Prezident İlham Əliyev iyunun 6-da TÜRKPA-nın baş katibi Mehmet Süreyya Erin başçılıq etdiyi nümayəndə heyətinin üzvləri ilə görüşündə Azərbaycan–Ermənistan münasibətləri, o cümlədən, Cənubi Qafqazda sülh gündəliyi ilə bağlı bir çox vacib məqamlara toxundu, mühüm mesajlar səsləndirdi. Dövlətimizin başçısının bildirdiyi fikirlərdən yalnız birinin üzərində dayanacağıq.
Prezident İlham Əliyev vurğuladı ki, 2020-ci və 2023-cü illərin hadisələrindən, yəni 44 günlük müharibədən və lokal xarakterli antiterror tədbirlərindən sonra Azərbaycana qarşı ərazi iddiaları irəli sürmək intihara yaxındır. Ona görə də Ermənistan öz ideologiyasını, cəmiyyətdəki əhvali-ruhiyyəni dəyişməlidir. Bunu əlahəzrət zamanın tələb etdiyini deyən ölkəmizin liderinin sözlərindən gəlinən qənaət onu deməyə əsas verir ki, əvvəl-axır bütün proseslər haqqında söz açdığımız məcraya doğru yönələcək. Ən əsası: “Onlar revanşizm ideyalarından tamamilə imtina etməlidirlər və biz görürük ki, belə ideyalar təkcə müxalifətdə deyil, iqtidarda da var. Bütün bu məsələlər, təbii ki, aydınlaşdırılmalı və tənzimlənməlidir”.
Bəli, cənab İlham Əliyev son dərəcə vacib məqama toxunur. İlk növbədə onu deyək ki, hazırkı Ermənistan hakimiyyətinə qədərki iqtidar müxtəlif manipulyasiyalara baş vurur, Azərbaycanla danışıqlar prosesini uzadırdı. Ancaq bilavasitə müharibəyə səbəb olacaq fikir səsləndirmirdi. Bunu edən baş nazir Nikol Paşinyan oldu. O, Xankəndinin mərkəzi meydanında çıxış edərkən pafoslu şəkildə dedi ki, “Qarabağ Ermənistandır və nöqtə”. Hökumət rəhbəri, həmçinin Şuşada –Cıdır düzündə şərab içərək sərxoş olub yerə sərildi də. Belə davranış Azərbaycan xalqının hissləri ilə oynamaq idi və 44 günlük müharibə zamanı Paşinyan etdiklərinin və dediklərinin Ermənistana necə baha başa gəldiyini yaxşı gördü.
Amma fakt faktlığında qalır ki, Ermənistanın hazırkı iqtidarı da əvvəlki hakimiyyətləri kimi erməni xislətinə və xəstəliyinə uyğun davranış nümayiş etdirmişdi. Hazırda bu mənfur xislətin və sağalmaz xəstəliyin ən mühüm göstəricisi revanşizm və şovinizmdir ki, Prezident İlham Əliyevin diqqəti məhz ona yönəldərkən müxalif qüvvələrlə yanaşı, Ermənistan iqtidarını da günahlandırması adi məsələ deyil. Çünki 2020-ci ilin müharibəsindən sonra Ermənistan özünü məğlub ölkə kimi aparmadı. Hər fürsətdə çalışdı ki, savaşın yaratdığı status-kvonu dəyişdirsin. Rəsmi İrəvan döyüş meydanındakı məğubiyyətin əvəzini diplomatik müstəvidə çıxmağa, itirilmişlərin bərpasına səy göstərdi.
Paşinyan iqtidarı, həmçinin Qarabağdakı artıq canını tapşırmış və tarixin arxivinə gömülmüş separatçı rejimi saxlamaq, beləliklə bölgəni ölkəmizdən qoparmaq istiqamətində irili-xırdalı tədbirlər reallaşdırdı, Qarabağın erməni əhalisinə beynəlxalq təminat kimi avantüraya baş vurdu. Üstəlik, sürətli silahlanma yolunu tutdu, bölgəyə silah-sursat, hərbi texnika, canlı qüvvə daşıdı, ərazilərimizi minaladı, diversiya-kəşfiyyat işləri apardı, təxribatlar törətdi. Bütün bunlar Ermənistan rəhbərliyinin, Qarabağ da daxil olmaqla, Azərbaycanın ərazi bütövlüyünü tanıdığını bəyan etməsi fonunda reallaşdı. Bir halda ki, Paşinyan tərəfindən Qarabağ Azərbaycan torpağı kimi tanınırdısa, nəyə görə Ermənistan ordusunun birləşmələri bölgəni tərk etməmişdilər? Axı bu məsələ həmin Paşinyanın imzasının yer aldığı 10 noyabr 2020-ci il tarixli üçtərəfli Bəyanatda əksini tapmışdı.
