III MƏQALƏ
Birinci etiraf: millətsevərliklə etnomərkəzçiliyin fərqi işığında
Ermənilər millətsevər deyillər, etnomərkəzçilərdir. “Etnomərkəzliçik” qədim yunan dilindən təcümədə “xalqın mərkəz olduğuna fokuslanmaq” anlamını verir. Bu, elə bir dünyagörüşüdür ki, öz mədəniyyəti nümunəsində başqa mədəniyyətlərin insanları haqqında mühakimə yürüdülür. Konkret olaraq, öz etnik mənsubluğunun müstəsnalığı duyğusu prizmasında başqalarının həyatı, ənənəsi və dəyərləri haqqında mövqe formalaşdırılır. Bu zaman, etnomərkəzçinin dayanıqlı identikliyi olmalıdır. Ancaq etnomərkəzçi üçün öz identikliyinin dayanıqlığı mütləq həqiqətdir, başqalarının identikliyi isə nisbidir. Bununla yanaşı, etnomərkəzçi başqalarının identikliyini aşağılaya bilir, onun dəyişməsini tələb edir və bunun üçün ən radikal addımlar belə atmağa hazırdır. Çünki onun üçün “dünyanın mərkəzi” öz etnik qrupudur.
1906-cı ildə E.Samner “etnomərkəzçi” terminini leksikona daxil edəndə izah etmişdi ki, etnomərkəzçi üçün öz qrupu “hər şeyin mərkəzində” olur, digərləri bu mövqedən qiymətləndirilir.
Məsələ bununla məhdudlaşmır. Etnomərkəzçi bu baxışlarını ideoloji səviyyəyə transfer edəndə radikalçı, terrorçu, başqalarını qəbul etməyən, özündənrazı və riyakar bir insan tipinə çevrilir. Bu proses kütləvi hal alıb, bütövlükdə, toplumu əhatə edirsə, etnik qrupun (və ya xalqın) dünyaya baxışı yanlış olur, ətrafa şizofrenik münasıbət formalaşır. Erməniləri yaxından tanıyanlar bütün bunların onlara xas olduğunu dərhal qəbul edirlər.
Tarixi təcrübə göstərir ki, erməni milliyyətçisi millətsevər ola bilmir, lakin qatı etnomərkəzçi ola bilir. Bunu məhz ermənilərin qonşu xalqlara və onların mədəniyyətlərinə münasibəti sübut edir. Məsələ ondan ibarətdir ki, əsl millətsevər başqa millətlərə nifrət edə bilməz, onlara yuxarıdan aşağı baxmaz, günahsız insanlara qarşı terror törədə bilməz. Çünki millətsevər, ümumiyyətlə, “millət” anlayışını sevir. Millətin və ya xalqın nə demək olduğunu dərk edir. Bunun fonunda əgər öz xalqını, etnik qrupunu və ya daha yüksək birgəyaşam forması kimi millətini sevirsə, başqalarına sayğılı münasibət göstərər.
Rusiyada aparılmış bir sosioloji araşdırmada tədqiqatçılar bu baxımdan maraqlı nəticə alıblar. Onlar Moskvada yaşayan miqrantlardan yalnız öz tarixini yaxşı bilənlərin, mənsub olduğu xalqı dərindən sevib, ona hörmət edənlərin yad mühitə daha tez uyğunlaşdığını aşkar ediblər. Və azərbaycanlılar bu siyahıda ilk sırada olanlardandır. Çünki azərbaycanlı millətsevərdir, etnomərkəzçi deyil. O, ümumiyyətlə, xalq və millətin nə demək olduğunu Qafqazda ən yaxşı anlayandır!
Tarixə baxanda görürük ki, ermənilər, adətən, kənar təsirlər sayəsində özlərinin müstəsnalığı xəstəliyinə tutulmuşlar. Bəzi ermənilər hətta İusus Xristosun (İsa peyğəmbərin) də erməni olduğu fikrindədirlər. Bu düşüncə ilə onlar Ağrı dağını gerblərində Ermənistanın rəmzi kimi vermişlər. Onlara elə gəlir ki, dağ da etnik mənsubluq kateqoriyasına aid olan gerçəklikdir. Bir qədər də dərinə gedirlər: Nuh Peyğəmbər də ya ermənidir, ya da ona dua oxuyan, tərənnüm edəndir!
