Onda vəziyyətin özü “rusca” olacaq
Qərbi Rusiyanı Ermənistanın köməyi ilə Cənubi Qafqaz regionundan sıxışdırıb çıxarmaq siyasətində ittiham edən Rusiya rəsmilərinin bəyanatlarının səbəbi nədir? Ermənistanın baş naziri Nikol Paşinyanın ölkəsinin Kollektiv Təhlükəsizlik Müqaviləsi Təşkilatına üzvlüyünü “dondurması” ilə bağlı bəyanatının hansı məqamları var və bu, nəyə gətirib çıxara bilər? Bu kimi məsələlərlə bağlı Rusiya Federasiyası Hökuməti yanında Maliyyə Universitetinin Beynəlxalq və ictimai hüquq kafedrasının dosenti, politoloq İqor Semenovski Ermənistanın VERELQ Analitik İnformasiya Mərkəzinin suallarını cavablandırıb.
İ.Semenovski bildirib ki, Rusiyanın yüksək rütbəli məmurlarının bəyanatları son illər Ermənistanda, Gürcüstanda və Azərbaycandakı bir sıra amillərlə bağlıdır. Onun sözlərinə görə, Böyük Britaniyanın, Fransanın, ABŞ-ın, Avropa İttifaqının və digərlərinin Cənubi Qafqazdakı proseslərə necə dağıdıcı təsir göstərməyə çalışdıqlarını görmək üçün uzağa getməyə ehtiyac yoxdur. Əgər Gürcüstan parlamenti dövlətin suverenliyinin qorunmasındakı sabitliyi artırmaq və 2023-cü ildə xarici təsirin şəffaflığı ilə bağlı milli qanunvericilik qəbul etmək istəyirsə, bu, Qərb ölkələrinin fikrincə, söz və media azadlığının pozulmasıdır. Eyni zamanda, ötən əsrin əvvəllərindən və ortalarından ABŞ və Böyük Britaniyada, Avropa İttifaqında xarici agentlərlə bağlı oxşar və daha sərt qanunlar da qüvvədədir.
Rusiyalı politoloq bir sıra xarakterik tendensiyaları sadalayıb. O bildirib ki, Avropa ölkələri Azərbaycandakı hakimiyyəti “avtoritar” adlandırırlar. ATƏT ölkədə 2024-cü ilin fevralında keçirilmiş Prezident seçkilərinin legitimliyini şübhə altına alır. Lakin son illərdə Avropa Bakıdan neft və qaz alınmasını gücləndirir. Fransanın və qitənin digər ölkələrinin hakimiyyət orqanları Ermənistanı hər cür şifahi dəstəklə təmin edirlər. Avropa İttifaqının ölkədə monitorinq missiyası fəaliyyətdədir. 2023-cü ilin sentyabr ayının əvvəlində Ermənistan və ABŞ birgə təlimlər keçirdi, ancaq İrəvan bundan bir həftə sonra Qarabağdakı mövqelərini tamamilə itirdi.
İ.Semenovski Cənubi Qafqaz baxımından indiyədək görünməmiş unikal neqativ amil kimi Ermənistanın Beynəlxalq Cinayət Məhkəməsinin Roma Statutuna qoşulmasını önə çəkib. Onun sözlərinə görə, bu addım İrəvanın Moskva ilə münasibətlərinə problemdən başqa heç nə gətirməyəcək. Politoloq Qərbin bir sıra qeyri-hökumət təşkilatlarının Ermənistanın, Gürcüstanın və Azərbaycanın vətəndaş cəmiyyəti ilə dağıdıcı iş aparmasından da söz açıb. Mövcud xüsusda USAID-in, NED-in, NDI-nın, IRI-nin və digər bu kimi strukturların fəaliyyəti üzərində dayanıb. O, bütün bunları da ABŞ-ın, Aİ-nin və başqa Avropa ölkələrinin regionda öz məqsədlərini güddüklərinin əyani sübutu olaraq göstərib. Məqsəd isə birdir. Rusiyanı Cənubi Qafqazdan sıxışdırıb çıxarmaq.
İ.Semenovski bildirib ki, Qərbə regionda sülh və sabitlik lazım deyil. O deyib ki, Rusiya, İran və ya digər güclər isə Cənubi Qafqazda sabitliyi pozmaqda maraqlı olmadıqları üçün “parçala və hökm sür!” siyasətini həyata keçirən Qərbə yalnız xəbərdarlıqlarla kifayətlənirlər. Onlar Cənubi Qafqazın problemlərinin regional oyunçular tərəfindən, süni kənar müdaxilələr olmadan həllini əsas götürürlər. Ancaq, hələlik, mövcud istiqamətdə konkret nəticə yoxdur, yalnız gərginlik var.
