Çabahar limanının Şimal–Cənub dəhlizinə qoşulması Nyu-Dehlinin ölkəmizin logistik üstünlüyünü qəbul etməsidir
Şərqlə Qərbin kəsişməsində, olduqca əlverişli coğrafi mövqedə, mühüm tranzit yollarının üzərində yerləşən, regionda önəmi günü-gündən artan ölkəmizə dünya dövlətləri tərəfindən maraq durmadan artır. Eyni zamanda, Cənubi Qafqazda hər hansı layihə həyata keçirmək istəyən ölkələr Azərbaycanın iştirakı olmadan həmin təşəbbüsün baş tuta bilməyəcəyini getdikcə daha aydın dərk edirlər. Görünən odur ki, belə ölkələrdən biri də Hindistandır.
Hər zaman İrəvana dəstək verən, 2020-ci ilin payızında baş tutan 44 günlük Vətən müharibəsindən sonra Ermənistanla əməkdaşlığı daha üst səviyyəyə qaldıran, ona müxtəlif çaplı silah-sursat tədarük edən Nyu-Dehli, deyəsən, yürütdüyü siyasətin yanlış olduğunu dərk etməyə, Azərbaycanın önəmini anlamağa başlayıb. Mayın 13-də Hindistan və İran arasında Çabahar limanının icarəyə verilməsi haqqında sənəd imzalanıb. “The Economic Times” nəşrinin yazdığına görə, sənədə Hindistanın Limanlar, su yolları və gəmiçilik naziri Sarbanand Sonoval və İranın Yollar və şəhərsalma naziri Mehrdad Bazarpaş imza atıblar. Sənədə əsasən, razılaşma 10 il sonra yenilənəcək və limanın idarəçiliyi Hindistanda qalacaq.
Çabahar İranın Hind okeanına çıxışı olan yeganə böyük limanıdır. “The Economic Times” nəşri yazır ki, Hindistan ilk dəfədir xarici limanın idarə olunmasını öz üzərinə götürür. Qeyd edilir ki, Nyu-Dehli mövcud limanı idarəçiliyə götürməklə Rusiya, Cənubi Qafqaz, Avropa və Mərkəzi Asiya ilə ticarət əlaqələrini genişləndirməyi planlaşdırır. Bu liman Azərbaycanın, necə deyərlər, mühüm halqası olduğu Şimal-Cənub beynəlxalq nəqliyyat dəhlizinin tərkib hissəsi kimi qiymətləndirilir. Belə ki, Hindistan rəhbərliyi onu Şimal–Cənub nəqliyyat dəhlizi ilə əlaqələndirmək niyyətindədir.
Göründüyü kimi, Azərbaycan ərazisindən keçən nəqliyyat-logistika layihələrində maraqlı olan ölkələrin sayı getdikcə artır. Hindistan da Çin kimi öz mallarını Azərbaycan ərazisindən tədarük etməyi düşünür. Ancaq Mərkəzi Asiya, Cənubi Qafqaz, Türkiyə və Avropa istiqamətində nəqliyyat layihələrinin genişləndirilməsi üzrə təşəbbüslərini fəal şəkildə inkişaf etdirən Çindən fərqli olaraq, Hindistan “logistika yarışı”na nisbətən gec – təxminən, 20 il sonra qoşulub. Hindistan indiyədək öz mallarını Qərb bazarlarına çıxarmaq üçün əsasən Ərəbistan dənizindən, Qırmızı dənizdən və Süveyş kanalından keçən dəniz yollarından istifadə edirdi. Ancaq Yəməndə husi üsyançılarının ticarət gəmilərinə hücumu ilə əlaqədar Qırmızı dənizdəki mövcud vəziyyət Hindistanın ixracatına da təsir göstərib və ölkəni quru nəqliyyat və logistika marşrutlarını daha fəal inkişaf etdirməyə məcbur edib. “CRISIL Ratings” beynəlxalq reytinq agentliyinin məlumatına görə, Hindistan “Ümid” burnu vasitəsilə Qırmızı dənizdən yan keçmək zərurəti ilə əlaqədar itkilərə məruz qalır. Qiymətləndirməyə görə, ölkə mart ayında başa çatmış maliyyə ilində ixracatda 30 milyard dollardan çox itki ilə üzləşmiş ola bilər.
Eyni zamanda, Hindistan daha əvvəl beynəlxalq nəqliyyat dəhlizlərinin, xüsusən də keçən ilin sentyabrında təqdim edilən Hindistan–Yaxın Şərq–Avropa İqtisadi Dəhlizinin (IMEC) bir hissəsi olmağı planlaşdırırdı. İsrailin iştirakı ilə həyata keçirilən layihə, Çinin “Bir kəmər, bir yol” təşəbbüsünə cavab olaraq bu marşrutu Hindistanla birgə təqdim etməyə çalışan ABŞ-dən dəstək alıb. Lakin layihənin təqdimatından cəmi iki ay sonra İsrail və Fələstinin HƏMAS hərəkatı arasında daha bir tammiqyaslı müharibə baş verib. Təbii ki, bu, IMEC layihəsinin icrasının ləngiməsinə səbəb olub.
