(əvvəli https://xalqqazeti.az/az/siyaset/189836-ermeni-milletciliyinin-temel-prinsipleri)
Hayların irqçilik doktrinası
Erməni millətçiliyi müxtəlif insan irqləri arasındakı bioloji fərqliliklərin toplu halında və ya fərdi olaraq ortaya çıxdığını iddia edir. Bir irqin (əksəriyyətlə öz irqinin) başqalarından üstünlüyünə və onlara hökm etməyə haqqı olduğuna duyulan inanc doktrinada öz ifadəsini tapır (xüsusən Dağlıq Qarabağ və digər Azərbaycan rayonlarının işğalından sonra ermənilər qazandıqları “qələbələri” onların üstün irqdən olduqlarına bağlamışdılar). Deməli, 3 əsr əvvəl Venesiyada əsasən kitablar və qəzet-jurnal nəşr edib ermənilərin toplu halında yaşadıqları bölgələrə göndərərək onları başqalarından fərqli olmağa inandıran mxitarizm öz işini görmüşdür.
Öz etnik mədəniyyət dəyərlərini tək meyar olaraq təyinetmə (etnik mərkəziyyətçilik), fərqlilik qorxusu (zenofobi) əsasında yaradılmış bir millətçilik sistemi idi ve ideoloji düşüncə olaraq yalnız erməni millətinə aid idi. İrqlər arasında birləşmələrə və əlaqələrin olmasına qarşı çıxmaq və millətçilik kimi anlayışları da özündə ehtiva edirdi. Onu ictimai ayrı-seçkiliyin, irqlər arasında fərqliliklərdən soyqırıma qədər gedə bilən bir doktrina halına gətirib çıxarmaq üçün ermənilərə iki-üç əsr yetərli oldu və indi bu milli ayrı-seçkilik anlayışı erməni dövlətinin doktrinasına tamamilə uyğundur. Bu sistemə görə isə erməni irqçiliyi öz qanını daşıyan, eyni dili danışan və eyni soydan gələnlərin başqa soylardan gələnlərin aşağılanması hesab edilir.
Avropalıların Amerikanı kəşf etməsindən sonra, Afrika mənşəli xalqları kölə adı altında alıb satışa çıxaran, özünə tabe edən amerikanlar başda olmaqla irqçi anlayışı o vaxt normal qarşılansa da, indi mənfi qiymətləndirilir. Özlərini başqalarından fərqli görmək isə Ermənistanda bu gün normal haldır. Erməni irqi ayrı-seçkiliyinə aid yüzlərlə misal çəkmək mümkündür. Hayların tarixçisi Aleksandr Varpetyanın “Erməni xalqının arilərdən doğuşu” məqaləsində bu xəstə təxəyüllü erməniyə görə, “Arilər 20 min il əvvəl “Erməni dağlar dünyasında” (belə bir ifadə işlədilir) yaranmağa başlamış və onlar Kiçik Asiyadan Yaponiyaya qədər ərazidə iz buraxmışdır. Atları əhliləşdirən, qoyunçuluğu da inkişaf etdirən arilər–ermənilər olmuşlar. Erməni dilində olan “Ayrutsi” kəlməsi də o zamandan qalmışdır. “Arman”, “erməni” kəlmələri də o zamandan qalmışdır. Ari sözündən “Ayrarat” (Ararat) törəmişdir və s.
Daha sonra bu adam iddia edir: “Arilərə aid edilən “Ram” önünə bir “A” əlavə edilməsilə “Aram” kəlməsi ortaya çıxmışdır. “Arat” isə guya, Ari dilində “Allahın oğlu” deməkdir. Ermənistanda “Arustam” kişi adı var, farslarda bu “ Rustam”dır. Bundan da görünür ki, farslarla ermənilər eyni kökdən gəlirlər. Xristianlığı da, buddizmi də arilər yaratmışlar”.
Bu “xəstələrdən” biri olan Varpetyan “Alamani” (Almaniya) adını da armani (erməni) adı ilə başlamağa çalışır. Almanları da farslar, hindlilər kimi ermənilərin əmioğlusu aldlandırır və erməni millətçi şairlərdən olan Paruyr Sevakdan bir misal da çəkir: “Dünyada sizin əvvəlinizin məhsulu olan digər ermənilər də vardır”. Bu ermənilər isə ari ermənilərdən törəmiş yunanlardır, almanlardır, basklardır, farslardır, kürdlərdir, hindlilər, ruslardır. Sonra Varpetyan ustalıqla “ari irq”in, yəni ermənilərin yayılma coğrafiyasını “cızır”. Onların bir hissəsi Kiçik Asiyaya yayılmış, bir hissəsi isə necə olmuşsa Avropaya getmişdir. Yerlərdə, qonşulardan heç kəsə, heç bir millətə qarışmadan
(ali-ari irqidirlər axı!) kiçik qruplar halında yaşamışlar. Əsas məskənləri Mərkəzi Asiya olmuşdur, Hindistana gələrək burada bəzi millətlərin yaranıb formalaşmasında üstün rol oynamışlar.
Varpetyanın sözündən belə çıxır ki, hind və farslar ermənilərlə qohumdur. Arilər Xəzər dənizindən üzüyuxarı Rusiyaya getmələri nəticəsində ruslar içərisində də “toxum səpmişlər”. Nəticəyə baxın: Böyük Ermənistanla Rusiyanın yaxın münasibətləri qandan gəlir. Sən demə, erməni ari irqi rusların da millət kimi yaranmasında və yetişməsində mühüm rol oynamışdır. Hindistanda yayğın olan “Ram” və ya “Ran” adı arilərə verilən ümumi addır. Bu adı Ermənistanda “Rant” və ya “Hrant” olaraq tələffüz etmişlər. “Ram” və ya “Ran” ilk “ari” lərdir. Onun fikrincə, Arilər Şərqdə kök salandan sonra onları Avropanı xilas etməyə gətirmişlər. Almanlar, yunanlar, yəhudilər, kürdlər, basklar arilərdir. Əlbəttə bunlardan daha öncə isə erməni arilər farsları, hindləri və rusları ariləşdirmişlər. Baxın bu gün ermənilərin işinə kim yarayırsa onlar arilərdir. Amma onlar yalnız erməni arilərdən törəyənlərdir, yəni ikinci sort arilərdir...
Göründüyü kimi, burada türklərin adı belə çəkilmir, həmin tarixlərdə dünyanın ən qüdrətli imperiyalarını yaratmış türklər sanki heç olmamışlar. Ermənilərin bu sayaq tədqiqatları ciddi elmi ictimaiyyətdə gülüş doğursa da və onun heç bir elmi əsasının olmadığı kəskin şəkildə tənqid edilsə də “bu tədqiqatlar” dövlət səviyyəsində yürüdülməkdədir. Şərqdə, İslam coğrafiyasında özünün mənfur hərəkətləri ilə təklənəcəyindən qorxan Ermənistan milli ideologiyasına bunları da əlavə etməyi unutmur. Hindlilərin, farsların və rusların ari irqindən gəldiyini deməklə bu ölkələri özünün müdafiəçisinə çevirmək istəyir.
Avropada isə almanların ətəyindən yapışır. Yəhudiləri “arilərdən” saymayan Varpetyan onları digər millətlərin (yəqin ki, türklərin) casusu adlandırır. Yunanlara gəlincə deyir ki, erməni-yunan işbirliyi dünyaya nümunədir.
(ardı var)
Qafar ÇAXMAQLI,
XQ-nin Türkiyə müxbiri
