Qriqoryanın “Ukrayna sülh formulu” üzrə görüşdə iştirakı bunun göstəricisidir
Ermənistan hökuməti anti-Rusiya istiqamətində addımlar atmaq siyasətini davam etdirir. Ölkənin təhlükəsizlik şurasının katibi Armen Qriqoryanın “Ukrayna sülh formulu”nda iştirak etmək üçün İsveçrə Konfederasiyasına işgüzar səfəri bunun daha bir göstəricisidir. Təhlükəsizlik şurasının ofisi bildirib ki, Armen Qriqoryan yanvarın 14-də “Ukrayna sülh formulu”nun Davos şəhərində keçiriləcək sayca dördüncü iclasına qatılacaq.
Məlumat üçün bildirək ki, “Ukrayna sülh formulu” üzrə ilk görüş 2023-cü il iyunun 25-də Kopenhagendə keçirilib. İkinci görüş avqustun 5-6-da Ciddədə, üçüncü isə oktyabrın 28-də Maltada baş tutub. Dünya İqtisadi Forumu çərçivəsində keçiriləcək budəfəki görüşdə 80-dən çox nümayəndə heyətinin iştirakı nəzərdə tutulub. İclas dövlət və hökumət başçılarının milli təhlükəsizlik məsələləri üzrə müşavirləri səviyyəsində keçiriləcək. Bu zaman Prezident Vladimir Zelenskinin Ukraynada davamlı sülhə nail olmaq üçün 2023-cü ilin əvvəlində təklif etdiyi 10 əsas prinsipdən ibarət sülh formulu müzakirə olunacaq. Həmin sülh formulu Rusiya qoşunlarının Ukraynadan çıxarılmasını, 1991-ci il sərhədlərinə qayıtmasını, təzminat ödənişlərini, nüvə, ərzaq və ekoloji təhlükəsizliyin təmin edilməsini nəzərdə tutur.
İsveçrə Xarici İşlər Nazirliyindən verilən məlumata görə, sülh formulu görüş zamanı əsas diqqət mərkəzində olacaq. Davos görüşünün əvvəlki iclaslardakı nəticələri nümayiş etdirməsi və gələcək addımların müzakirəsinə zəmin yaratması gözlənilir.
Ermənistan ikinci dəfədir ki, Ukrayna üzrə görüşdə iştirak edir. Maltadakı görüşdə də İrəvanı A.Qriqoryan təmsil etmişdi. Nikol Paşinyanın komandasının əsasən Qərbpərəstlərdən təşkil olunması heç kəsə sirr deyil. Qriqoryan isə qatı Qərbpərəstliyi ilə komanda yoldaşlarından fərqlənir.
Əlbəttə, Rusiya və Ukrayna arasında davam edən müharibəyə necə yanaşmaq hər bir dövlətin özünün daxili işidir. Amma məsələ ondadır ki, Rusiya və Ermənistan strateji tərəfdaşdır. Münasibətləri strateji tərəfdaşlıq səviyyəsinə qaldıran ikitərəfli sənədlər var. Hər iki ölkə bir sıra regional təşkilatlarda təmsil olunur. Ermənistan Rusiya ilə Avrasiya İqtisadi İttifaqı çərçivəsində iqtisadi, Kollektiv Təhlükəsizlik Müqaviləsi Təşkilatı çərçivəsində isə hərbi əməkdaşlıq edir. Ermənistan ərazisində Rusiyanın hərbi hissəsi yerləşir. Onun dövlət sərhədlərinin təhlükəsizliyini Rusiya Federal Təhlükəsizlik Xidmətinin sərhəd qoşunları təmin edir. Bütün bunlar Ermənistanın Rusiya–Ukrayna müharibəsində Moskvanı dəstəkləməsini, onunla birgə hərəkət etməsini şərtləndirən səbəblərdir. Ancaq biz bunun əksini müşahidə etməkdəyik. İrəvanın bu siyasəti ekspertlər tərəfindən haqlı olaraq, “eyni vaxtda iki stulda oturmaq” siyasəti adlandırılır.
Paşinyan iqtidarı əvvəllər də, yəni, hakimiyyətə gəldiyi 2018-ci ildən etibarən Rusiyaya, necə deyərlər, arxadan zərbə vurur, Qərblə əməkdaşlığı genişləndirirdi. Ölkədə yerləşən ABŞ biolaboratoriyalarının sayını artırırdı. Hələ 2022-ci ilin aprelində politoloq, “Xalqın səsi” ekspert klubunun üzvü Arman Qukasyan Ermənistanda 12 ABŞ biolaboratoriyasının olduğunu bildirmişdi. Birləşmiş Ştatlar iddia edir ki, bu qurumların məqsədi kənd təsərrüfatı ilə əlaqəlidir. Ancaq bu laboratoriyaların ikili funksiya daşıdığı məlumdur, çünki onlar hərbçilər tərəfindən maliyyələşdirilir və fəaliyyəti son dərəcə məxfi saxlanılır. Bu isə həmin müəssisələrin bioloji silah hazırladığına dair fikirlərin meydana çıxmasına səbəb olub.