İndi N.Paşinyan nə özünü, nə də erməniləri bu miflərə uymaqla böyük tarixi səhv etdiklərinə inandıra bilmir. Hər halda bu vəziyyətin dəyişməsi üçün cəhdlər göstərir. Həmişə olduğu kimi isə yanlış yerdən başlayır. Çünki konstitusiyadan hər hansı rəmzi və ya müddəanı silə, mətndən çıxara bilərsən, lakin insanların şüurunda və psixologiyasında əsrlərlə formalaşdırılmış xəstə təxəyyülü bu yolla çıxara bilməzsən. Buna görə də ermənilər öncə özlərini dəyişməli, sonra konstitusiyalarına baxmalıdırlar. Hazırda Ermənistanda meydana gəlmiş siyasi böhranın kökündə bu ziddiyyət dayanır.
Onların Azərbaycana qarşı olan münasibətin tarixi qənaətimizi tam təsdiq edə bilir. Erməniyə elə gəlir ki, hər cəhətdən türkdən, o cümlədən azərbaycanlıdan üstündür. Bu əsasda etnomərkəzçi kimi azərbaycanlılara nifrət edir. Nifrət erməni mənəviyyatını və psixologiyasını deqradasiyaya uğradır, onu bir varlıq kimi məhv edir. Dində və elmdə deyildiyi kimi, nifrət hər bir insanın ilk növbədə özünü məhv edir. Məsələn, K.Q.Yunq, Z.Freyd, Q.D.Lassuel və başqa psixoloqlar bu barədə fikir bildirmişlər. Onlar insanın özünü daxili psixoloji dinamikada yaratdığına inanırdılar. Məsələn, K.Q.Yunq hesab edirdi ki, insan ətraf mühitin qavramına yönəlmiş insan canatması (ekstravert istiqamət) ilə özünə empatiyaya yönəlmiş (introvert istiqamət) “özünüdərkin” qarşılıqlı əlaqə dinamikasında şəxsiyyət kimi formalaşır. Burada hər hansı təhrif insanda psixoloji qüsur yaradır. Konkret isə insan etnomərkəzçi kimi əsas olaraq “öz etnik mənsubluğu”nu bütün müqayisələrin mərkəzinə qoyanda qaçılmaz olaraq psixoloji problemləri meydana gəlir.
Məsələn, insan narsist ola bilir. Psixologiyada “narsisizm” insanın özünəvurğunluğunu, eqosentrizmini və özünün hətta mənsub olduğu etnoqrup daxilində müstəsna olduğunu ifadə edir. Ermənilərdə toplum halda narsisizm güclüdür və təsadüfi deyildir ki, özlərinin çox qədim olması mifini uydurmuşlar. Qədimlik “ana bətninə”, “yuvaya” qayıdışın rəmzidir və psixologiyaya görə, bu psixoloji özəlliyə narsistlər daha çox sahibdirlər.
Təbii ki, insan keçmişə xüsusi hörmətlə yanaşmalı, ənənəni davam etdirməlidir. Lakin bu, ifrat formada olursa, müasirlik unudulursa və ya ona keçmişin reallıqları prizmasında baxılırsa, birtərəfli təsəvvürlər yaranır, özünün müstəsnalığı meyli formalaşır. Ermənilər üçün bədbəxtçilikdən avropalılar və ruslar onların bu özəlliklərini daha yaxşı bilirlər və həmin radikal təsəvvürlərin ideoloji səviyyədə möhkəmlənməsinə təkan vermişlər.
Nəticədə tarixdə “erməni milli qəhrəmanı” obrazı və ya adı altında çox sayda başkəsən, terrorçu, radikal dağıdıcı, özünü hər kəsdən üstün tutan riyakar və qəddar nümunələr meydana gəlmişdir. Buna görədir ki, indiki mərhələdə belə adi erməni şüurunda türkə nifrət edən terrorçu həm də “milli qəhrəman”dır.
Məsələn, Nijde! Bu, on minlərlə zəngəzurluya qarşı terror etmiş, onları yurdlarından amansızcasına və işgəncə ilə deportasiya etmiş qatı faşist və terrorçuya qəhrəman kimi heykəl qoyanların adı nədir? Milli qəhrəman erməni təsəvvüründə millətinə müsbət xidmət edən deyildir, türk və müsəlmana daha çox nifrət edən, kütləvi qətllər törədən, vəhşiliyin bütün üsullarına bələd olan terrorçudur!
İndi bu avropalılar və farslar papaqlarını qabaqlarına qoyub fikirləşsinlər: qonşu xalqa bu cür yanaşan topluma necə haqq qazandırmaq və ya etibar etmək olar? Şübhə etmirəm ki, ermənilərə nə avropalılar, nə farslar, nə də ruslar etibar edirlər. Bunların hər biri sadəcə erməni xislətini bilərək, ondan istifadə edir və lazım olmayanda kənara atırlar! Lakin ermənilərin özləri bunu bilmirlər!
