Terrorun tarixi, əslində, bəşəriyyətin tarixi qədər qədimdir. Bəşər sivilizasiyasının bir neçə minilliyi ərzində müxtəlif dövlətlər, dini qruplar, siyasi təşkilatlar və cinayətkar birliklər terror üsullarından istifadə ediblər.
Dövlət terroru haqqında ilk məlumatlardan birinə də Roma tarixində rast gəlinir. Belə ki, diktator Lusiy Korneliy Sulla siyasi rəqiblərini cəzalandırmaq və xəzinəni doldurmaq üçün Roma imperiyası ərazisində qanundankənar elan edilmiş şəxslərin siyahılarını tuturdu. Siyahıda göstərilən şəxsi öldürən kəs öldürülən insanın əmlakının yarısını alırdı. Bu siyahı sistemi aşağı təbəqəyə aid əhali, cinayətkar ünsürlər və fırıldaqçılar arasında məşhur idi. Yüz illər keçməsinə baxmayaraq, terrorizmin mahiyyəti və metodları dəyişməz qalır. Əksinə, Ermənistan kimi ölkələr XX əsrin ən böyük bəlasına çevrilən terroru dövlət səviyyəsində davam etdirir.
Terror aktları dünyanın hər yerində, demək olar ki, hər gün baş verir. Bəzi regionlar üçün terror iqtisadiyyatın, dövlətçiliyin və bütövlükdə cəmiyyətin inkişafı yolunda ciddi maneə kimi qiymətləndirilir. Təsadüfi deyil ki, terror artıq bəşəriyyətin “XX əsrin vəbası”, hətta “1 nömrəli düşməni” adlandırılır. Hazırda terrorizm və ona qarşı mübarizə mövzusunda çox sayda araşdırmalar aparılır, lakin bu problemlə bağlı bir çox məsələlərdə konsensus yoxdur. İstər müxtəlif ölkələrin qanunvericilik aktlarında, istərsə də elmi ədəbiyyatda bu terminin yüzdən artıq tərifinə rast gəlmək olar. Məsələn, ABŞ Dövlət Departamenti terrorizmi “qeyri-hərbi hədəflərə qarşı qəsdən siyasi motivli zorakılıq, qruplar və ya gizli agentlər tərəfindən həyata keçirilən və adətən, auditoriyaya təsir etmək məqsədi daşıyan zorakılıq” kimi tərif edir.
“Terror” sözü latınca “qorxu”, “dəhşət” deməkdir. Onun mahiyyəti müəyyən məqsədlərə çatmaq üçün insanları qorxutmaqdır. Terrorizm terrordan sistemli istifadəyə əsaslanan siyasətdir. “Terror” termini siyasi leksikona Fransa inqilabı zamanı daxil olub. Ancaq elmi ictimaiyyətdə bu fenomenin başvermə vaxtı ilə bağlı konsensus yoxdur. Bəzi tədqiqatçılar terrorizmin lap qədim zamanlardan yarandığına inanır, digərləri terrorizmin orta əsrlərin məhsulu olduğunu iddia edirlər. Bununla belə, mütəxəssislərin bir çoxu terrorizm fenomeninin hələ antik dövrdən əvvəl yarandığını bildirir.
Dövrümüzə qədər gəlib çatmış mənbələr göstərir ki, Qədim Yunanıstanda və Qədim Romada terror üsullarından kifayət qədər tez-tez istifadə edilib. Bu, bir qayda olaraq, siyasi sui-qəsd halları olub. Buna misal olaraq Yuli Sezarın öldürülməsini göstərmək olar. Eyni zamanda başa düşmək lazımdır ki, terror, şübhəsiz ki, zorakılığın ən qədim formalarından biri olsa da, heç bir halda, siyasi xadimlər də daxil olmaqla, zorakılığın hər bir təzahürü terror sayıla bilməz. Məsələn, bəzi tarixçilər Makedoniya kralı II Filippin öldürülməsini terror aktı adlandırırlar. Ancaq belə bir fikir də var ki, II Filippin öldürülməsinə belə bir qiymət vermək düzgün deyil. Çünki onun qətli şəxsi münaqişə zəminində baş verib. Ona görə də, bəzi tarixçilər vurğulayırlar ki, bu qətl hadisəsinə siyasi terrorun təzahürü kimi yox, şəxsi qisas təzahürü kimi baxmaq lazımdır.
