“Biz döyüş meydanında cəmi 44 gün ərzində Ermənistan ordusunu tamamilə darmadağın etmişdik. Elə günə salmışdıq ki, özlərinin etirafına görə, 12 mindən çox fərarisi olmuşdur. Azərbaycan Ordusundan bir nəfər də döyüş meydanını tərk edib qaçmamışdır. Bu, bir daha Azərbaycan xalqının əyilməz ruhunu göstərir”.
İlham ƏLİYEV
Ali Baş Komandan
Hər bir xalq öz milli-mənəvi, əxlaqi dəyərləri ilə güclüdür. Zəngin mədəniyyət, ədəbiyyat və incəsənət də toplumların başını uca edir. Amma, millətin torpağını, qeyrət və namusunu qoruyan onun ordusudur. Azərbaycan əsgəri, zabiti, həm qeyrətli, həm də peşəkardır. Bunu Vətən Müharibəsi zamanı gedən ölüm-qalım döyüşləri sübut edib! Xalqımızın bugünkü və gələcək nəsilləri Tarixi Zəfərimizlə fəxr edəcəklər!
2020-ci ilin noyabrının ilk günlərində Şuşanın sıldırım qayalarına yüngül silahlarla, demək olar ki, əliyalın dırmaşaraq, yağı düşmənin başını əzən Azərbaycan əsgərinin döyüş əzmi, yüksək peşəkarlığı bütün dünyanı heyrətə gətirib. Bəşəriyyət öz hərb tarixində çox nadir hallarda buna bənzər, anoloji mənzərə ilə üzləşib. Şuşanın fəthini isə haqlı olaraq, 1915-1916-cı illərdəki Çanaqqala savaşında qardaş Türkiyə xalqının nümayiş etdirdiyi qəhrəmanlığa bənzədirlər.
Bu il fevralın 14-də Prezident, Ali Baş Komandan İlham Əliyev Azərbaycan Respublikasının Milli Məclisində andiçmə mərasimi zamanı olduqca parlaq nitq söylədi. Dövlətimizin başçısı bütün istiqamətlər üzrə görülən işlər, qarşıda duran vəzifələr barədə dərin məzmunlu, məntiqli fikirlər səsləndirdi. Cənab İlham Əliyev Milli Ordunun qeyrətli əsgər və zabitlərinin son illərdəki hünərindən xüsusi bir şövq və sevgi ilə söz açdı.
Yəqin ki, mənimlə razılaşarsınız, Prezident İlham Əliyev həmin anlarda son dərəcə xoşbəxt insan təsiri bağışlayırdı. Onun buna tam haqqı var! Bəli, gücü, qüdrəti, yüksək peşəkarlığı ilə seçilən, ən başlıcası, milli ruhu və şərəfini hər şeydən uca tutan bir ordunun Ali Baş Komandanı olmaq böyük səadətdir. Ordunun hər bir əsgər və zabitinin öz Komandanına olan sevgi və sədaqəti sonsuzdur!
2020-ci ilin payızında Azərbaycanın mərd, igid əsgər və zabitləri 44 günlük şanlı savaşda qeyri-adi şücaət və qəhrəmanlıqları ilə bütün dünyanı heyrətə gətirdilər. Bununla da Azərbaycan Ordusu Ermənistanın uzun illər ərzində yaratmağa çalışdığı mifləri darmadağın etdi. Dünya belə bir danılmaz həqiqətin şahidi oldu ki, erməni ordusu qorxaq və təslimçilər ordusudur. Prezident sonsuz bir qürur hissilə vurğuladı ki, “bunu bizim cəsur döyüşçülərimiz qan tökərək, irəliyə gedərək, 5-6 müdafiə xəttini aşaraq sübut etmişlər və 44 günlük Vətən müharibəsi bizim əyilməz ruhumuzu göstərmişdir”.
Azərbaycan dövləti 2023-cü ilin 19-20 sentyabr tarixlərində Rusiya sülhməramlılarının müvəqqəti nəzarətində olan Xankəndi şəhəri və ətrafındakı ərazilərdə uğurlu antiterror əməliyyatı keçirmişdir. Bu əməliyyatın hər bir detalı zərgər dəqiqliyi ilə hazırlanaraq icra olunmuşdur. Prezident İlham Əliyev həmin əməliyyatla bağlı demişdir: “Sentyabr ayında keçirilmiş antiterror əməliyyatı bir daha Silahlı Qüvvələrimizin gücünü göstərdi. Cəmi bir neçə saat ərzində Ermənistan ordusunun təxminən 15 minlik ekspedisiya korpusu tamamilə iflic vəziyyətinə salınmışdır və onlar ikinci dəfə kapitulyasiya aktına imza atmağa məcbur olmuşlar”.
