Artıq rusiyalı politoloqlar da Azərbaycana qarşı təzyiqlərə cavab verirlər
Fransa artıq təkcə Azərbaycanı deyil, bütün ətrafını bezdirib. Hətta rusiyalı politoloqlar da zaman-zaman bu ölkənin populist siyasi bəyanatlarından və yersiz addımlarından təngə gəliblər. Yanvarın 17-də Fransa Senatının Azərbaycan əleyhinə qəbul etdiyi növbəti qətnamə Bakıda olduğu kimi, Moskvada da etirazla qarşılanıb.
Moskva Dövlət Beynəlxalq Münasibətlər İnstitutu Beynəlxalq Araşdırmalar Mərkəzinin aparıcı elmi işçisi Sergey Markedonov özünün “Teleqram” kanalında Fransa Senatının Azərbaycanla bağlı qətnaməsini pisləyib. O, “Fransanın Qafqaz geosiyasi optikası” başlıqlı yazısında bildirib ki, yanvarın 17-də Senat (Fransa parlamentinin yuxarı palatası) Azərbaycanla bağlı sərt qətnamə qəbul edib. Vurğulayıb ki, sənədin müəllifləri Ermənistanın ərazi bütövlüyünü dəstəkləməklə yanaşı, həm də öz hökumətlərini və Avropa İttifaqındakı (Aİ) tərəfdaş ölkələri Bakıya qarşı sanksiyaların tətbiqinə çağırıblar.
Markedonov bu qətnamənin təkcə Azərbaycan üçün deyil, elə Rusiyanın özü üçün də gözlənilməz olmadığını yazıb: “Bu təşəbbüs, təbii ki, sürpriz olmadı. Birincisi, bu gün Bakı ilə Paris arasında münasibətlər SSRİ-nin dağılmasından sonrakı bütün dövr ərzində bəlkə də ən aşağı nöqtədədir. İkincisi, Fransa “ermənipərəstliyi” ilə tanınır”.
Rusiyalı politoloq durumun səbəblərini də izah edir. Bildirir ki, Fransanın ərazisində böyük erməni diasporu yaşayır, onların sayı 350-500 min nəfərdir. Bu, Rusiya və ABŞ-dan sonra dünyada üçüncü, Aİ-də isə ən böyük erməni diasporudur. Ən böyük icmalar Paris, Lion və Marseldə qeydə alınıb. İrəvanın maraqlarının məşhur lobbiçisi Valeri Boyer, hətta, Marsel merinin müavini olub. Markedonov, eyni zamanda, Fransanın erməni mənşəli tanınmış vətəndaşlarının da adlarını xatırladır. Erməni tarixi ilə bağlı Fransada meydana çıxmış kino, ədəbiyyat və incəsənət nümunələrini isə Markedonov “hekayələr” (XX əsrin əvvəllərindəki “faciə” də daxil olmaqla) adlandırır və bu hekayələrin ölkədə geniş şəkildə təqdir olunduğunu diqqətə çatdırır.
Göründüyü kimi, rusiyalı politoloq tamamilə haqlıdır. Hesab edirik ki, ermənilərin, təxminən, yarım əsrdən bəri əlindən tutub gəzdirdikləri qondarma “erməni soyqırımı” iddialarının gülüş və ironiya obyekti olduğu artıq bütün dünyaya, elə ABŞ-ın özünə də yaxşı məlumdur. Bu iddialar hər yerdə hekayə, nağıl kimi qəbul edilir. Sadəcə, bəzi ölkələr arqumentlərində bu erməni pazlından Türkiyə və Türk dünyasına qarşı siyasi alət kimi yararlanırlar. Elə Markedonovun bildirdikləri də bunun təsdiqidir.
Rusiyalı ekspertin fikrincə, erməni lobbi təşkilatları ənənəvi olaraq fəaldırlar (məsələn, Erməni Məsələsi üzrə Komitə, Erməni Diasporunun Araşdırma Mərkəzi). Onlar tarixi və tarixi-hüquqi mövzulara həddindən artıq diqqət yetirirlər. Fransa parlamenti 2000-ci ildə Osmanlı imperiyasındakı hadisələri “erməni soyqırımı” kimi tanıyıb və prezident Jak Şirak 2001-ci ildə müvafiq qanunu imzalayıb.
