VII MƏQALƏ
Növbəti illərdə görüləcək işlər haqqında bizim çox aydın təsəvvürümüz, planlarımız, proqramlarımız var. Biz qeyd etdiyim sahələr üzrə səylərimizi davam etdirəcəyik, Azərbaycanı daha da qüdrətli ölkəyə çevirəcəyik.
İlham ƏLİYEV,
Azərbaycan Respublikasının Prezidenti
Milli ideya və təhlükəsizlik
VI məqalədə yeni tarixi mərhələdə milli ideyanın başqa vacib faktorlarla yanaşı, milli təhlükəsizliyin təmini ilə də sıx bağlı olması aktuallığını vurğulamışdıq. Milli ideya ilə milli təhlükəsizliyin fəlsəfi və siyasi bağlantısı ilk baxışdan aydın olmaya bilər. Lakin yeni tarixi mərhələ adlandırdığımız dövrdə dünya, bütövlükdə, mürəkkəb, açıq və qeyri-xətti sistem kimi təsəvvür edilir ki, onun bütün tərkib hissələri bir-biri ilə sıx əlaqədə olmalıdır. Belə mühitdə isə yalnız sistemli inkişaf reallaşa bilər. Hətta, öncəki tarixi mərhələlərdə bir-birindən çox uzaq olan sahələr arasında elə bağlantılar özünü göstərir ki, onları adekvat fəlsəfi dərk etmək üçün yeni yanaşmalara ehtiyac yaranır. Onların sırasında milli ideya ilə milli təhlükəsizliyin qarşılıqlı əlaqəsi də vardır. Həmin kontekstdə bir maraqlı və mühüm məqamı da vurğulayaq.
İndi siyasi liderlər, analitiklər, filosoflar və politoloqlar enerji təhlükəsizliyi ilə milli təhlükəsizlik arasında çox sıx qarşılıqlı əlaqə görürlər. Reallıqda enerji sahəsində təhlükəsizliyini təmin edə bilən dövlət həm də avtomatik olaraq milli təhlükəsizliyini təmin etmiş olur. Buna görədir ki, Azərbaycanın geniş bir geosiyasi məkanda enerji təhlükəsizliyinin təmininə böyük töhfə verməsi həm də bir sıra dövlətlərin milli təhlükəsizliyinə töhfə kimi qəbul edilir. Gerçəkdə bu iki faktor arasında əlaqənin məzmunu nədən qaynaqlanır?
Müasir dövrün geosiyasi dinamikası və ümumi mənzərənin vəziyyəti bu iki faktoru bir-birinə sıx bağlamışdır. İndi dövlətlər bir-biri üçün enerji təminatında problem yaratmaqla rəqibləri zəiflətməyə, müqavimət gücünü azaltmağa və bu əsasda milli təhlükəsizliyə təhdid olan faktorlardan ona qarşı istifadə etməyə çalışırlar.
Buna qarşı hansı səmərəli tədbirləri görmək olar? Onların sırasında milli ideyanın toplum tərəfindən inklüziv legitim faktor kimi qəbul edilməsi zəruridir. Çünki o halda cəmiyyətin kənar mənfi təsirlərə müqaviməti güclü olur və o, daxili resurslarını səfərbər edərək, mübarizə aparır.
Bu prizmada Azərbaycan üçün yeni tarixi mərhələdə milli ideyanın başlıca məzmunu özündə hansı faktorları ehtiva edə bilər? Fikrimizcə, bu, güclü lider, güclü dövlət və güclü cəmiyyət (xalq) birliyidir! Burada məsələ iki aspektin vəhdətində qoyulur. Birinci aspekt lider–dövlət–xalq qarşılıqlı münasibətlərinin inklüziv legitim olması ilə bağlıdır. İkinci aspekt dövlət üçün strateji əhəmiyyəti böyük olan bu üç faktorun həm ayrılıqda güclü olması, həm də birgə güclü olmaları əsas şərtdir. Hər iki aspekt ciddi araşdırma tələb edir.
Milli lider
Liderin güclü olması hazırda bütün dünya üçün dövlətlərin müstəqilliyinin birinci şərti kimi qəbul edilir. Güclü lider istənilən situasiyada, o cümlədən, gözlənilməz böhranlı vəziyyətlərdə cəmiyyət və dövlət üçün faydalı olan qərarlar qəbul edəndir. Müasir mərhələdə bu, asan məsələ deyildir və çox sayda faktorları nəzərə almağı tələb edir. Lakin real güclü olan lider bütün çətinlikləri aşır və dövr üçün aktual sayılan başlıca problemləri həll edir. Nümunə kimi ulu öndər Heydər Əliyevin keçən əsrin 90-cı illərində çox mürəkkəb və ziddiyyətli geosiyasi situasiyada Azərbaycan dövləti və xalqı üçün tam faydalı olan addımlar atmasını göstərmək olar. Bunun sayəsində Azərbacan dövlət və cəmiyyət olaraq xilas oldu, bütövlüyünü saxladı və inkişaf xəttinə keçdi.