Şimal-Cənub beynəlxalq nəqliyyat dəhlizinin həyata keçirilməsində Oman körfəzinə çıxışı olan İran limanları xüsusi əhəmiyyət kəsb edir. Xüsusilə, Oman körfəzində yerləşən Çabahar limanı Hindistana kifayət qədər yaxın, Fars körfəzindən kənarda yerləşir və daha əlverişli coğrafi mövqeyə malikdir. Məhz əhəmiyyətinə görə, Çabahar limanı bu illər ərzində infrastrukturunun inkişafına təxminən yarım milyard dollar sərmayə qoyan Nyu-Dehlinin hər zaman diqqət mərkəzində olub. Limanın idarəçiliyini ələ alan Hindistan Şimal–Cənub beynəlxalq nəqliyyat dəhlizindən, xüsusən də onun Azərbaycan ərazisindən keçən qərb marşrutundan daha fəal istifadə edə biləcək. “Nə üçün məhz Azərbaycan ərazisindən keçir?” sualının cavabı da sadədir: Axı, Şimal-Cənub məhz Azərbaycan ərazisində Hindistan üçün daha bir vacib layihəyə – qlobal Cənubun istehsalçılarını avropalı istehlakçılarla birləşdirən Transxəzər marşrutuna (Orta dəhliz) inteqrasiya olunub.
Layihə artıq aktiv şəkildə işləyir. Onu da qeyd edək ki, Hindistan dəfələrlə İrəvandan İran–Ermənistan–Gürcüstan–Qara dəniz nəqliyyat marşrutuna qoşulmaqla bağlı təkliflər alıb. Nyu-Dehli hətta bu layihəyə maraq da göstərib. Ancaq Ermənistanın təklif etdiyi marşrutdan fərqli olaraq, Azərbaycan ərazisində nəsə tikməyə, infrastrukturu inkişaf etdirməyə ehtiyac yoxdur. Yəni, Hindistan bu layihənin modernləşdirilməsinə sərmayə qoymağa məcbur olmayacaq. Xüsusilə nəzərə almaq lazımdır ki, Orta dəhlizin Bakı–Tbilisi–Qars dəmiryolu hissəsinin modernləşdirilməsi üzrə işlər başa çatdırılıb. Bunun sayəsində layihənin ötürücülük qabiliyyəti ildə 1 milyon tondan 5 milyon tona yüksəlib. Beləliklə, İranda Rəşt–Astara hissəsinin tikintisi başa çatdıqdan sonra Şimal–Cənub nəqliyyat dəhlizinin qərb marşrutu Hindistan yükgöndərənlərinə təkmilləşdirilmiş infrastruktur təklif edə biləcək. Azərbaycanda Orta dəhlizə inteqrasiya isə Hindistan tədarükçüləri üçün Qərb bazarlarına yol açacaq.
Mövzu ilə bağlı fikirlərini öyrəndiyimiz Beynəlxalq Münasibətlərin Təhlili Mərkəzinin şöbə müdiri, politoloq Cavid Vəliyev bildirdi ki, razılaşma Azərbaycanın, regionun, eləcə də dünyanın nəqliyyat xətləri baxımından olduqca vacib anlaşmadır. Onun sözlərinə görə, Şərqlə Qərb arasında ticarətin, yükdaşımaların doxsan faizi dənizlər və okeanlar vasitəsilə həyata keçirilir. Malakka boğazından, Hind okeanından, Süveyş kanalından və Aralıq dənizindən keçməklə yüklər Şərqdən Qərbə çatdırılır.
Müsahibimiz qeyd etdi ki, bu, çox ucuz, lakin çox uzun zaman alan daşımaçılıqdır. Daşınmanın müddətini qısaltmaq üçün dövlətlər tərəfindən müəyyən addımlar atıldı: “Məsələn, Çinin “Bir kəmər, bir yol” təşəbbüsü irəli sürüldü. Bundan əlavə, 2023-cü il sentyabrın 9-10-da Nyu-Dehlidə keçirilən G-20 ölkələrinin zirvə görüşündə Hindistan–Yaxın Şərq–Avropa İqtisadi Dəhlizinin (IMEC) yaradılmasına dair razılaşma əldə edildi. Amma dekabrın 7-də İsrail və HƏMAS arasında başlanan silahlı toqquşmadan sonra onun təhlükəsizliyi şübhə altına düşdü. Digər nəqliyyat xətti Rusiya üzərindən yükdaşımalardır ki, burada da Avropa İttifaqının sanksiyaları səbəbindən problemlər var. COVID-19 pandemiyası dövründə, bir yapon gəmisinin Süveyş kanalını bağlaması kimi səbəblərdən bütün diqqət Orta dəhlizə istiqamətləndi. Bilirsiniz ki, burada da Azərbaycan mərkəzdə yer alır. Ölkəmizin mərkəzində yer aldığı iki dəhliz var. Biri Orta dəhliz, digəri Şimal–Cənub dəhlizidir. Nəqliyyat dəhlizləri uğrunda gedən mübarizələri diqqətə alaraq deyə bilərik ki, Hindistanın Şimal-Cənub dəhlizinə qoşulması vacib hadisədir”.