Bu da faktır ki, ABŞ-ın dünyadakı ikinci (Almaniyadan sonra) ən böyük səfirliyi məhz Ermənistanda yerləşir. Hələ 2005-ci ildə açılış mərasimi keçirilən səfirlik 90 min kvadratmetr, yaxud 9 hektar ərazini tutur. Qeyd etdiyimiz kimi, bu, ABŞ Dövlət Departamentinin xaricdəki ikinci ən böyük torpaq mülkiyyətidir. Ekspertlər bunu Vaşinqtonun Ermənistandakı niyyətlərinin ciddiliyinin simvolu hesab edirlər. Beləliklə, aydın olur ki, əslində, Ermənistanın Paşinyandan öncəki rəhbərləri də sözdə Rusiya ilə müttəfiqlikdən danışsalar da, necə deyərlər, əl altından amerikalılarla iş görüblər. Sadəcə, Rusiyanın siyasi nüfuzunun yüksək olması, iqtisadi və hərbi qüdrəti haylar üçün çəkindirici amil olub.
Ancaq Rusiyanın Ukrayna ilə müharibədə istədiyi uğuru qazana bilməməsi, Qərbin bu məsələdə yekdil mövqe nümayiş etdirməsi İrəvanın da öz mövqeyini açıq ortaya qoymasına gətirib çıxardı. Fikir versək, görərik ki, Ermənistan Rusiya–Ukrayna müharibəsinin başladığı 2022-ci ildə susqunluq nümayiş etdirdi. Hayların açıq demarşları isə özünü əsasən 2023-cü ildə, yəni Rusiyanın Ukraynada, necə deyərlər, bataqlığa düşdüyü, SSRİ-nin Əfqanıstandakı vəziyyətinə bənzər durumla üzləşdiyi aydın olandan sonra göstərməyə başladı.
Ermənistan baş naziri Nikol Paşinyan mayın əvvəlində Çexiyaya rəsmi səfəri zamanı “CNN Prima News” telekanalına verdiyi müsahibədə ilk dəfə olaraq, Ukrayna ilə müharibədə Rusiyanın müttəfiqi olmadıqlarını açıqladı. Bildirdi ki, bu fikir heç vaxt yüksək səslə deyilməyib: “Biz Ukrayna ilə müharibədə Rusiyanın müttəfiqi deyilik. Bizim o müharibədən duyduğumuz hiss narahatlıq hissidir, çünki bütün münasibətlərimizə birbaşa təsir edir. Qərbdə bizi Rusiyanın müttəfiqi kimi qəbul edirlər. Rusiyada isə Ukrayna müharibəsində Moskvanın müttəfiqi olmadığımızı görürlər. Belə çıxır ki, biz bu vəziyyətdə heç kimin müttəfiqi deyilik”.
Bu kontekstdə N.Paşinyanın həyat yoldaşı Anna Akopyanın keçən il sentyabr ayında Kiyevdə keçirilən görüşə qatılması da nəzərdən qaçmamalıdır. Həmin hadisə Rusiyada etirazla qarşılanmışdı.
İl ərzində Qarabağ iqtisadi rayonunun erməni azlığın yaşadığı hissəsi ilə bağlı baş verən proseslər də Ermənistanın Rusiya ilə bağlı mövqeyinin daha da kəskinləşməsinə səbəb oldu. 2023-cü il dekabrın 11-də Ermənistanın xarici işlər naziri Ararat Mirzoyan Brüsseldə Ukraynanın xarici işlər naziri Dmitri Kuleba ilə görüşdü. Görüşlə bağlı Ermənistan XİN-in bəyanatında həmsöhbətlərin qarşılıqlı maraq doğuran məsələlər, eləcə də Cənubi Qafqazdakı regional problemlər üzrə ikitərəfli əməkdaşlıq haqqında fikir mübadiləsi apardıqları bildirildi.
Bundan sonra N.Paşinyan Rusiyanın aparıcı rol oynadığı MDB-nin Bişkekdə, KTMT-nin isə Minskdə keçirilən sammitlərinə qatılmaqdan imtina etdi. İlin sonunda isə sanki öz fikrini dəyişərək, dekabrın 25-də Avrasiya İqtisadi İttifaqının Sankt-Peterburqda keçirilən iclasına, dekabrın 26-də isə həmin şəhərdə MDB dövlət başçılarının qeyri-rəsmi görüşünə qatıldı. Ancaq görünən odur ki, rəsmi İrəvan Rusiyadan uzaqlaşmaqla bağlı əvvəlki siyasətinə sadiqdir. Nikolun Ukrayna ilə bağlı Davosda keçirilən görüşə təhlükəsizlik şurasının katibini göndərməsi bunun göstəricisidir.
