Planetimizdə hərbi-siyasi prosesləri uzun onillər boyu nəzarətində saxlayan “Kollektiv Qərb”ə qarşı hazırda yeni böyük güc mərkəzi formalaşır. Bu, Çin, Hindistan, Braziliya, Cənubi Afrika Respublikası, Meksika və digər ölkələrin də daxil olduğu “Qlobal Cənub”dur.
Hər iki ad, əsasən, böyük dövlətlərin yerləşdiyi coğrafi məkana görə adlandırılsa da, ümumən şərtidir. Yəni Cənub yarımkürəsində yerləşən Avstraliya və Yeni Zelandiya “Kollektiv Qərbə” aid olunduğu kimi, Şimal yarımkürəsindəki hər hansı bir ölkə özünü “Qlobal Cənub”un sıralarında görə bilər.
Sual olunur: “Qlobal Cənub” və vaxt və necə yaranıb və hansı iddiaları var? Məlumdur ki, 1991-ci ildə SSRİ süqut edəndən sonra planetimizdə ikiqütblü dünyaya son qoyuldu və Yer kürəsinin ən mühüm siyasi, iqtisadi və hərbi problemləri okeanın o tayından, yəni Vaşinqtondan idarə olunmağa başlanıldı.
O dönəmdə bugünkü “Qlobal Cənub”un sələfi olan Üçüncü Dünya ölkələri dünyanın zəngin dövlətləri üçün ucuz xammal və işçi qüvvəsi mənbəyi rolunu oynayırdılar. BMT Təhlükəsizlik Şurasının beş daimi üzvü (ABŞ, Böyük Britaniya, Fransa, Rusiya və Çin) olmasına baxmayaraq, dünya faktiki olaraq Ağ evin dirijor çubuğu ilə idarə olunurdu.
Anqlo-saksların liderliyi ilə Qərb dövlətləri bu status-kvonu qoruyub saxlamaq üçün planetin müxtəlif yerlərində çox sayda lokal və regional münaqişə və müharibələr törədir və dünyanın başını buna qatırdılar. Bu gün də Ağ ev dünyanı təkbaşına idarə etmək iddiasındadır və rəqib güc mərkəzlərinin meydana çıxmasını özünün milli maraqları üçün ciddi təhdid hesab edir.
Lakin XXI əsrin əvvəllərindən Çin iqtisadi və hərbi cəhətdən sürətlə güclənərək dünyanın ikinci ən böyük iqtisadi və hərbi gücünə çevrildi. Pekin bir çox mühüm göstəricilər üzrə ABŞ-ı daban-dabana izləməyə başladı və bu proses bu gün də davam edir.
Pekin başa düşür ki, “Kollektiv Qərb”ə qarşı təkbaşına mübarizə aparmağa gücü çatmayacaq. Ona görə də öz “komandasını” formalaşdırmağa çalışır. Bu məqsədlə Rusiya, Braziliya, Hindistan və Cənubi Afrika Respublikası–BRİKS adlı təşkilat yaradıldı. Məhz bu qurum hazırda faktiki olaraq “Qlobal Cənub”un əsas nüvəsini təşkil edir.
Vaşinqton “Qlobal Cənub”un nüfuz dairəsinin genişlənməsindən narahatdır və bunun qarşısını almaq istiqamətində ciddi cəhdlər göstərir. Ağ ev də ən çox Hindistanı bu komandadan kənarlaşdırmaq üçün cəhdlər edir. Qərbdə ümid edirlər ki, Çinlə Hindistanın ulduzları heç vaxt barışmayacaq.
“Qlobal Cənub” yerində saymaq niyyətində deyil. Onun sıralarına Meksika və Venesuela da daxil olmaqla, bir çox Latın Amerikası dövlətləri də qoşulub. Ən gözlənilməz fakt isə odur ki, zəngin neft və valyuta ehtyatlarına malik olan Səudiyyə Ərəbistanı da ara-sıra “Qlobal cənub”a rəğbətini izhar edir. Son aylar ərzində Pekin və Ər-Riyadın siyasi və hərbi cəhətdən yaxınlaşması da Qərbi çox pəjmürdə edib.
Yeri gəlmişkən, iki həftə əvvəl Rusiya–Ukrayna müharibəsinə son qoyulması üçün böyük bir sammitin məhz Ciddədə təşkil olunması çox şeydən xəbər verir. Bu ağır münaqişənin tərəfdaşları sayılan Qərb dövlətləri müharibənin təcili surətdə dayandırılması üçün “Qlobal Cənub”un təpkisi ilə üzləşiblər. Belə mesajlar gələcəkdə daha çox ola bilər.
Məlumdur ki, İkinci Dünya müharibəsi bitəndən sonra yaradılan bütün nüfuzlu beynəlxalq qurumlar, o cümlədən BMT, onun nəzdində fəaliyyət göstərən Təhlükəsizlik Şurası, Beynəlxalq Valyuta Fondu, Dünya Bankı, digər qlobal və regional qurumlar onillər boyu ABŞ-ın və onun yaxın müttəfiqlərinin nəzarəti altında olub.
