ABŞ-ın daha bir media qurumu Zəngəzur dəhlizi mövzusunda manipulyasiya edir

Azərbaycanın 44 günlük Vətən müharibəsi dövründə Qərbin əksər iri media qurumla­rının qərəzi, böhtan və təxribatları ilə üz-üzə qaldığı hamının yaxşı yadındadır. BBC, “Reuters”, “Guardian” tərəfindən, guya, Suriyadan Azərbaycana muzdlu hərbçilərin gətirilməsi barədə uydurma və heç bir tutarlı mənbələrə əsaslanmayan xəbərlər ya­yılırdı. Əslində, bunun yaddaşlardan silinməsi mümkün də deyil. Həm də ona görə ki, həmin media qurumları Vətən müharibəsindən ötən dövrdə yaramaz əməllərini davam etdirərək, əvvəlkilərin yaddan çıxmasına imkan vermirlər.

Ordumuzun sentyabrın 19–20-də Qarabağın erməni separatçılarının nə­zarətində olan hissəsində keçirdiyi lokal xarakterli antiterror tədbirləri, suverenli­yimizi bütün ölkə ərazisində bərqərar etməyimiz, qondarma “dqr”in ləğvi, re­inteqrasiya planını qəbul etməyən er­məni əhalinin öz xoşu ilə Ermənistana köç etməsi, nəhayət, Xankəndidə və separatçıların nəzarətində olan digər ərazilərdə Dövlət Bayrağımızın ucaldıl­ması Qərbin ermənipərəst mediasının Azərbaycana qarşı, necə deyərlər, ikin­ci cəbhə açmasına səbəb olub. Özünə müstəqil deyən Qərb mediası Azər­baycana qarşı təbliğatda alətə çevrilib. Onlar son proseslərlə bağlı birtərəfli və qərəzli məlumatlar yayaraq auditoriya­nı məqsədli şəkildə yanlış istiqamətə yönəldirlər.

Qarayaxma kampaniyasının ba­şında müharibə dövründə olduğu kimi, yenə də Fransa mediası dayanır. “Le Figaro”, “Le Monde”, “Liberation”, “Le Parisien” qəzetləri, “Frans-Press” agentliyi, “TF1” və “France 2” televi­ziya kanalları öz amplualarındadır. Bu, əməkdaşlarının (“Le Monde”nin əməkdaşları Şarl Rafael və Alan Kaval nəzərdə tutulur – S.H.) yaralanması­na görə şou düzəldən həmin fransız mediasıdır. Halbuki, həmin jurnalistlər Ermənistan tərəfdən keçməklə qey­ri-qanuni olaraq Azərbaycanın işğal olunmuş ərazisinə gəlmişdilər. Odur ki, onların yaralanmasının məsuliyyətini də Ermənistan və aid olduqları qəzetin redaksiyası daşıyırdı. Ancaq fransızlar məlum hadisədən öz maraqları üçün yararlanmağa çalışdılar.

Qeyd etdiyimiz kimi, Azərbaycanın Vətən müharibəsindən sonra yeni-ye­ni qələbələr, uğurlar əldə etməsi Qərb mediasında böhtanların, qərəzin və qa­rayaxmanın dərəcəsinin də artmasına səbəb olub. Məsələyə Prezident İlham Əliyev də münasibət bildirib. Oktyabrın 11-də MDB-yə üzv ölkələrin təhlükəsiz­lik və xüsusi xidmət orqanları rəhbərləri şurasının 53-cü iclasının iştirakçılarının qəbulu zamanı etdiyi çıxışında dövləti­mizin başçısı deyib: “Azərbaycan həm işğal müddətində, həm İkinci Qarabağ müharibəsində, həm də antiterror təd­birləri zamanı bütün humanitar norma­lara riayət edib. Beynəlxalq ekspertlər bunun şahididirlər. Yeri gəlmişkən, bu yaxınlarda azad edilmiş ərazilərdə səfərdə olan BMT missiyası dünən və bundan, təxminən, bir həftə əvvəl artıq iki dəfə məhz bunu vurğulayıb ki, bütün humanitar normalara əməl olunub. Bu­nunla belə, Qərbdəki erməni havadar­ları Azərbaycana qarşı iyrənc təxribata və yalançı kampaniyaya əl ataraq hər şeydə bizi ittiham edirlər”.

