Donetskə olmazdı, Qarabağa olar... Niyə?
Əlbəttə, “Caliber.az” saytının Qərb dövlətləri Rusiyanın Ukraynanın Donetsk vilayətinə yardımı ilə Ermənistanın Azərbaycanın Qarabağ bölgəsinə yardımına münasibətindəki ikili standartlı yanaşmalarını müəyyənləşdirməsi, apardığı paralellər və müqayisələr alqışlanmalıdır.
Sayt indiyədək haqqında söz açdığımız ikili standartlar siyasətinin dünyanın gündəmindən düşmədiyini, Azərbaycana münasibətdə xüsusən həyasız xarakter daşıdığını bir daha ortaya qoydu. Təsəvvür edin, illər əvvəl Rusiya Ukraynaya humanitar yardım göndərir, aparıcı beynəlxalq təşkilatlar ayağa qalxıb bildirir ki, bəs, Kiyevin razılığı olmadan həyata keçirilən bu aksiya ölkənin ərazi bütövlüyünün pozulmasıdır. Azərbaycana gəldikdə isə, Laçın-Xankəndi yolunun başlanğıcında Həkəri çayı üzərindəki körpüdə yaratdığımız sərhəd buraxılış-məntəqəsi zonasında, necə deyərlər, lövbər salmış Ermənistanın “Spayka” “tır”ları, az qala, “təkərli mələklər” obrazında təqdim olunmaqdadır. Doğrudan da, həyasızlığın bundan böyük həddi yoxdur. Ancaq onu da deyək ki, ümumən bundan o yana hədd yoxdur. Yəni, növbə müharibənindir. Fikrimizi əsaslandırmaq üçün bir neçə məqama diqqət yetirməyi zəruri sayırıq.
Birincisi, Qarabağa “tır” göndərən Ermənistan Rusiyanın qət etdiyi separatizm yolu ilə gedir. O Rusiyanın ki, beynəlxalq ictimaiyyət hazırda onu Ukrayna müharibəsinə görə, sözün bütün mənalarında, linç etməklə məşğuldur. Dünya isə İrəvan hakimiyyətinin Qərbpərəst olduğuna inanır. “Spayka” “tır” şousuna diqqət yetirəndə, baş nazir Nikol Paşinyanın, əslində, haradan nə öyrəndiyi üzə çıxır.
Qərb əziyyət çəkib 2018-ci ildə Ermənistanda inqilab elədi, məlum oldu ki, erməni xisləti Moskvadan “dərs mənimsəməyi” tərgitməyib. İndi isə Qərb həmin “rus dərsinin” müdafiəsi ilə məşğuldur. Belə getsə, 2018-ci il inqilabı rus tarixşünaslığının pafosla təqdim etdiyi Böyük Oktyabr Sosialist İnqilabına çevriləcəkdir...
İkinci məqama keçid alaq. Cənubi Qafqazda separatizmin saxlanılmasını istəyən Rusiyadır. Moskva niyyətini müxtəlif arqumentlərdə pərdələmək yolu tutur. Guya, sülh naminə iş aparılmalıdır, Azərbaycan və Ermənistan cəmiyyətləri bir-biri ilə dialoqa girməlidir, yaxınlaşmalıdır və sair bu sayaq mətləbdən yayındıran məsələləri gündəmə gətirir. Sanki 1945-ci ildə nasist Almaniyasını məğlubiyyətə uğradanda onun boğazına çöküb bütün şərtləri qəbul elətdirən SSRİ olmayıb. Və sanki Rusiya həmin dövlətin varisi rolunda çıxış etmir. Yeri gəlmişkən, Rusiyanın baş naziri Dmitri Medvedyev bir neçə gün əvvəl bildirmişdi ki, Ukrayna diz çöküb aman diləyənədək, Kiyevə qarşı reallaşdırılan xüsusi hərbi əməliyyat davam edəcəkdir. Deməli, düşüncə 1945-ci ilin düşüncəsidir. Söhbət heç də ondan getmir ki, Rusiya Ukrayna mühairbəsində haqsız və ya haqlıdır. Məsələ yanaşmadadır.
