Yaxud erməni din xadimi Xocalını hansı məqamda xatırladı?

Din xadimlərinin, ümumən kilsənin erməni qövmünün avantürizminin başlıca dayağı olduğunu bilirik. Onu da bilirik ki, kilsə tarix boyu özünün anarxist baxışları ilə millətçiliyi, şovinizmi təbliğ edib, türklərə və müsəlmanlara qarşı dərin nifrət və düşmənçilik hissi aşılayıb. Bu mənada hazırda haqqında söz açacağımız məsələ bəlkə yenilik sayılmamalıdır. Hesab edə bilərik ki, bu mənada təəccüblənəcək elə bir şey də yoxdur. Amma, sən demə, onun üzərində dayanmağa ehtiyac varmış. 

***

Əvvəlcə onu bildirək ki, idman si­yasətdən uzaq tutulmalıdır. Elə biz də toplum olaraq məsələyə diqqət yetir­məliyik. Bəzən idmançımızın erməni idmançı üzərində qazandığı qələbəni xüsusi formada təqdim edirik. Yada salaq ki, bir müddət əvvəl karyerasının başa vurmuş güləşçimiz son görüşün­də erməni idmançıya qalib gəlmişdi. O, görüşdən sonra verdiyi açıqlamada heç vaxt erməni rəqibinə uduzmadığını bildirmiş və bununla öyündüyünü dilə gətirmişdi. 

Uzun sözün qısası, bu sayaq fikirlə­rin ictimailəşməsi doğru deyil. Ən azı, ona görə ki, indiki halda həmin güləşçi­nin onun özündən də populyar həmkar­ları var və onların karyeraları ərzində erməni rəqibinə yenildikləri anlar olub. Yəni, həm erməni atletin azərbaycanlı rəqibini, həm azərbaycanlı atletin er­məni rəqibini məğlubiyyətə uğratması haradan, hansı səmtdən diqqət yetir­sək, idman hadisəsidir. Normal məntiq məsələyə məhz bu səpkidə yanaşmağı diktə edir. Tam anormal məqama keçid alarkən, ön planında dayanan isə er­məni din xadimidir. 

***

Məlum olduğu kimi, bir müddət əvvəl Azərbaycan karateçisi erməni rəqibinə uduzmuşdu. Əslində, sonra­dan məlum olacaqdı ki, mövcud qay­dalar çərçivəsində hərəkət etməyən, qadağan olunmuş zərbə vuran erməni idmançının özüdür. Ancaq sosial şə­bəkələrdə yayılmış video görüntü var idi ki, orada erməni idmançının zərbə­sindən azərbaycanlı idmançı yerə yıxı­lır, huşunu itirir və həkimlər onu mey­dandan xərəkdə aparırlar. 

Mümkündür ki, bu hadisəyə hansı­sa sıravi erməni xüsusi pafos versin və yekun nəticə etibarilə məhz həmvətə­ninin yolverilməz zərbə endirdiyi üçün yarışdan uzaqlaşdırıldığının fərqinə varmasın. Amma bunu erməni din xa­dimi edirsə, məsələ qəlizləşir. Durumu daha da qəlizləşdirən isə həmin video­nun üzərindəki qeyddir. Rusca yazılmış qeydi təxmini tərcümə ilə təqdim edirik: “Erməni azərbaycanlını xocalılaşdırdı”. 

***

Burada başlıca məqam məhz “xo­calılaşdırdı” sözündədir. Deməli, özünü din xadimi adlandıran, sosial şəbəkə hesabında, indiki halda facebook sə­hifəsində dini ayin icra etdiyi səhnənin fotosunu yerləşdirən şəxs, eyni za­manda, üzərində belə qansız, təfriqəçi fikrin yazıldığı video-görüntünü də pay­laşır. Yəni, ortada din, dindar adına bu qədər böyük rəzalət var! 

Digər tərəfdən, Xocalı faciəsini xü­susi vurğulamalıyıq. O faciəni ki, xalqı­mızın qan yaddaşına son dərəcə böyük dərd kimi yazılıb. Erməni din xadimi isə sanki bu yaşantını məsxərə pred­metinə çevirir, Xocalının timsalında bir xalqın öz millətinin nümayəndələri tərəfindən başına gətirilmiş soyqırımı­na, bir növ, həqarətli münasibət ortaya qoyur. Dinə qulluq göstərən birinin bu qədər qeyri-insani təbiətə malik olma­sı, həqiqətən, dəhşətdir! 

*** 

Sonda onu da deyək ki, Ermənis­tan mediası və qeyri-hökumət təşki­latları hər zaman belə bir fikir yayırlar: Türklərdə, daha doğrusu, Azərbaycan türklərində ermənilərə qarşı pataloji nifrət var və sair və ilaxır. Bir müddət öncə bununla bağlı, guya, Bakı əhalisi arasında sorğu keçirən qurum da pey­da olmuşdu. “Sorğu”da respondentlərə ünvanlanmış suallardan bəlli idi ki, onu təşkil edənlər hansı məqsədə köklə­niblər. Suala diqqət yetirək: rus sülh­məramlıları bölgəni tərk etdikdən son­ra erməni uşağı ilə qarşılaşsanız, nə edərsiniz? Hələ saxta cavablara baxın: Uşağı görsəm, kölə edərəm; doğraya­ram və sair. 

Göründüyü kimi, “sorğu keçirən­lər” öz mahiyyətlərini ortaya qoyurlar. Məqsəd isə bəllidir – azərbaycanlı­larla ermənilərin birlikdə, dinc şəkildə ömür sürmələrinin mümkünsüzlüyünü göstərmək. Beləliklə ermənilər yaşa­yan Qarabağda Azərbaycanın hüquqi hakimiyyətinin qurulmasını əngəl­ləmək. 

Əslində, həm erməni mediası, həm həmin “sorğuçular”, həm də haqqın­da söz açdığımız erməni din xadimi davranışı ilə Ermənistanın inkişafı­nın, erməni cəmiyyətinin, belə demək mümkünsə, sivil tərtibatının qarşısını aldığının fərqində deyil. Ən pisi də elə budur. Xaricdəki erməni havadarları isə Azərbaycanı anti-humanist davranışda günahlandırırlar. Belə insani hisslərdən uzaq, başqasının ağrı-acısından həzz alan faşist xislətlilərlə necə humanist olasan? Onsuz da insani dəyərləri anlamayacaq qədər iflicdirlər. Bir top­lumun ki, din xadimi, yəni ziyalısı bu cür gerizəkalıdırsa, digərlərindən nə gözləyəsən?

R.ƏVƏZ, “Xalq qəzeti”