İlyas HÜSEYNOV,
politoloq
– Ermənistanın siyasi rəhbərliyi Rusiyaya qarşı addımlarını gücləndirir və artıq bunu gizlədə bilmirlər. Paşinyan komandasının üzvləri Ukraynanın gücləndirilməsi ilə bağlı müxtəlif tədbirlərdə iştirak edirlər. Davosda keçirilən tədbir də bu baxımdan istisna deyil. Bu, onu göstərir ki, Ermənistan Rusiyadan uzaqlaşmaqla bağlı tutduğu geosiyasi kursundan geri dönmür və bu yolda israrlıdır. Baxmayaraq ki, Paşinyan MDB dövlət başçılarının ötən ilin sonunda Sankt-Peterburqda keçirilən qeyri-rəsmi görüşünə qatılmışdı. Bir sıra ekspertlər həmin vaxt qeyd edirdilər ki, İrəvan seçimini dəyişir, yaxud artıq Rusiyameyilli siyasət yürüdəcək. Mən əvvəldən qeyd edirdim ki, bu cür düşüncələr yanlışdır. Bir səfərlə Ermənistan öz geosiyasi mövqeyini dəyişməyəcək. Sankt-Peterburqa səfər həm də ona görə həyata keçirilmişdi ki, 2024-cü il yanvarın 1-dən Ermənistan Respublikası Avrasiya İqtisadi İttifaqına sədrliyi Rusiyadan təhvil alırdı. Həmin təşkilatda iştirak isə Ermənistan üçün çox önəmlidir və iqtisadiyyatına mühüm fayda verir.
Bu xüsusda biz görürük ki, Ermənistan Ukrayna ilə bağlı qlobal səviyyəli hər bir tədbirdə iştirak etməyə çalışır. Artıq dördüncü dəfə keçiriləcək “Ukrayna sülh formulu”nda da biz erməni rəsmilərini görəcəyik. Rusiyanın buna reaksiyası gecikir, bəzi hallarda isə heç müşahidə olunmur. Rusiyalı ekspertlər bunu belə əsaslandırırlar ki, Ermənistana ayırmağa vaxtımız yoxdur, biz daha çox müharibənin gedişatı ilə və cəbhədə üstünlüyü ələ almaqla məşğuluq. Amma fakt faktlığında qalır ki, hətta, müharibə bu gün bitsə, razılıq əldə olunsa, sülh müqaviləsi imzalansa, Rusiya artıq Ermənistanın, necə deyərlər, iç üzünü müəyyən edib. Bilir ki, haylar istənilən halda xəyanət edə bilərlər, istənilən halda dəyişiklik arzusundadırlar və sadiqliyi ilə seçilməyən bir dövlət və komanda hazırda Rusiyanın müttəfiqi statusundadır. Amma əvvəlki dövrlərdən fərqli olaraq, Rusiya tərəfindən Ermənistana qarşı hər hansı radikal addımların atılması da gözlənilmir.
Zaur MƏMMƏDOV,
Bakı Politoloqlar Klubunun rəhbəri
– Ermənistan rəsmilərinin bu tədbirdə iştirakı ilk dəfə deyil. Bununla onlar kimin yanında olduqlarını göstərmiş olurlar. Nikol Paşinyan özünü daha çox Qərbin adamı kimi aparır. Qərbdəki siyasi qruplar Ermənistanı mövqeyini konkret bildirməyə sövq edirlər. Paşinyanın və komandasının addımları da bunun göstəricisidir. Təbii ki, həmin addımların Ermənistanın lehinə və əleyhinə olan tərəfləri var. Brüssel, Vaşinqton və Qərbdəki ayrı-ayrı paytaxtlar bununla İrəvanı özlərinə daha yaxın görürlər. Ancaq bu zaman Rusiya–Ermənistan münasibətləri pisləşir.
Eyni zamanda, Paşinyan bir tərəfdən ictimaiyyətə Qərbin yanında olduğunu göstərirsə, Ermənistanın iqtisadi baxımdan Rusiya ilə sıx bağlı olduğu görünür. Xüsusilə Qərbin sanksiyaları fonunda Ermənistanla Rusiya arasında əməkdaşlıq güclənib. Əgər belə olmasaydı, yəni Moskva tam narazı olsaydı, biz Rusiyanın Ermənistana satdığı təbii qazla, digər iqtisadi məsələlərlə bağlı daha konkret mövqeyini görə bilərdik. Odur ki, Ukrayna ilə bağlı keçirilən görüşlərdə Ermənistanın iştirakı artıq Rusiya tərəfindən qəbul edilib. İrəvan eyni vaxtda iki stulda əyləşməklə hansısa məqsədlərinə çatmaq istəyir. Ancaq əlbəttə, bu, sonadək davam edə bilməz. Bununla Paşinyan Ermənistan dövlətçiliyini ciddi risklər altında qoyur. Geosiyasi güclər arasındakı kobud manevrlərin bu və ya digər ölkələri hansı vəziyyətə saldığını unutmaq olmaz.
Səxavət HƏMİD
XQ