Politoloq bildirdi ki, Cənub-Şərqi Asiyada Çin və Pakistanın CPEC adlanan layihəsi var. Bu layihə Çindən başlayaraq, Pakistanın Qvadar limanınadək uzanır. Oradan da yükdaşımalar dəniz yolu ilə davam etdirilir. Hindistanla İran arasında Çabahar limanı ilə bağlı imzalanan razılaşma bir növ CPEC-ə paralel gedən prosesdir.
C.Vəliyevin sözlərinə görə, bu, özlüyündə onu göstərir ki, layihə Ermənistandan keçməyəcək: “Layihənin Ermənistandan keçməsi üçün əvvəla, həmin ölkəyə çox böyük investisiya yatırılmalıdır. Digər tərəfdən, Qərbdən İrana sanksiyalar tətbiq olunub. Qərb dövlətləri Ermənistana layihəni həyata keçirməyə imkan verməzdilər. Amma Azərbaycanda hazır infrastruktur var. Burada yalnız Rəşt–Astara dəmiryolu layihəsinin tamamlanması lazımdır. Beynəlxalq, eləcə də, İran, Azərbaycan və Rusiyaya adi yüklərin rahat şəkildə daşınması üçün İran ərazisindəki Rəşt-Astara dəmiryolunu ya öz vəsaiti, ya da Rusiyadan kredit alaraq bərpa etməlidir”.
C.Vəliyev onu da bildirdi ki, Hindistanla İran arasında əldə edilmiş razılaşma, əslində, Azərbaycanın Şimal–Cənub beynəlxalq nəqliyyat dəhlizi üzrə yük daşımaçılığında alternativsiz olduğunu göstərir. Əgər tərəflər bunu gələcəkdə yerinə yetirəcəklərsə, bu, zaman baxımından da həmin ölkələrin çox böyük uduş əldə etmələri deməkdir: “Qeyd etdiyimiz kimi, dənizlər vasitəsilə daşımaçılıq xeyli zaman alır. Şimal–Cənub dəhlizi vasitəsilə daşımalar daha qısa müddətə başa gəldiyindən bu, onlar üçün daha faydalı ola bilər”.
Qeyd edək ki, Çabahar limanı İranın cənub-şərqində yerləşir. Hindistan və İran 2003-cü ildə limanın birgə inkişafı barədə razılığa gəliblər, lakin sonradan İrana qarşı beynəlxalq sanksiyalara görə layihə təxirə salınıb. 2016-cı ildə Hindistanın Baş naziri Narendra Modi Tehrana səfəri zamanı Nyu-Dehlinin liman infrastrukturunun tikintisinə 500 milyon dollar sərmayə qoymaq niyyətini açıqlamışdı. 2016-cı ilin mayında Hindistan limanda Şəhid Beheşti terminalının tikintisi üçün İran və Əfqanıstanla üçtərəfli saziş imzalayıb.
Tehran və Nyu-Dehli arasında əldə edilən razılaşmaya görə, Rusiyadan göndərilən yüklər Azərbaycan və İran ərazisindən tranzit olaraq Çabahar, oradan isə Hindistanın Mumbay limanlarına çatdırılacaq.
Ermənistanın da Hindistanla İran arasındakı son razılaşmadan gözləntisi var. İrəvan Hindistandan yola çıxan yüklərin bir hissəsinin Ermənistan üzərindən Avropaya daşınacağına ümidlidir. Ancaq bunun üçün Ermənistanda infrastruktur yenilənməli, yollar genişlənməli, dəmir yolları tikilməlidir. Azərbaycan bunların çoxunu reallaşdırıb. Digər tərəfdən, Azərbaycanla Gürcüstanı birləşdirən dəmir yolu da mövcuddur ki, Hindistandan çıxan yüklərin Azərbaycan-Gürcüstan dəmir yolu ilə Qara dəniz limanlarına, oradan da Avropa ölkələrinə nəqlini reallaşdırmaq mümkündür.
Səxavət HƏMİD
XQ