Sonra, konstitusiya və Qarabağda müharibədə məğlubiyyətlə bağlı müzakirələrdə müşahidə edilən siyasi böhranın yaranmasında bu gerçəkliyin əsas rolu vardır. Erməninin fərdi şüuru gerçəkliyi görür, baxır ki, biabırcasına uduzmuşdr, lakin bu vəziyyəti kollektiv halda obyektiv qiymətləndirməyə etnomərkəzçiliyi, psixoloji natamamlığı və özü haqqında əsrlərdir formalaşdırılmış qədimlik, mədənilik və müstəsnalıq xülyaları ona mane olur! Bu bəladan xilas olmaq üçün ilk olaraq, adam kimi Azərbaycanın qalib gəldiyini qəbul etmək zəruridir. Bu etirafı etməsələr, praktiki həyatda ona əməl etməsələr, ermənilərin nə xalq, nə də dövlət kimi gələcəyi yoxdur.
Ola bilər ki, etiraflar gerbdə, bayraqda, konstitusiyada, müstəqillik aktında bir sıra müddəaları, rəmzləri dəyişməklə müşayiət olunsun. Bunun da önəmi vardır. Lakin bütün hallarda daim uğur qazanmaq və bütövlükdə, erməni xalqının xilası üçün Azərbaycanın qalibiyyətini tam olaraq qəbul etmək gərəkdir! Görmək lazımdır ki, Azərbaycan xalqı bu regionun ən güclü dövlətçiliynə, mədəniyyətinə, pozitiv psixoloji faktorlarına və sarsılmaz iradəyə malik, gələcəyini aydın görən liderinə sahibdir. Ona görə də Azərbaycan və azərbaycanlılara yuxarıdan aşağı baxmaq yox, həmişə barışçıl, yardım edən, çətinə düşmüş qonşularına yardım əlini uzadan humanist xarakterli müasir xalq kimi baxmaq lazımdır. Təcrübə üçün Gürcüstan xalqına müraciət edə bilərlər. Bir dönəmdə Azərbaycan Gürcüstan dövləti və cəmiyyətini məhv olmaqdan xilas etdi. Ermənilər müraciət etsələr, gürcülər bunun nə demək olduğunu onlara anladarlar.
Birinci etirafın izahı hansı gerçəkiliyi ortaya qoyur? Hər şeydən öncə, Ermənistan rəhbərliyinin konstitusiyanı dəyişmək cəhdi müsbət haldır. Ancaq bunu cəmiyyətdə həyata keçirilən real islahatlar fonunda etmək lazımdır. Konkret olaraq, Ermənistan insanların şüurlarında və psixologiyasında əsrlərdir yer almış xəstə təsəvvürlərdən təmizlənməlidir. O cümlədən, azərbaycanlıların (türklərin) düşmən obrazı dağıdılmalıdır. “Soyqırımı” nağılına son qoymaq gərəkdir. Bütün dövlət rəmzlərindən Azərbaycan və Türkiyəyə qarşı ərazi iddialarını əks etdirən məqamlar əbədi çıxarılmalıdır.
Deməli, birinci etiraf göstərir ki, Ermənistanda böhranın syasi dalana çevrilməsinin dərin kökləri vardır və onlar cəmiyyətdaxili sosial-psixoloji faktorlardan qaynaqlanır. Ermənistan hüquqi dəyişiklikdən öncə mənəvi-psixoloji və şüuri dəyişikliyə getməlidir. Bu etirafın üzərində geosiyasi və siyasi-ideoloji səviyyədə özünü göstərən ikinci və üçüncü etiraflar edilməlidir.
Burada onu vurğulayaq ki, Azərbaycanın Qələbəsinin erməni etnomərkəzçiliyi kontekstində etirafı ilə siyasi ideoloji səviyyədə ediləcək etiraf arasında funksional fərqlər vardır. Əgər birinci etiraf, ümumiyyətlə, ermənilərin mənəvi, əxlaqi və psixoloji özəlliklərini konstruktiv yönə istiqamətləndirməklə bağlıdırsa və bu anlamda daha çox toplumsal xarakterlidirsə, siyasi-ideoloji səviyyədə etiraf cəmiyyətin idarə edilməsi və dövlətlərarası münasibətlərin formalaşdırılması ilə əlaqəlidir. Bu səbəbdən, ona ayrıca baxmaq lazımdır.
Beləliklə, birinci etiraf digərləri üçün mənəvi, psixoloji və müəyyən mənada tarixi baza rolunu oynayır.
(ardı var)
Füzuli QURBANOV,
XQ-nin analitiki, fəlsəfə elmləri doktoru