Rusiyalı politoloq, bilavasitə, Ermənistan amili üzərində dayanıb və bildirib ki, ölkə ənənəvi olaraq Rusiyanın regiondakı ən sabit müttəfiqi olub. Ermənistan Gürcüstan və Azərbaycandan fərqli olaraq, Avrasiya İqtisadi İttifaqının (Aİİ) və KTMT-nin üzvüdür və bunun sayəsində bir çox üstünlüklər və güzəştlər əldə edir. Həmçinin, Rusiya ilə Ermənistan arasında əməkdaşlıq strateji xarakter daşıyır. Buna görə də Moskva ölkənin suveren dövlətçiliyinin əsaslarının aşındığına laqeyd yanaşa bilmir.
Siyasi icmalçının fikrincə, artıq gec olsa da, Rusiya anlamağa başlayıb ki, N.Paşinyanın təhlükəsizlik siyasəti sahəsində “şaxələndirmə” ilə bağlı dilə gətirdiyi fikirlər, əslində, ölkənin kursunun dəyişdirilməsi deməkdir. Bəs Rusiya Qərbin planlarını neytrallaşdıra bilərmi? Kreml regionda qalmaq xüsusunda nələri düşünür? Politoloqun sözlərinə görə, Rusiya ilə Qərb ölkələri, ümumən, kollektiv Qərb arasında qarşıdurma dünyanın bir çox regionlarında və müxtəlif formalarda gedir. Cənubi Qafqazda qeyri-regional oyunçuların köməyi ilə sabitliyin pozulması gündəmdədir. Mövcud şəraitdə Rusiya region ölkələri ilə qarşılıqlı əlaqəni gücləndirməlidir. Necə? Politoloq 2023-cü ilin sonunda Rusiya iqtisadiyyatının əsas rol oynadığı Avrasiya İqtisadi İttifaqının İranla azad ticarət zonası haqqında tammiqyaslı saziş bağladığından danışıb. O deyib ki, bu saziş regionun iqtisadiyyatlarının inkişafında sinerjini gücləndirməlidir. Habelə, Ermənistanın Aİİ-də iştirakı, Rusiyadan sərmayələrin axını və onunla ticarət, həmçinin əsasən Rusiya vətəndaşlarının axını sayəsində İrəvanın iqtisadiyyatı 2022-ci ildə 12,6 faiz, 2023-cü ildə isə 9,4 faiz artıb. Belə olan halda Ermənistanın hazırkı rəhbərliyi xarici siyasət kursunun və paradiqmasının dəyişməsi kontekstində iş aparacaqmı? Hadisələr göstərir ki, rəsmi İrəvanın niyyəti ortadadır.
Bilavasitə Ermənistan – KTMT münasibətlərindən, daha doğrusu, Paşinyanın Parisdə İrəvanın qurumdakı fəaliyyətini “dondurduğunu” deməsindən söz açan siyasi şərhçi bildirib ki, bir müsahibədə ölkənin KTMT-dəki fəaliyyətinin dondurmasından danışmaq, eyni zamanda, qonşu dövlətdən, yəni Azərbaycandan hərbi təhlükə barədə həyəcan təbili çalmaq səriştəsizliyin zirvəsidir. “Təəssüflər olsun ki, Ermənistan vətəndaşlarının gözləri önündə ABŞ, Aİ, Fransa və digər Avropa ölkələrinin hakimiyyət orqanlarının Ermənistanı hər cür şifahi dəstəklə məhdudlaşdığına dair acınacaqlı təcrübə var. 2023-cü ildə Aİ-nin monitorinq missiyasının qaldığı müddətdə, eləcə də 2023-cü ilin sentyabrında Ermənistan və ABŞ-ın birgə təlimlərindən dərhal sonra İrəvan 100 mindən çox insanın çıxarılması ilə Qarabağa təsir imkanlarından yapışmaq üçün son şansını itirdi”, – deyən politoloq bunu da soruşur: Aİ və ABŞ Azərbaycanla sərhəd münaqişəsi fonunda Ermənistana kömək etdimi? Əlbəttə, yox!
Nəhayət, İ.Semenovski belə nəticəyə gəlir ki, Ermənistanın indiki hakimiyyətinin mövcudluğu və onun Qərbyönümlü kursu şəraitində ölkənin KTMT-də iştirakının şifahi müstəvidə də olsa, dondurması və ya dayandırması regional qeyri-sabitliyi artırmaqla, İrəvanın təhlükəsizliyini əhəmiyyətli dərəcədə azaldır. Mövcud tendensiya orta və uzunmüddətli perspektivdə davam edərsə, Ermənistanın iqtisadiyyatı da zərər görəcək. Məhz belə olduqda Paşinyanın “Rusiya rəsmiləri Ermənistanda hakimiyyəti devirməyə çağırışlar edirlər” məntiqi real mahiyyət daşıyacaq. Özü də bu dəfə əməldə.
Ə.CAHANGİROĞLU
XQ