Prezident İlham Əliyev qeyd edib ki, burada əsas “skripkanı çalan” Fran­sadır və bu, həm sözügedən ölkənin rəsmi şəxslərinin bəyanatlarında, həm Azərbaycanın diskreditasiya edilməsi (gözdən, nüfuzdan salınması – S.H.) cəhdlərində, həm də Azərbaycana qar­şı aparılan və hər şeyin alt-üst şəkildə təqdim edildiyi media kampaniyasında özünü büruzə verir. Azərbaycan işğalçı kimi təqdim edilir, Ermənistan isə qur­ban kimi qələmə verilir. Otuz illik işğalın tarixi, bütün şəhər və kəndlərimizin yer­lə-yeksan edilməsi, Xocalı soyqırımı – bütün bunların hamısı, təbii ki, inkar edilir, tamamilə yalanla dolu hekayələr uydurulur: “Lakin yeri gəlmişkən, onu da deməliyəm ki, elə dünən mənə bir videosüjet təqdim etdilər. Həmin video­da ABŞ prezidentliyinə namizəd Azər­baycana qarşı ittihamlarla çıxış edir və bu zaman ermənilər tərəfindən Gəncə şəhərinin raket atəşinə tutulması ilə bağlı kadrları nümayiş etdirir. Belə sax­takarlığa və həyasızlığa yol verəcək qədər simasızlaşmaq qeyri-mümkün­dür. İkinci Qarabağ müharibəsi zamanı Ermənistan münaqişə zonasından yüz kilometrlərlə uzaqda yerləşən şəhərlə­rimizi uzaqmənzilli raketlərlə, o cümlə­dən ballistik raketlərlə atəşə tutdu. Bu­nun nəticəsində bizim uşaqlar da daxil olmaqla, yüzdən artıq mülki vətənda­şımız həyatını itirdi. Məhz sözügedən həmin namizəd, Azərbaycanı ittiham edərək, ermənilərin Gəncəyə və Bər­dəyə hücumlarının kadrlarını nümayiş etdirir”.

Dövlətimizin başçısı “indi bu insan­larla necə danışmaq, onlara nəyi izah etmək olar?”, – deyə sual verib. Əlavə edib ki, onlar heç nə eşitmək istəmir­lər: “Onlar mərkəzdən verilən təlimata uyğun hərəkət edirlər. Ona görə də biz indi Azərbaycana qarşı aparılan misli görünməmiş informasiya müharibə­si ilə üz-üzə qalmışıq. Biz, əlbəttə, öz gücümüzlə buna müqavimət göstəririk, baş verənlərlə bağlı həqiqətləri çat­dırmağa çalışırıq və çatdırırıq. Ancaq başa düşmək lazımdır ki, güclər qey­ri-bərabərdir. Çoxillik müstəmləkəçilik tarixinə malik Fransa kimi ölkələrin dünya üzrə media resursları bizdə­kindən qat-qat çoxdur. Lakin bununla belə, biz müxtəlif platformalardan və beynəlxalq təşkilatlardan, habelə di­gər formalardan istifadə edərək, baş verənlər barədə həqiqətləri çatdırırıq və bundan sonra da çatdıracağıq”.

Onu da qeyd edək ki, Prezident İlham Əliyevin Vətən müharibəsi gün­lərində xarici media orqanlarına verdi­yi müsahibələr ölkəmizin mövqeyinin beynəlxalq ictimaiyyətə çatdırılması baxımından müstəsna əhəmiyyətə malik idi. Məhz həmin müsahibələr in­formasiya müharibəsində, necə deyər­lər, cəbhənin yarılmasında mühüm rol oynayıb.