XVI-XVII əsrlərin tarixi dövlətlərin, kralların, baş nazirlərin xidmətində olan məşhur dəniz quldurları haqqında hekayələrlə doludur. Dəniz quldurlarının köməyilə xəzinə doldurulurdu. Bu, ona gətirib çıxardı ki, bir ölkə müharibə elan etmədən digər ölkənin gəmilərinə qarşı terror aktları həyata keçirdikdə dəniz quldurluğu qanuni fəaliyyətə, dövlət terrorunun variantına çevrildi. Ən aktiv terror aktları XVIII əsrdə həyata keçirilməyə başlandı. İlk kütləvi terror hücumu Fransa inqilabı illərinə təsadüf edir. 1792-ci ildə hakimiyyətə gələn yakobinlər “Qoy, Günəş terrora tabe olsun!” şüarını irəli sürmüşdülər. Terrorun tüğyan etdiyi Fransada 1960-cı illərin sonlarında terrorizmin sərhədləri o qədər genişləndi ki, artıq beynəlxalq terrorizmdən danışmağa başladılar. Xüsusi ilə də, Asiya və Afrikanın bir sıra ölkələrində Qərb müstəmləkəçiliyinə qarşı mübarizə, kommunist hərəkatının yayılması, iki dünya müharibəsi bəzi azadlıq hərəkatlarının və revanşist təşkilatların əsasını qoydu, onların bəzilərinin təcrübəsi terror fəaliyyətinə çevrildi. XXI əsrin əvvəllərinin ən irimiqyaslı terror aktı kimi, şübhəsiz ki, 2001-ci il sentyabrın 11-də Nyu-Yorkda törədilmiş terror hadisəsini göstərmək olar. Terrorçular qaçırdıqları sərnişin təyyarələrini Ümumdünya Ticarət Mərkəzinin 110 mərtəbəli qoşa binalarına, ABŞ Müdafiə Nazirliyinin (Pentaqon) binasına çırpmışdılar. Bu hadisələr 3 minə yaxın sadə vətəndaşın ölümü, 6 mindən çox insanın yaralanması ilə nəticələnmişdi. Terror aktı nəticəsində Nyu-York şəhərinə 36 milyard dollar həcmində ziyan dəymişdi.
Amma Ermənistanda terror dövlət siyasəti səviyyəsindədir. SSRİ-nin dağılmasından sonra müstəqillik əldə edən Ermənistan terroru dövlət səviyyəsində dəstəkləməklə işğalçı siyasətin əsas vasitələrindən birinə çevirib. Çoxsaylı faktlar, məhkəmə materialları sübut edir ki, Türkiyənin və Azərbaycanın mülki əhalisinə qarşı, o cümlədən Ermənistan dövləti tərəfindən maliyyələşdirilən terror aktları, nəqliyyat vasitələrində törədilmiş terror aktları bu ölkənin xüsusi xidmət orqanları tərəfindən həyata keçirilib. Ermənistanın ölkəmizə qarşı mina terroru bu gün də davam edir.
Terrorçu Ermənistandan fərqli olaraq Azərbaycan terrorçuluğa qarşı beynəlxalq mübarizə sahəsində qlobal səylərə hər zaman töhfə verib. Azərbaycan terrorçuluğa qarşı mübarizə sahəsində öz daxili qanunvericiliyini mövcud beynəlxalq öhdəliklərə uyğunlaşdırmaq məqsədilə müntəzəm olaraq nəzərdən keçirir və zəruri əlavə və dəyişikliklər edir. Ölkəmiz terrorçuluğa qarşı mübarizə üzrə bütün mövcud konvensiyalara qoşulub. Əsrimizin “vəbasına” çevrilmiş terrorla mübarizə hər zaman diqqət mərkəzində saxlanılır və adekvat cavab verilir.
S.ELAY, “Xalq qəzeti”