BP Azərbaycandakı tərəfdaşları adından yerli biznesin inkişafını dəstəkləmək yönündə əməkdaşlığı davam etdirmək üçün Kiçik və Orta Biznesin İnkişafı Agentliyi (KOBİA) ilə yeni anlaşma memorandumu imzalayıb.

Mərasimində çıxış edən BP-nin Xəzər regionunda kommunikasiya və xarici əlaqələr üzrə vitse-prezidenti Bəxtiyar Aslanbəyli qeyd edib ki, yeni anlaşma memorandumu yerli bizneslə­rin inkişafını dəstəkləmək yönündə səy­ləri davam etdirməyə imkan yaradacaq. BP-nin Azərbaycanda sahibkarlığın in­kişafı proqramının yerli müəssisələrə beynəlxalq standartlara çatmaq və tə­darük müqavilələri uğrunda rəqabət aparmaq üçün gözəl imkan yaratdığını diqqətə çatdıran vitse-prezident deyib ki, KOBİA ilə əməkdaşlığın davam et­dirilməsi ölkədə sahibkarlığın inkişafına mühüm töhfələr verəcək. 

KOBİA mikro və kiçik sahibkarlığın inkişafı və onların dəstəklənməsi is­tiqamətində regionlarda müxtəlif qurum və təşkilatlarla birgə layihələr həyata keçirdiyini vurğulayan Kiçik və Orta Biz­nesin İnkişafı Agentliyi İdarə Heyətinin sədri O. Məmmədov isə bildirib ki, BP ilə əməkdaşlıq çərçivəsində reallaşa­caq layihələr regionlarda yerli icmaların gəlirlilik səviyyəsinin artmasına müsbət təsir göstərəcək, yeni bizneslərin ya­ranmasına və özünüməşğulluğa töhfə verəcək.

Tədbirdə KOBİA və BP-nin dəstəyi ilə birgə həyata keçiriləcək iki yeni la­yihə barədə də məlumat verilib. Qeyd olunub ki, layihələrdən biri kənd yer­lərində gənc sahibkarların inkişafına dəstək məqsədi daşıyır. Samux, Goran­boy və Şəmkir rayonlarında həyata ke­çiriləcək layihə çərçivəsində aztəminatlı ailələrdən olan və sahibkarlığa maraq göstərən gənclər seçilərək onlara gələ­cək biznes fəaliyyətlərinə hazırlıq üçün təlim keçiriləcək. 

Digər layihə isə Tovuz rayonunda aqroturizmin inkişafına dəstək məqsə­di daşıyır. Layihə bu rayondan seçilmiş aztəminatlı ailələr üçün gəlir və məşğul­luq imkanları yaratmağı nəzərdə tutur. Regional İnkişaf İctimai Birliyi tərəfin­dən icra olunacaq layihənin ümumi dəyəri 100 min manat təşkil edir.

“Xalq qəzeti”