Bununla müasir dövr üçün müstəqilliyin əsas göstəricilərindən olan xilaskarlıqla yeni quruculuğu paralel aparmaq keyfiyyətini Ulu öndər nümayiş etdirdi. “Əsrin müqaviləsi” enerji strategiyasını milli təhlükəsizliyə xidmətə istiqamətləndirdi. Həyata keçirilən geniş islahatlar Azərbaycanda müstəqil dövlətin institutlaşmasının müxtəlif sferalarını əlaqələndirdi. Qısa müddətdə Azərbaycan cəmiyyəti yeni sosial-iqtisadi, siyasi-mədəni strukturlaşma səviyyəsinə keçdi.
Müasir politoloji təlimlərdə vurğuladığımız siyasi keyfiyyətlər liderin güclü olduğunu təsbit edən parametrlər kimi təqdim olunur. Deməli, güclü lider hər bir situasiyada dövləti və cəmiyyəti qalıb edəndir!
Digər nümunə Prezident İlham Əliyevdir. İlham Əliyev milli ideyanın bir mərhələsini tam reallaşdıran müzəffər liderdir! Bütün aspektlərdə qalibdir. Siyasi, iqtisadi, mədəni, mənəvi-əxlaqi, enerji, təhlükəsizlik, ordu quruculuğu və s. sahələrdə böyük uğurlar qazanmışdır. Əldə etdiyi uğurların real nəticəsi və bu mənada təcəssümü II Qarabağ savaşında qalib gələrək ölkənin ərazi bütövlüyünü təmin etməsidir. Eyni zamanda, İlham Əliyev ölkənin suverenliyini tam təmin etdi! Bununla milli ideyanı reallaşdıran güclü lider oldu!
Deməli, liderin güclü olduğunu göstərən əsas parametr milli ideyanı reallaşdırmaqdan ibarətdir. Bu şərt yeni tarixi mərhələdə daha da aktuallaşır.
Güclü dövlət
Azərbaycanda güclü dövlət quruculuğu konsepsiyasının müəllifi Heydər Əliyevdir. Ümummilli lider çox çətin və ziddiyyətli dövrdə ölkədə müstəqil güclü dövlət qura bildi. Onun strateji hədəflərini və onlara çatmağı düzgün müəyyən etdi və həyata keçirdi.
İlham Əliyev bu prosesi böyük uğurla davam etdirdi. O, bu kontekstdə vurğulayır ki, artıq müstəqil dövlət quruculuğunun əsas prinsipləri müəyyən edilmişdir. Onlar “bir millət, iki dövlət” ümumi strateji düsturu çərivəsində məzmunlaşırlar.
Onu deyək ki, dövlətin gücünü təsdiqləyən faktorlar əldə edilən uğurlardır. Ölkənin ərazi bütövlüyünün təmin edilməsinin təməlində sistemli və davamlı inkişaf dayanır. Cəmiyyətin bütün sahələri üzrə davamlı inkişafa nail olunmuşdur. Ordu gücləndirilmişdir, dövlətin bütün strukturları dəqiq işləyir. İslahatlar dayanmır və iqtisadi infrastruktur daha da təkmilləşir. II Qarabağ savaşını qazanan məhz Heydər Əliyevin əsasını qoyduğu güclü dövlətçilik strategiyası oldu! Müasir, demokratik və daim inkişafda olan Azərbaycan dövləti!
Dövlətin gücünü ifadə edən digər faktor onun xarici siyasət kursunun məzmunu ilə bağlıdır. Azərbaycan yeni tarixi mərhələ üçün müəyyən etdiyi 14 prioritet istiqamət vasitəsilə həm regional liderliyini, həm də qlobal miqyasda geosiyasi oyunçu kimi mövqeyini möhkəmlətmək xəttini seçmişdir. Bunun üçün Azərbaycan həm regionda sabitlik və təhlükəsizliyin əsas qarantıdır, həm də beynəlxalq təhlükəsizliyin yeni arxitekturasının qurulmasının fəal iştirakçısı. Bu iki funksiyanı bir-biri ilə qarşılıqlı əlaqədə reallaşdıran rəsmi Bakı yeni tarixi mərhələdə güclü dövləti yeni səviyyəyə yüksəltməyə nail olacaqdır.