Politoloq bildirir ki, 2020-ci ildən 2024-cü ilə qədər olan dövrdə Fransa Senatı nəinki Ermənistanı dəstəkləyən və Azərbaycanı pisləyən (17 yanvar 2024-cü il, 15 noyabr 2022-ci il, 25 noyabr 2020-ci il), hətta separatçı keçmiş “Dağlıq Qarabağ Respublikası”nın tanınmasını tələb edən, ən azı, 3 qətnamə çıxarıb. Bununla yanaşı, Markedonov yazır: “Düzdür, bir nüans var. 2022-ci ilin noyabrında Senatın qətnaməsinin qəbulundan sonra Paris Bakıya məhdudiyyət qoymayıb. Üstəlik, Beşinci Respublikanın Xarici İşlər Nazirliyi “DQR”in tanınması ilə razılaşmayacağını dəfələrlə vurğulayıb və buna getməyib... SSRİ-nin dağılmasından sonrakı bütün dövr ərzində Parisin Bakı ilə praqmatik münasibətlər qurmağa cəhd etmədiyini söyləmək olmaz. Üstəlik, Azərbaycan tərəfinin özü də bunda maraqlı olub (heç nəyə baxmayaraq, bu mövqeyində qalır). Mövcud kontekstdə nəzərə almaq lazımdır ki, Heydər Əliyev Fransa Prezidenti Jak Şirakla dialoqun qurulmasında çox işlər görüb, oğlu İlham Əliyev onu əvəzlədikdən sonra prezident kimi ilk xarici səfərini 2004-cü ilin yanvarında Parisə edib. Lakin Qarabağ məsələsi hər dəfə Fransa və Azərbaycanı bir-birindən uzaqlaşdırıb”.
Bütün bunlarla yanaşı, Markedonov hesab edir ki, Parisin Zaqafqaziya ilə bağlı siyasətində Aralıq dənizi istiqamətində Fransanın mühüm rəqibi olan Türkiyə ilə əlaqələr xüsusi önəm daşıyır: “Bu gün Qarabağ istiqamətində Fransa Avrasiyada türk hücumunun növbəti təzahürünü (Azərbaycan da bu tendensiyanın bir hissəsi kimi qəbul edilir) görür və bu, ölkənin regionda proseslərin necə inkişaf etməli olduğuna dair fikirlərinə uyğun gəlmir. Amma tək Türkiyə deyil. Paris “vahid Avropa”nın lideri kimi Almaniyanı da sıxışdırmağa çalışır. Qafqazda “rus hegemonluğu” ilə mübarizə, Ukraynaya dəstək də bu tapmacanın bir hissəsidir”.
Doğrudur, Markedonov Fransa Senatının Azərbaycanı öz Silahlı Qüvvələrini “suveren Ermənistan ərazisindən” geri çəkmək və onun ərazi bütövlüyünə hörmət etmək tələbi üzərində çox dayanmayıb. Amma onsuz da bu tələbin, tamamilə, yersiz olduğu aydındır. Bu gün ətrafda hamıya məlumdur ki, Azərbaycan Ermənistan ərazilərini işğal etməyib və bu fikirdə deyil. Bunu Prezident İlham Əliyev də dəfələrlə bəyan edib. Amma tarixi Azərbaycan ərazilərində oturmuş ermənilərin içində bir qorxu var. Qorxurlar ki, qalib və müzəffər Azərbaycan bir gün qalxıb tarixi torpaqlarını tələb edə bilər. Ona görə də qorxularından Fransanı qabağa veriblər. Azərbaycan Respublikasının Milli Məclisi isə Fransanın qətnaməsinə kəskin reaksiya verib. Görünən budur ki, Fransa özü üçün yenidən ciddi başağrısı yaradacaq.
Paşa ƏMİRCANOV
XQ