Səhiyyə Nazirliyinin mütəxəssis-eksperti, pediatr Erkin Rəhimov Hindistanın Qandinaqar şəhərində keçirilən 30-cu Beynəlxalq Pediatriya Assosiasiyasının (IPA) konqresində iştirak edib.
Səhiyyəmizin uğuru hesab edilməlidir ki, konqresdə Azərbaycan Pediatriya Cəmiyyəti Beynəlxalq Pediatriya Assosiasiyasının (İPA) üzvlüyünə qəbul olunub. E.Rəhimov, eyni zamanda, İPA-nın ən ali idarəetmə orqanı olan Daimi Komitəyə (Standing Committee) Orta Asiya regionunun təmsilçisi olaraq üzv seçilib.
Qeyd edək ki, 1910-cu ildə yaradılmış Beynəlxalq Pediatriya Assosiasiyasının tərkibinə 149 ölkədən olan 164 pediatrik peşə cəmiyyəti daxildir.
Uzman həkim Erkin Rəhimov 2001–2003-cü illərdə Azərbaycan Tibb Universitetində oxuyub. Təhsilinə 2003–2007-ci illərdə Türkiyənin İstanbul Universitetinin Cərrahpaşa tibb fakültəsində ümumi tibb ixtisası üzrə davam edib. 2008–2012-ci illərdə isə uşaq sağlamlığı və xəstəlikləri ixtisası üzrə uzmanlıq təhsili alıb. Hazırda “Medikal Plaza” Klinikasında pediatriya-neonatologiya və yenidoğulmuşların reanimasiyası şöbələrinin müdiridir.
Zərifə BƏŞİRQIZI, “Xalq qəzeti”
