Aldanmağa meyilli adamın üzərində aparılan “eksperimentlər” sonda vərdiş halına çevrilir və o, bunsuz darıxır, yaşaya bilmir. Adətən, başlanğıcda şirnikləndirici vədlərlə müşayiət olunan belə çoxgedişli “tələlər”dən qurtulmaq sonra müşkülə çevrilir.
Avropa İttifaqının Hayastan üçün hazırladığı belə “tələlərdən” sonuncusu ermənilər üçün Avropaya vizasız gediş-gəliş rejimi olub. Aİ bu məsələyə yaxın gələcəkdə baxacağını vəd edib. Aydın məsələdir ki, Brüssel bu cür “qiymətli hədiyyələr” məsələsini boş yerə gündəmə gətirmir.
Bəs, Qərb Ermənistana vəd verdiyi sədəqəyə görə onu nədən imtina etməyə məcbur, yaxud hansı addımı atmağa təhrik edəcək? Paşinyan komandasını Aİ-nin icrası məcburi olacaq hansı “tövsiyə və göstərişləri” gözləyir?
Sirr deyil ki, SSRİ-nin süqutundan sonra Aİ bu coğrafiyada təsir imkanlarını gücləndirmək üçün çeşidli maraqlı texnologiyalardan yararlanır. Son 20-25 ilin müşahidələrinə istinadla deyə bilərik ki, bu texnologiyalar dəyişmir. Söhbət hansı texnologiyadan gedir?
Aİ təlqin üsulundan faydalanaraq əvvəlcə bu və ya digər ölkəyə yaxından və gəlirli əməkdaşlıq, şəffaf sərhədlər, qısa müddətdə ittifaqın tamhüquqlu üzvü olmaq şanslarını xatırladır. Hətta, ilk baxışda, bəzi vədlərini yerinə yetirir. Fəqət, sonra elə bir dövr başlayır ki, vəd olunan proseslərin dinamikası getdikcə zəifləyir və onların əvəzinə Brüsseldən maraqlı şərtlərdən ibarət qalın paket gəlir. Başlıca şərt isə belədir: bunlar olmadan Avropaya inteqrasiya prosesi mümkün deyil. Məhz bu məqamda “tələ” tam atmosfer gücü ilə işə düşür. Yəni, Qərblə bir çox razılaşmaları olan ölkə artıq onları reallaşdırmaq üçün müəyyən irəliləyişə nail olduğundan “ovçu”nun şərtlərini qəbul etməkdən başqa çıxış yolu qalmır. Əks-təqdirdə… Gürcüstanın timsalında bunun reallıqda necə baş verdiyini gördük. Qərbin davamlı təzyiqi buna qədər loyal davranan hətta ölkə hökumətini də təbdən çıxarır, hiddətlənməyə vadar edir. Beləliklə, indi qonşumuz “Gürcü arzusu”nun onun gözündə qaldığını etiraf etmək məcburiyyətindədir.
Növbə Ermənistanındır. Burada anti-Rusiya əhval-ruhiyyəsinin kəskin şəkildə artması göz qabağındadır. İrəvan bəh-bəhlə Qərbin vəd etdiyi və dəstəklədiyi yeni hərbi-tezniki əməkdaşlıq kampaniyasına başlayıb. Bəs, bunun ardınca nə baş verəcək? Ermənistan Azərbaycana hücum edəcək? Hər halda Paşinyan iqtidarı ağlını o dərəcədə itirməyib ki, özünüqəsdə imzasını atsın. Ya da ən skeptik politoloqların, analitiklərin irəli sürdükləri ehtimalın reallaşma məqamı gələ bilər. Yəni, Ermənistan dövlətçiliyinin tamamilə itirmək təhlükəsi ilə üzləşər. Son vaxtlar kollektiv Qərblə intensiv əməkdaşlığa can atan hay baş nazirin hadisələrin bu yöndə inkişafını nəzərdən qaçırmaması çox önəmlidir. Elə rusiyalı siyasi texnoloqlar da Ermənistanın “Avropaya yolunun” erməni xalqı üçün böyük faciənin başlanğıcına çevriləcəyi qənaətini bölüşürlər.
O zaman Cənubi Qafqazda havanın hərarəti daha yuxarı qalxa bilər. Aydındır ki, “Qərbə vizasız səyahət” rejiminin qəbulu Ermənistanın gələcəyi üçün dönüş nöqtəsidir. Bu, eyni zamanda, Ermənistanın, nəhayət, Qərbin çətiri altına keçməsinə dair Moskvaya qəti və konkret işarə sayılacaq. Bu halda Kreml təcili “əcəl təbili”ni çalacaq və İrəvana xatırladacaq ki, onun Avrasiya İqtisadi İttifaqı ilə güzəştli münasibətlərinə yenidən baxılacaq.
Yəqin Qərbin İrəvan üçün tələyə qoyduğu “havayı pendir”in anatomiyasından agah olan oxucular Aİ-nin Cənubi Qafqazla bağlı siyasətinin riyakarlıq üzərində qurulduğunu başa düşərlər.
İ.HƏSƏNQALA
XQ