Müstəqil Azərbaycanın təşəkkül tapması bir çox çağırışlarla müşayiət olundu ki, onların arasında qüdrətli milli ordunun yaradılması məsələsi birinci yerdə dayanırdı. Bu böhranlı dövrdə xalqımızın Ümummilli lideri Heydər Əliyev bu ağır və şərəfli missiyanı üzərinə götürdü. Dahi Vətən oğlunun rəhbərliyi müasir Azərbaycan ordusunun formalaşmasında təməl daşı oldu. Ulu Öndər Heydər Əliyev unikal dövlət və siyasi məharətə malik bir insan olmaqla, ölkənin imkanlarını səfərbər edə, onları döyüş qabiliyyətinə malik ordunun yaradılmasına yönəldə bildi. O anlayırdı ki, güclü silahlı qüvvələr olmasa, Azərbaycanın müstəqilliyi risk altına düşəcək. 

Bu fikirləri "XQ"-yə beynəlxalq münasibətlər üzrə analitik Masil Dəmirov dedi.

O qeyd etdi ki, Azərbaycan  Prezidenti İlham Əliyev Ulu Öndərin işini davam etdirərək, ordunu müasirləşdirməyə və gücləndirməyə başladı. Ali Baş Komandan İlham Əliyev ordunun döyüş qabiliyyətinin yüksəldilməsi istiqamətində bir çox islahatların şəxsən təşəbbüskarı olub, o cümlədən müasir texnologiyalar tətbiq edilib, qabaqcıl silah və texnika alınıb. Şəxsi heyətin peşəkarlığının artırılmasına, zabitlərin xüsusi hazırlanmasına, eləcə də genişmiqyaslı hərbi təlimlərin keçirilməsinə xüsusi diqqət yetirilib ki, bu da döyüş şəraitində müxtəlif qoşun növlərinin qarşılıqlı fəaliyyətinin işlənib hazırlanmasına imkan verib.

Azərbaycan ordusunun uğurlarına təsir edən ən mühüm amillərdən birinin də Azərbaycan xalqının vətənpərvərlik və döyüş ruhu olduğunu deyən analitikin fikrincə, azərbaycanlılar tarix boyu öz müstəqillikləri və ərazi bütövlüyü uğrunda mübarizədə mətanət və şücaət göstərmişlər: "Bu ruh əsgər və zabitlərin Vətən qarşısında borcunu cəsarətlə yerinə yetirdiyi orduda da özünü göstərir. Azərbaycan ordusu öz işinin doğruluğuna ürəkdən inanan, vətəninin gələcəyi üçün özünü qurban verməyə hazır olan insanlardan ibarətdir. Bu vətənpərvərlik və fədakarlığa hazır olmaq Azərbaycanın hərbi uğurlarının ən mühüm tərkib hissəsi oldu. İkinci Qarabağ müharibəsində qazanılan möhtəşəm Qələbə qüdrətli və döyüşə hazır ordunun yaradılmasına yönəlmiş bütün addımların zirvəsi oldu. Azərbaycan Silahlı Qüvvələrinin yüksək texniki və mənəvi-psixoloji hazırlıq nümayiş etdirməsi  parlaq qələbə qazanmağa imkan verdi. Ali Baş Komandan İlham Əliyevin rəhbərliyi ilə Azərbaycan ordusu bir sıra strateji əməliyyatları uğurla həyata keçirərək, işğal olunmuş əraziləri azad edib, Qarabağ üzərində nəzarəti bərpa etdi. 44 gün davam edən döyüşlərdə Azərbaycan ordusu məharət və koordinasiya nümayiş etdirərək düşmənə sarsıdıcı zərbələr endirib, dinc əhali arasında itkiləri minimuma endirib.

Vətəninin gələcəyi üçün canlarını fəda etmiş igid Azərbaycan övladlarını xüsusi qeyd etmək lazımdır. Şəhid olan bu qəhrəmanlar vətənə sarsılmaz inamın, onu qorumaq üçün sona qədər getmək əzminin rəmzidir. Onların şücaəti və fədakarlığı Azərbaycan xalqının qəlbində əbədi yaşayacaqdır. Şəhidlər gələcək nəsillərə örnəkdirlər, əsl vətənpərvərliyin öz ölkəsinin azadlığı, müstəqilliyi naminə hər şeyi verməyə hazır olmaqda olduğunu göstərirlər".

Ekspert dedi ki, İkinci Qarabağ müharibəsi başa çatdıqdan sonra Azərbaycan ordusu antiterror əməliyyatlarını davam etdirib. Bu, əzəli torpaqlarımızın üzərində tam nəzarətin bərpa olunmasında və Azərbaycanın müstəqilliyinin möhkəmləndirilməsində son mərhələ oldu. Azərbaycan ordusu öz ölkəsini müdafiə etməyə, təhlükəsizliyini təmin etməyə hazır olduğunu bir daha sübut etdi.

Azərbaycan ordusu Ümummilli lider Heydər Əliyevin müdrik rəhbərliyi, Ali Baş Komandan İlham Əliyevin apardığı islahatlar və müasirləşmə, o cümlədən Azərbaycan xalqının yüksək döyüş ruhu və vətənpərvərliyi sayəsində təşəkküldən zəfərə qədər uzun bir yol keçib. İkinci Qarabağ müharibəsi işğal altındakı torpaqları azad etməyə, ölkənin ərazi bütövlüyünü bərpa etməyə qadir olan Azərbaycan ordusunun gücünün və döyüş qabiliyyətinin bariz göstəricisi oldu. Şəhidlərin şücaətləri xalqın yaddaşında əbədi olaraq qalacaq, gələcək nəsillər üçün qürur və ilham mənbəyi olacaq.

Rizvan FİKRƏTOĞLU

XQ