Bəli, Ermənistan rəhbərliyi üçtərəfli bəyanata məhəl qoymadı. Sənədi lazımsız kağız parçasına çevirdi. Bu gün də çevirməkdədir. Rəsmi İrəvan Naxçıvana maneəsiz, yəni heç bir gömrük, sərhəd yoxlanışı olmadan yola razılıq vermir, bunu ərazi bütövlüyünə və suverenliyinə qəsd kimi qiymətləndirir. Halbuki, Nikol məsələ barədə 2020-ci il noyabrın 10-da düşünməli idi. Siyasət uşaq oyuncağı deyil. Ortada qeyri-ciddi yanaşma varsa, o zaman Azərbaycan nə üçün Ermənistana etimad etməlidir? Əslində, Prezident İlham Əliyevin haqqında söz açdığımız görüşdə bildirdikləri, böyük ölçüdə, Bakının İrəvana inanmadığının təzahürüdür.
Etimadsızlıq və inamsızlıq üçün əsaslar isə bitib-tükənmək bilmir. Diqqət yetirək, Ermənistan hakimiyyəti 44 günlük müharibədən sonra beynəlxalq məhkəmələrdə Azərbaycana qarşı əsassız iddialar irəli sürdü. Onlardan birində belə bir absurd motiv var idi: Ermənistan çalışmışdı ki, Azərbaycanın işğaldan azad edilmiş Ağdam rayonundakı abidələrdən birinin ermənilərə məxsusluğu rəsmi qaydada təsdiqlənsin. Təsəvvür edin ki, torpaq Azərbaycanın, torpağın üzərindəki abidə Ermənistanın. Bu, perspektivə hesablanmış addım idi. Belə düşünülürdü ki, gələcəkdə güclənəcəkləri təqdirdə məsələni mübahisələndirə və deyə bilərlər ki, abidənin üzərində dayandığı ərazi də erməni torpağıdır. Yəni, ortada belə bir məkrli niyyət var idi.
Bəli, Ermənistan Azərbaycana qarşı ərazi iddiasının olmadığını, revanşizmə can atmadığını, şovinizmdən uzaqlığını kompleks tədbirlərlə göstərməlidir. Prezident İlham Əliyev bu sırada ATƏT-in Minsk qrupunun rəsmi şəkildə ləğvindən tutmuş, Ermənistan konstitusiyasının dəyişdirilməsinədək bir sıra məqamları vurğulayır. Erməni cəmiyyətində isə nəyə görəsə bu mövqeni ölkənin daxili işlərinə müdaxilə kimi qiymətləndirənlər var. Onlar yanılırlar. Unudurlar ki, Azərbaycana erməni separatizminin baş qaldırmayacağına dair təminat lazımdır. Özü də mümkün qədər böyük təminat. Eyni zamanda, bu təminatın verilməsi xüsusundakı fəaliyyət səmimi xarakter daşımalıdır. Səmimiyyətdən uzaq istənilən davranış Ermənistan üçün zərərlidir. Bir halda ki, Azərbaycan özünə prioritet sayılan hər şeyi gücü hesabına, qan tökməklə əldə edəcək, deməli İrəvan üçün şərtlər daha da ağırlaşacaq. Bunun dərki üçün siyasi prosesləri dərindən bilməyə ehtiyac yoxdur. Ortada elementar məntiq, keçilmiş yol var. Prezident İlham Əliyev heç də əbəs yerə bildirmir ki, əgər Ermənistan 2020-ci ildə müharibəyə səbəb olmuş vəziyyət formalaşdırmasaydı, konstruktiv mövqe tutub işğal altında saxladığı əraziləri xoşluqla qaytarsaydı, vəziyyəti indikindən qat-qat yaxşı olardı: “Əgər Ermənistan 2020-ci ildə bizim sözümüzə qulaq assaydı və sülh yolu ilə bizim torpaqlarımızı qaytarsaydı, İkinci Qarabağ müharibəsinə və antiterror əməliyyatına ehtiyac qalmazdı”.
Sonda onu da deyək ki, dövlətimizin başçısı hazırda Ermənistan hakimiyyətinin yaxın keçmişdə yaşananlardan nəticə çıxardığını bildirir. Buna misal kimi Qazaxın dörd kəndinin sülh və danışıqlar yolu ilə qaytarılmasını, həmin istiqamətdə sərhədlərin müəyyən edildiyini vurğulayır. Deməli, qalib dövlət olan Azərbaycanın uzun müddət qatlaşdığı məhrumiyyətin mükafatı, eyni zamanda, onun sözünün yerə düşməməsi, Ermənistanın danışıqlar prosesinə sadiq qalmasıdır. Əks halda, Prezident İlham Əliyev də sülh sazişinin imzalanmasının mümkünsüzlüyü üzərində dayanardı. Nəzərə alaq ki, bu, həm də gələcəkdə Ermənistanı gözləyən durum barədə xəbərdarlıq və anons, son dərəcə ciddi əhəmiyyət verilməsi labüdləşmiş mesajdır.
XQ-nın analitik qrupu