Əgər hər hansı bir oğul anasından valideynlik illərinin necə keçdiyini soruşsanız, o, yəqin ki, sizə oğlan uşağı böyütməyin həm şərəfli olduğunu, eyni zamanda da, bunun mənfi tərəflərinin də olduğunu söyləyəcək.
Araşdırmada yaşı 50-dən yuxarı olan 13 mindən çox valideyn arasında sorğu keçirilib. Ən azı bir oğlu olan valideynlərin qız ata-ana-ları ilə müqayisədə daha yaşlı olması diqqət çəkib. Birdən çox oğlu olanlar dərketmə qabiliyyətini tək qızı olanlara nisbətən daha tez itiriblər.
Tədqiqat ABŞ və Çexiyadan olan alimlər tərəfindən aparılıb. Onlar hesab edirlər ki, kişi valideynlərin daha tez qocalmasının səbəbi oğlanların qızlara nisbətən daha az fəal olmalarıdır ki, bu da valideynlərin psixi sağlamlığının pisləşməsinə səbəb olur.
Nyu-Yorkdakı Kolumbiya Universitetinin tədqiqatçısı Katrin Volfova deyib: “Ən azı bir oğlu olan valideynlər, uşağı olmayanlarla müqayisədə daha sürətli əqli geriləməyə məruz qalıblar. Nəticələr göstərir ki, təsirlər bioloji deyil, sosial xarakter daşıyır, çünki biz ata və analarda oxşar tendensiyaları müşahidə etdik”
Bundan əlavə, tədqiqatçılar əmindir ki, qızlar oğlanlara nisbətən daha çox emosional və sosial dəstəyə hazır olduqları üçün daha mərhəmətli olmağa meyllidirlər.
Beləliklə, qız övladının olmasının faydaları daha çoxdur. Bu, valideynin sağlamlığının qorunmasına, hər hansı depressiya hallarından uzaq olmasına və xəstəlik riskinin azalmasına kömək edir.
Son sözümüz budur ki, bütün övladlar gözəldir, amma tədqiqatdan bəlli olduğu kimi, qızlar valideynin ömrünü uzadır. Bunu təkcə iki qız uşağının anası olduğum üçün yazmıram, ona görə yazıram ki, qızları olan ata-analar “Allah niyə mənə oğul vermədi?”, – deyib narahat olmasınlar.
Səadət RZAYEVA, “Xalq qəzeti”