Bu gün ölkəmizin ərazi bütövlüyünü qorumaq istiqamətində Milli Ordunun qarşısında mühüm vəzifələr durur. Azərbaycan xalqı öz əsgər və zabitlərinə güvəndiyi kimi, ordu da daim xalqın və dövlətin hərtərəfli dəstəyini hiss edir. Təsadüfi deyil ki, dövlətimizin başçısı andiçmə mərasimində bildirdi ki, “növbəti illərdə qarşımızda duran əsas vəzifələrdən biri Ordumuzun, Silahlı Qüvvələrimizin daha da gücləndirilməsidir. İkinci Qarabağ müharibəsindən sonra bu istiqamətdə çox böyük addımlar atıldı və mən müxtəlif vaxtlarda bu məsələ ilə bağlı öz sözlərimi demişdim. Demişdim ki, bu gün Azərbaycan Ordusu 2020-ci ildəkindən daha güclüdür və cəmi bir neçə saat davam edən antiterror əməliyyatı bunun bariz nümunəsidir”.
Azərbaycan Ordusunun parlaq uğurları dövlətimizin və xalqımızın düşmənlərini çox narahat edir. Onlar rəsmi Bakının milli maraqlarımıza xidmət edən müstəqil siyasətini hər cür vasitələrlə ləkələməyə çalışır, ölkəmizi beynəlxalq aləmdə nüfuzdan salmağa cəhd edirlər. Təəssüf ki, Ermənistandakı revanşist qüvvələr hələ də reallıqları görmək istəmirlər. Onlar xaricdəki havadarlarının, xüsusilə Fransanın dəstəyilə Cənubi Qafqazda sülh və sabitliyin bərqərar olunmasına hər cür maneə olmağa cəhd edirlər.
Amma bütün bu cəhdlər əbəsdir. Ona görə ki, Azərbaycan dövləti bu gün regionda sülh və sabitliyin qarantı rolunda çıxış edir. Yalnız sülh və təhlükəsizlik bölgəyə inkişaf, tərəqqi gətirə bilər! Bunun bəhrəsini isə təkcə Azərbaycan xalqı deyil, Cənubi Qafqazda yaşayan bütün millətlər və xalqlar görəcəklər. Sadəcə, erməni xalqı bunu başa düşməli, sağlam düşüncə və müdriklik nümayiş etdirməlidir.
Ermənistan rəhbərliyi isə hələ də səhv yoldan çəkinmək istəmir. Prezident İlham Əliyev bu yaxınlarda baş verən insident barədə demişdir: “Bu günlərdə Ermənistan tərəfindən törədilmiş yeni təxribata dərhal adekvat cavab verildi, düşmən cəzalandırıldı. Bu, bir daha onlara və əsasən onlara ürək-dirək verən, üstümüzə göndərən qüvvələrə siqnal idi ki, bizim qabağımızda heç kim dura bilməz”.
Məlumdur ki, bu gün bütün dünyada hərbi sahədə texnoloji inkişaf və üstünlük böyük əhəmiyyət daşıyır. Azərbaycan dövləti Milli Orduda yüksək mənəvi döyüş ruhunun daha da gücləndirilməsi, onun ən yüksək silahlarla təmin olunması üçün bütün zəruri addımları atır. Azərbaycan Ordusu bu gün döyüş qabiliyyətinə görə, dünyanın ən qüdrətli və yenilməz ordularından biridir.
Ali Baş Komandanın xüsusi vurğu ilə qeyd etdiyi kimi, Qələbəmizin əsas amili Azərbaycan döyüşçüsüdür. Düşməni məhv edən və Bayrağı azad edilmiş torpaqlara sancan insandır, əsgərdir, zabitdir! Azərbaycan xalqı həm də ona görə xoşbəxtdir ki, məhz belə bir yüksək döyüş əzminə malik olan orduya malikdir!
Məsaim ABDULLAYEV
XQ