***

Azərbaycana yönələn ittihamlardan biri də ölkəmizin, guya, Ermənistanın beynəlxalq birlik tərəfindən tanınmış ərazisinə hücum edəcəyi ilə bağlı­dır. ABŞ-ın “Politico National Security Daily” qəzetinin “Azərbaycan yaxın həftələrdə Ermənistana hərbi müdaxilə edə bilər” sərlövhəli məqaləsinin ardın­ca bu ölkənin daha bir nüfuzlu media qurumu oxşar məzmunda yazı dərc edib. Söhbət “Vaşinqton Post” qəze­tində dərc olunmuş “Azərbaycan Qara­bağdan sonra Ermənistanın strateji zo­lağına göz dikib” sərlövhəli məqalədən gedir. Qəzetin əməkdaşı Françeska Ebel Zəngəzur dəhlizi üzərində dəmir yolu stansiyası olan Mehridə (Meğri) olaraq buradan reportaj hazırlayıb. Bil­dirilir ki, Mehri strateji yolayrıcındadır. Azərbaycan, İran, Türkiyə və Rusiya da daxil olmaqla regional güclərin bura giriş üçün yarışması Mehrinin tezliklə özünü yeni müharibənin mərkəzində tapa biləcəyi qorxusunu artırır. Qeyd edilir ki, Azərbaycan Ermənistanın Sü­nik (Zəngəzur) vilayətinin Mehri və di­gər rayonlarını Zəngəzur dəhlizi adlan­dırır. Qarabağ məsələsinin həllindən sonra dəhlizin açılması Azərbaycanın diqqət mərkəzində olan əsas məsələ­dir. Yazıda Zəngəzur dəhlizinin Çin və Mərkəzi Asiya ölkələrini Azərbaycan üzərindən Türkiyə ilə birləşdirəcək uzun, son dərəcə sərfəli Şərq–Qərb marşrutunun və ya Orta Dəhlizin so­nuncu halqası olduğu bildirilir.

Alman Xarici Əlaqələr Şurasının Cənubi Qafqaz üzrə eksperti Stefan Meister deyib: “Mən hesab edirəm ki, zorakılıq təhlükəsi çox realdır. Azər­baycanlılar Zəngəzuru götürmək istəsələr, götürəcəklər”.

Karnegi Fondunun baş tədqiqatçı­sı Tomas de Vaal isə bildirib ki, Şərq-Qərb marşrutu ilə bağlı iki rəqabətli baxış var: “Qərb Ermənistanı dəstək­ləyir, Azərbaycan, Rusiya və Türkiyə isə birlikdə hərəkət edir. Çox güman ki, Bakı və Moskva Ermənistan hökumə­tinə hər cür təzyiq göstərərək, ona öz planlarını qəbul etdirəcəklər”.

Bununla belə, qəzet dəhlizin açıl­masının Ermənistana verəcəyi fayda­lardan da bəhs edib: “Mehri stansiyası­nın bağlanmasına səbəb Azərbaycanla Ermənistan arasında müharibə olub. Ən yaxşı sovet illərində stansiyada 70 işçi işləyirdi. Erməni və azərbaycanlı sakinlər yan-yana yaşayırdılar”.

Qapıları 30 ildir bağlı qalan stan­siyanın direktor müavini Arman Davt­yan onun yenidən açılmasını istədiyi­ni deyib: “Bir dəmiryolçu kimi səmimi fikrim odur ki, bu, Azərbaycanın ma­raqlarından daha çox Ermənistanın maraqlarına uyğundur. Dəmir yolunun işə düşməsi iqtisadiyyatımız üçün çox əhəmiyyətli olacaq. Siyasət tranziti ən­gəlləməməlidir”.

Mehri şəhərinin meri Baqrat Zakar­yan bildirib ki, yerli hakimiyyət köhnə dəmir yolunu yenidən işə salmağa ha­zır olacaq: “Biz bunun zərurətini başa düşürük və bu, bizim üçün də faydalı­dır. Biz bütün dünyaya qarşı çıxa bil­mərik. Əgər biz güzəştə getməsək, in­sanlar bizdən üz döndərəcəklər”. Onun sözlərinə görə, buna baxmayaraq, Er­mənistanın müəyyən təminatlara ehti­yacı var.