“Qlobal Cənub” bununla razılaşmır və adları çəkilən təşkilatlardan öz fəaliyyətini ədalətli prinsiplər əsasında qurmasını tələb edir. Dünyanın maliyyə bazarlarında ABŞ dollarının dominantlığına qarşı mübarizə kəskin xarakter alır. Hələlik, heç bir milli valyutanın dollara gücü çatmır. Lakin vəziyyətin dəyişə biləcəyi istisna edilmir.
Görünən budur ki, dünya köhnə qanunlarla idarə olunmur, yaxud idarə olunmaq istəmir. TŞ-nin daimi üzvü olan Rusiyanın 15 il əvvəl qonşu Gürcüstana, ilyarım əvvəl isə Ukraynaya qarşı hərbi təcavüzü bir daha göstərdi ki, dünyanın nizamına nəzarət etməyi öhdələrinə götürən böyük dövlətlər özləri bu qaydalara əməl etmirlər.
Bu gün “Kollektiv Qərb”ə qarşı birləşən “Qlobal Cənub” yaxın gələcəkdə ayrı-ayrı güc mərkəzlərinə parçalana bilər. Bir çox təhlilçilər hesab edirlər ki. “Kollektiv Qərb”də birləşən dövlətlər, əsasən, sivil, demokratik dəyərlərə üstünlük verən toplumlardır. “Qlobal Cənub” isə, əsasən, avtoritar dövlətlərdən təşkil olunub. Lakin Qərb demokratiyasının iç üzü də çoxlarına bəllidir.
“Qlobal Cənub”un “Kollektiv Qərb”lə çəkişməsi hansı sonluqla bitəcək? Əvvəlcədən proqnoz vermək çətindir. Çox şey Ukraynadakı müharibənin nəticəsindən asılıdır. Əlahəzrət Zaman özü hər şeyi yerbəyer edəcək.
Rüfət RÜSTƏMOV,
Bakı Dövlət Universitetinin Türk filologiyası kafedrasının müdiri, professor
– Müasir dünyanın, həqiqətən, yeni siyasi, hərbi, hüquqi nizama böyük ehtiyacı yaranıb. Planetimizdə hazırda 200 dövlət var. Onların taleyini BMT-nin Təhlükəsizlik Şurasının (TŞ) beş daimi üzvü həll edir. Bu, açıq-aşkar haqsızlıqdır.
Bu gün dünyada türkdilli xalqların sayı təqribi hesablamalara görə üç yüz milyona çatır. Təəssüf ki, onların bir çoxunun müstəqil dövləti yoxdur. BMT üzvü olan türkdilli dövlətlərin isə heç biri TŞ-də təmsil olunmayıb. Halbuki, dünyanın 17-ci iqtisadiyyatı olan Türkiyənin buna tamamilə haqqı çatır.
Son iyirmi ildə görkəmli dövlət xadimi Prezident Rəcəb Tayyib Ərdoğanın liderliyi ilə Türkiyə olduqca böyük inkişaf yolu keçib. Rəsmi Ankara dünyanın bir çox bölgələrində haqqın, ədalətin tərəfində duran bir dövlət kimi tanınır. Fədakar türk əsgəri Suriyada, Liviyada terror əleyhinə qətiyyətlə mübarizə aparır.
Çağdaş dünyada rifah və tərəqqinin taleyini modern texnologiyalar həll edir. Türkiyə yeganə müsəlman dövlətidir ki, beşinci sənaye inqilabını yaxalaya bilib. Bu ölkədə artıq ən müasir raketlər, pilotsuz uçuş aparatları, digər modern silahlar istehsal olunur.
Türkiyə həm özünü, həm də müttəfiqlərini hərbi müdaxilələrdən qorumaq iqtidarındadır. Biz 2020-ci ilin payızında 44 günlük İkinci Qarabağ müharibəsi zamanı bunun şahidi olduq. Ankara “can Azərbaycan”a hər cür yardım göstərdi.
Siz soruşa bilərsiniz ki, bu gün Türkiyə kimin –“ Qlobal Cənub”un, yoxsa “Kollektiv Qərb”in yanındadır? Əlbəttə, Türkiyə NATO üzvü olaraq faktiki olaraq ikinci qurumda təmsil olunur. Bununla bərabər, rəsmi Ankara öz milli maraqlarına uyğun olaraq müstəqil və prinsipial siyasi xətt həyata keçirir.
Yaxın gələcəkdə planetimizin siyasi mənzərəsində ciddi dəyişikliklər olacaq. Düşünürəm ki, Vaşinqton və Pekindən əlavə, planetimizdə daha bir neçə güc mərkəzi formalaşacaq. Ümid edirəm ki, qlobal aktorlardan biri məhz bütün türkdilli dövlətləri öz ətrafında birləşdirən Türkiyə olacaq.
Bunun üçün bütün türk dövlətlərinin hərtərəfli inteqrassiyasını sürətləndirmək lazımdır. Biz zamanı qabaqlamağı bacarmalıyıq. Yoxsa rəqiblərimiz bizi üstələyə, öz siyasi iradələrini bizə diktə etməyə çalışa bilərlər. Bu isə yolverilməzdir.
Məsaim ABDULLAYEV, “Xalq qəzeti”