Güclü cəmiyyət
Bu faktor faktiki olaraq inklüziv legitimliyin təməlidir. Lider və dövlətin gücü, əslində, cəmiyyətlə birlikdən qaynaqlanır. Lider xalqı və cəmiyyəti ilə bir olanda həm özü, həm də dövləti güclü olur. Azərbaycan cəmiyyətinin gücü azərbaycançılıq ideologiyasından qaynaqlanır. Azərbaycançılıq real əsasda cəmiyyəti birləşdirir, onun inkişafını təmin edir, bütün sahələrdə tərəqqini stimullaşdırır.
Ulu öndər Azərbaycançılıq məfkurəsi deyəndə, hər şeydən öncə, Azərbaycan mədəniyyətini, ana dilimizi və adət-ənənələrimizi nəzərdə tuturdu. Bununla yanaşı, Heydər Əlyev daim başqa mədəniyyətlərə, dünyanın mənəvi-mədəni və əxlaqi zənginliyinə açıq olmağı tövsiyə edirdi.
Bundan başqa, azərbaycançılıq daxili mühitdə multikulturalizmi aktuallaşdırır və ona geniş şərait yaradır. Bunun sayəsində Prezident İlham Əliyev milli ideyanın bir mərhələsinin nəticəsi olaraq vətəndaş cəmiyyətinin formalaşmasını göstərmişdir. Vətəndaşın gücü, bütövlükdə, cəmiyyətin gücünün təməlində dayanır. Deməli, vətəndaşın güclü olması güclü cəmiyyətlə güclü dövlətçiliyi birləşdirən əsas amildir.
Məsələnin bu tərəfi milli ideya kontekstində son dərəcə əhəmiyyətlidir. Aydın olur ki, yeni tarixi mərhələdə inkişafın mərkəzində insan amili dayanacaqdır. Lakin bu faktor güclü dövlətlə güclü cəmiyyətin vəhdətini yaratmaqda başlıca lokomotiv rol oynamalıdır. Bunu isə güclü lider reallaşdıracaqdır. Onda yeni tarixi mərhələdə güclü liderin milli ideyanın mərkəzi amili olacağı nəticəsini çıxara bilərik.
Bizcə, Azərbaycan üçün başqa variant uğurlu olmaya bilər. Hər şeydən öncə, o səbəbdən ki, yeni tarixi mərhələdə milli ideya güclü liderin sayəsində reallaşa bilər. Elə bir lider ki, faktiki olaraq milli ideyanın məzmunu və məqsədini müəyyən edir. Eyni zamanda, bu məqsədə çatmanın konkret mexanizmlərini hazırlayır! Bu lider Azərbaycan Respublikasının Prezidenti İlham Əliyevdir!
***
Yekun olaraq, yeni tarixi mərhələdə milli ideyanın başlıca xüsusiyyəti haqqında fikir yürüdə bilərik. Yuxarıdakı təhlildən görünür ki, yeni tarixi mərhələdə milli ideyada siyasi şəxsiyyət faktoru aparıcı rol oynamalıdır. Dövlət başçısı həm də siyasi lider kimi, milli ideyanı müəyyən edən və onu reallaşdıran şəxsiyyətdir. Bunun üçün dövlət başçısı, təbii ki, cəmiyyətin bütün kəsimlərinin milli ideya ilə bağlı nəbzini tutmalıdır. İlham Əliyev bunu həyata keçirir. Maraqlıdır ki, cəmiyyətdən, o cümlədən, ziyalılardan olan reaksiyalar göstərir ki, toplum birmənalı olaraq İlham Əliyevin milli ideya ilə bağlı fikirlərini tam qəbul etməyə hazırdır və Prezidentə güvən yüksəkdir.
Belə çıxır ki, Azərbaycan yeni tarixi mərhələdə milli ideyanın müəyyən edilməsinə və onun reallaşmasına tamamilə monolit, fikir və mövqe birliyi ilə gedir. AMEA-nın timsalında Azərbaycanın elm adamları da bu qənaətdədirlər. Bu qənaət AMEA Rəyasət Heyətinin milli ideyaya həsr olunmuş son seminarında yekdilliklə qəbul edilmişdir. AMEA güclü lideri milli ideyanın reallaşmasının başlıca qüvvəsi kimi gördüyünü ifadə etmişdir! Bizcə, tamamilə perspektivli, real vəziyyətə uyğun və müstəqil dövlətçiliyə xidmət edən mövqedir! Belə alınır ki, Azərbaycan cəmiyyət olaraq Prezidentə milli ideya ilə bağlı tam dəstək verir. Deməli, qarşıdakı mərhələdə də milli ideya reallaşacaqdır!
Füzuli QURBANOV,
XQ-nin analitiki, fəlsəfə elmləri doktoru