“Vaşinqton Post” yazıda Azərbay­canın mövqeyinə bir neçə cümlə yer ayırıb. “Lakin Azərbaycan bu qorxula­rın əsassız olduğunu təkid edir. Ölkə­nin Böyük Britaniyadakı səfiri Elin Süleymanov Azərbaycanın hərbi əmə­liyyatlarından qorxanların “paranoyak yuxu dünyasında” yaşadığını bildirib. O, Azərbaycanın Ermənistan ərazi­sində hərbi məqsədlərinin olmadığını deyib”, – qəzetin məqaləsində bildirilib.

Məqalədə Azərbaycanın mövqe­yinə cəmi bir neçə cümlə yer ayrılması və xüsusilə sərlövhəyə ölkəmizin Er­mənistan ərazisinə göz dikdiyi fikrinin çıxarılması təəssüf doğurur. Azərbay­can dəfələrlə Ermənistanın suveren əraziləri ilə bağlı hər hansı planının olmadığını bəyan edib. Sonuncu dəfə oktyabrın 17-də “Füzuli Şəhəri Günü”n­də Füzuliyə köçmüş sakinlər və rayon ictimaiyyətinin nümayəndələri ilə gö­rüşdə çıxış edən Prezident İlham Əli­yev bu mövzuda deyib: “Bizim başqa ölkələrin torpağında gözümüz yoxdur. Zəngəzura da, əlbəttə ki, qayıdacağıq, amma sülh yolu ilə. Mən demişəm, məni bəziləri ittiham etməyə çalışırlar, mən dedim ki, biz oraya tanklarla yox, minik maşınları ilə qayıdacağıq”. Zən­nimizcə, əlavə şərhə ehtiyac yoxdur.

Aydın QULİYEV, 
“Bakı-Xəbər” qəzetinin baş redaktoru

– Azərbaycana qarşı hazırda beynəlxalq müstəvidə aparılan misli görünməmiş informasiya müharibəsi hüquqi müstəvidə, diplomatik və siyasi arenalarda ölkəmizin hədəf seçilməsi si­yasətinin, demək olar ki, dava­mıdır. Əgər müxtəlif beynəlxalq təşkilatlarda, eləcə də ayrı-ayrı Avropa ölkələrinin parlament­lərində qərəzli müzakirə apa­rılaraq sonda reallığa söykən­məyən qərarlar qəbul olunursa, bunun davamı mütləq şəkildə informasiya savaşı meydanın­da özünü göstərməlidir. Bu mənada, Qərbin müxtəlif media orqanlarında Azərbaycana qarşı hücumların güclənməsi müəy­yən qədər təbii haldır.

Eyni zamanda, informasi­ya müharibəsi heç də səbəbsiz deyil. Bunun belə deyək, cid­di əsasları var. Azərbaycanın Vətən müharibəsi və antiterror tədbirləri nəticəsində ərazi bü­tövlüyünü və suverenliyini tam şəkildə bərpa etməsi, bunu öz gücü hesabına həyata keçirmə­si bəzi ölkələrin xoşuna gəlmə­yib. Azərbaycanın bölgədə yeni reallıqlar yaratması Ermənista­nı və onun müttəfiqlərini bərk narahat edib. Bu gün ölkəmizə qarşı aparılan informasiya mü­haribəsində ortaya o qədər ağ­lasığmaz, fantastik tezislər atılır ki, onları təmkinlə təhlil etmək mümkünsüzdür. Bütün bunlar bir daha onu deməyə əsas verir ki, Azərbaycan düzgün yoldadır. Özünün təhlükəsizliyini və milli mənafelərini həyata keçirmək siyasəti real əsaslara söykənir. Azərbaycana edilən hücumlar əsasən ölkəmizin uğurları ilə bağlıdır. Həmçinin, bütün təz­yiqlərə baxmayaraq, öz mənafe­yini inamla həyata keçirməsinin nəticəsidir.

Səxavət HƏMİD
XQ