırasında xəstəliyə emosional stress, parlaq işıqlar, yaxud, işığın ya­nıb-sönməsi və kəskin qoxular səbəb olur.

Miqreni sinir hüceyrələrinin (neyron­ların) artan həyəcanı yaradır. Bu, bey­nin irsi xüsusiyyətidir. Miqrendən əziyyət çəkən insanların neyronları müxtəlif xa­rici və daxili təsirlərə çox həssasdır. On­lara hormon səviyyələrində dəyişikliklər, stress və paradoksal olaraq stressin həlli, yuxu pozğunluğu (həm az, həm də həd­dindən artıq yuxu), spirt, işıq parıltıları təsir edə bilər.

Asanlıqla həyəcanlanan sinir hücey­rələrində elektrik aktivliyi dəyişir və miq­ren hücumunun simptomlarına səbəb olan biokimyəvi pozğunluqlar nəticəsində baş verən tutmalar işə salınır. Miqrenin “təxribatçıları” haqqında onu bilmək la­zımdır ki, bəzən tutmanı yaradan kofein elə hücumu da dəf edər.

“Klassik” miqren tətikləyiciləri olan qırmızı şərab, tünd şokolad, stress bü­tün miqren xəstələrində hücuma səbəb olmur. Kofeinin səbəb ola biləcəyini dü­şündükdə bir çox miqren xəstələri çay və qəhvəni tamamilə tərk edir və təsadüfən kofeinli içki içdikdən sonra dəhşət içində həb axtarırlar. 

Elm sübut edib ki, kofein bəzi insan­larda miqren tutmasına səbəb ola bilər. Belə ki, miqren hücumu zamanı mə­də-bağırsaq traktının işi zəifləyir. Qəbul edilən həblər mədədə qalır və bağırsağa ötürülmür. Bəzən isə kofein mədə-bağır­saq hərəkətliliyini artırır və ağrıkəsicilərin sovrulmasına kömək edir.

Miqrenli insanlar adətən hansı qida­ların hücumlarını tətiklədiyini görür və onlardan qaçmağa çalışırlar.

Miqren tutmasına səbəb olan qidala­ra qırmızı şərab, pivə, tünd şokolad, sərt pendirlər, sitrus meyvələri, qoz-fındıq, tər­kibində konservantlar olan qidalar və “fast food” daxildir. Aclıq da miqrenlərə səbəb ola bilər. Buna görə də müntəzəm və ba­lanslaşdırılmış şəkildə yemək vacibdir.

Zərifə HÜSEYNOVA, “Xalq qəzeti”