Növbədənkənar prezident seçkiləri müasir Azərbaycan tarixində əlamətdar hadisə hesab edilir. Çünki builki seçkilər ilk dəfə bütöv və suveren Azərbaycanı əhatə edəcək. Təsadüfi deyil ki, fevralın 7-də keçiriləcək seçkiləri həm də “Zəfər seçkiləri” adlandırırlar. Həmin gün biz Şuşaya, Laçına, Kəlbəcərə, Xankəndiyə, Füzuliyə, Cəbrayıla, Zəngilana və digər azadlığa qovuşmuş ərazilərimizin səsinə səs verəcəyik. Bu qədim yurd yerlərimizi özümüzünküləşdirəcəyik.
İşğaldan azad edilmiş ərazilərimizdə artıq 26 seçki məntəqəsi yaradılıb. 122 saylı Seçki Dairəsinin 14 saylı məntəqəsi isə Xankəndi şəhərinin mərkəzindəki inzibati binada yerləşir. O bina ki, qondarma qurumun “parlament binası” sayılırdı. Xankəndi şəhəri 2023-cü ilin sentyabrında bir günlük antiterror tədbirləri zamanı yenilməz Ordumuz tərəfindən separatçılardan təmizləndikdən sonra, hazırda bu tikilidə Azərbaycanın Bayrağı dalğalanır.
Xankəndi sakini kimi sevincim yerə-göyə sığmır. Nəhayət, 30 illik həsrətdən sonra doğma torpaqlarımızda seçinc-sevincə, şənlik-şənliyə qarışıb. Əsil şənlik, toy-bayram isə Prezident seçkiləridir. Axı, bu seçkilərdə ölkəmizin gələcək taleyi həll olunur. Biz elə namizədə səs verməliyik ki, son illər Azərbaycanın dünya birliyindən eşidilən sədasını daha da gur etsin. Bir vaxtlar separatçı rejimin Xankəndidə keçirdiyi dünyanın heç bir ölkəsi və beynəlxalq təşkilatı tərəfindən tanınmayan qeyri-qanuni seçkiləri indi ədalətli, demokratik, azad, şəffaf Azərbaycan Prezidentliyinə seçkilər əvəzləyəcək. Bir sıra beynəlxalq təşkilatların müşahidəçiləri bəri başdan bəyan edirlər ki, onlar işğaldan azad edilmiş Qarabağ və Şərqi Zəngəzurda keçiriləcək seçkiləri müşahidə edəcəklər. Bu, o deməkdir ki, artıq dünya birliyi Azərbaycanın ərazi bütövlüyünü tanıyır və qəbul edir.
Bəli, hazırda ölkəmizin hər yerində olduğu kimi, işğaldan azad edilmiş ərazilərimizdə növbədənkənar Prezident seçkilərinə ciddi hazırlıq işləri görülür. Seçki məntəqələri yeni tikilmiş binalarda yerləşir. İndi həmin ərazilərdə məskunlaşanlar böyük seçinc və qürurla növbədənkənar prezident seçkilərinin keçiriləcəyi günü səbrsizliklə gözləyirlər, hamılıqla səfərbər olublar. Bu, həm Ermənistan, həm də onun havadarlarına, xüsusilə, Fransa kimi qatı ermənipərəst, antidemokratik, ağa qara deyən bir dövlətə göz dağıdır.
Azərbaycanın bütün ərazisində keçiriləcək növbədənkənar Prezident seçkiləri müstəqillik tariximizdə yeni iz qoyacaq. Bu izin üzərində qürurla, mətinlə addımlayacağıq. Fevralın 7-də seçki coşğusu, əhalinin əhval-ruhiyyəsi, sevinci bütün dünyaya bəyan olacaq. Otuz ildən sonra doğma ata-baba yurdumuza qayıdırıq. Ən böyük hədiyyəmiz də doğma torpaqlarımızda keçirilən seçkilərdə iştirak etməyimizdir.
44 günlük Vətən müharibəsindən start götürən və Qarabağda keçirilən antiterror tədbirlərindən sonra davam etdirilən birlik marafonu seçki marafonunda müşahidə ediləcək. Ölkəmizin bütün ərazisində hər kəsin sifətində təbəssüm, gözlərində sevgi qürurla, alnıaçıq, üzüağ seçki məntəqələrinə yollanacaq və ən layiqli namizədə səs verəcəklər. İşğaldan azad edilmiş ərazilərdə məskunlaşanların hər biri onlar üçün yaradılmış şəraiti, hazırda göz oxşayan yenidənqurma, tikinti-bərpa işlərinin sürətlə davam etdirildiyini görür və gələcəyə böyük inamla, ümidlə baxırlar. Bütün bunlardan sonra mən də daxil olmaqla, keçmiş məcburi köçkün soydaşlarımız səsvermə məntəqələrinə gedəcək. Bu gün elə keçmiş məcburi köçkün soydaşlarımız var ki, müəyyən səbəblər üzündən qardaş Türkiyədə yaşayırdılar. Hazırda onlar doğma ata-baba yurdlarına qayıdıblar və səsvermədə iştiraka hazırlaşırlar.
Qürurverici haldır ki, hətta beynəlxalq təşkilatlar da öz tədbirlərini işğaldan azad edilmiş ərazilərdə - Şuşada keçirirlər. Ancaq Suqovşanda beynəlxalq miqyaslı idman tədbirinin, Xankəndidə möhtəşəm hərbi paradın, ardınca bu il fevralın 7-də növbədənkənar Prezident seçkilərinin keçirilməsi demokratiyadan, azadlıqdan, haqq-ədalətdən dəm vuran bəzi dövlətləri və beynəlxalq təşkilatları ciddi narahat edir. Elə AŞPA-nın qış sessiyasında Azərbaycana qarşı haqsızlıq da bunun bariz nümunəsidir. Əlbəttə, bütün bu ədalətsizliklər, haqsızlıqlar, qarayaxmalar Azərbaycanı tutduğu yoldan döndərə bilməz. Çünki yolumuz haqq yoludur.
Sonda bir daha vurğulayım ki, Azərbaycanın bütün ərazisində keçiriləcək növbədənkənar Prezident seçkiləri tariximizə birlik, bərabərlik və bütövlük seçkisi kimi düşəcək. Bununla da hər bir kəs ölkəmizin yeni tarixi mərhələyə qədəm qoymasına töhfə verəcək. Bu, otuz il ərzində ölkəmizə qarşı ikili standartlardan əl çəkməyən, işğalçını öz adı ilə çağıra bilməyən, ədalətsizlik edən bəzi dövlətlər və beynəlxalq təşkilatlar üçün də əsil dərs olacaq.
Havva MƏMMƏDOVA,
Azərbaycan Respublikasının Prezidenti yanında
Dövlət İdarəçilik Akademiyasının professoru, tarix elmləri doktoru