Bəli, Azərbaycan Qarabağdakı separatizmin kökünü kəsməkdə haqlıdır. Bunun üçün bütün vasitələr keçərlidir, bu, öz yerində. Maraqlı olan isə həm də odur ki, hazırda Qərb Rusiyanın məntiqindən çıxış edir. Bəlkə məsələnin fərqində deyil, ancaq nəticə bunu deməyə əsas verir. Halbuki, həmin Qərb Moskvanın Cənubi Qafqazdan sıxışdırılmasını istəyir. Hazırkı durum prosesin reallaşmasına imkan verirmi? Əsla yox! Yəni, dolayısı ilə bu gün “Spayka” “tır”larının qurduğumuz sərhəd məntəqəsindən keçməsini istəyən və mövcud istiqamətdə özünün ermənipərəst mövqeyini ortaya qoyan Qərb, faktiki olaraq, Rusiyanın xeyri üçün çalışmaqdan başqa bir iş görmür. Nəzərə almır ki, “Spayka” ilə birgə Qarabağa dürtülməsinə çalışılan separatizmin davamıdır. Kreml bu gedişatdan faydalanmaq üçün daha böyük şanslara malikdir, nəinki Qərb.
Üçüncü məqam. Görünür, Ermənistan Rusiyanın Donetskdə etdiyi kimi, “humanitar yüklər”lərdən sonra Qarabağa qoşun göndərsə, Qərb İrəvanın işğalçılıq niyyətini əsaslandırmaq üçün də nələrsə tapa bilər. Necə ki, otuz ilə yaxın müddətdə tapmışdı. Əvvəldə də bildirdik ki, “Spayka” “tır”larını sərhədə yığmaq Qarabağ müstəvisində Ermənistanın ata biləcəyi son addımdır. Bundan o tərəfi müharibədir.
Nəzərə alaq ki, ölkəmiz həmin “tır”ların Qarabağa keçməsinə ona görə yol vermir ki, Ermənistan hökumətinin bölgəyə humanitar yardım göndərmək qərarı Azərbaycanın ərazi bütövlüyünə təhdiddir. Təhdiddən sonra isə bir qayda olaraq, müharibə gəlir. Ukraynadakı kimi. Rusiya birinci Donetsk-də humanitar yüklər göndərdi, sonra tank-top. Yeri gəlmişkən, onun yardım “tır”larının içərisində “humanitar Kalaşnikov avtomatı”nın olduğunu da söyləmək üçün müəyyən əsaslar var. Çünki həmin yüklər Donetskə gedib çatdıqdan sonra bölgədə “fəallaşma” olmuşdu. Tam mümkündür ki, “Spayka” “tır”ları Qarabağa yetişsə, orada da separatizm aktivləşəcək.
Onu da nəzərə alaq ki, yük avtomobillərinin içərisində silahların deyil, humanitar təyinatlı malların olduğunu müəyyənləşdirmək mümkünsüzdür. Digər tərəfdən, Ermənistanın 44 günlük müharibədən sonra daim sadiq qaldığı “ənənə” var – Laçın yolundan silah-sursat, mina daşımaq. Belə görünür, indiki halda Azərbaycandan Ermənistanın “tır”larının Qarabağa buraxılmasını tələb edən beynəlxalq ictimaiyyətin istədiyi elə budur.
Dördüncü məqam. Ötən həftə Rusiyanın Xarici İşlər Nazirliyinin rəsmi nümayəndəsi Mariya Zaxarova brifinq zamanı bildirmişdi ki, Ermənistan Qarabağa humanitar yüklər göndərəndə Azərbaycan ilə məsləhətləşməmişdi. Bu fikir, əslində, Qarabağın hüquqi sahibinin kimliyini müəyyənləşdirmək baxımından böyük əhəmiyyətə malikdir. Hərçənd, hiss olunurdu ki, Zaxarovanın cavabı Ermənistan jurnalistlərinin çoxsaylı təxribatçı suallarına qarşı bir növ üsyandır. Təxminən belə: əl çəkin məndən. Qarabağ sizin deyil, birtəhər istəyirik ki, nə isə edək, gic-gic suallarla baş-beynimizi tökürsünüz.
Nəsə etməyə gəlincə, Zaxarova ondan da söz açmışdı. Yəni, o, İrəvanın Qarabağa humanitar yük göndərərkən, məsələni Bakı ilə razılaşdırmadığını bildirsə də, hazırda Rusiyanın Azərbaycanla həmin yüklərin ünvanına çatması üçün danışıqlar apardığını vurğulamışdı. Əlbəttə, Azərbaycan özünün prinsipial mövqeyindən geri çəkilməyəcək. Ölkəmiz Qarabağdakı separatizmin çənbərini hər ötən gün daha da daraltmaqdadır.
Sonda bir daha ikili standarlar siyasəti barədə. Azərbaycan buna öyrəncəlidir. Yəni, prinsip etibarilə dünyanın vaxtilə Ukraynaya yanaşdığını hazırda ölkəmizə münasibətdə ortaya qoymaması təəccüblü deyil. Həmin Qərb idi ki, onun bəzi dairələri 44 günlük müharibə başlayanda dünyaya Azərbaycanın Ermənistana qarşı işğal törətdiyini car çəkmişdilər. İndi də bizi qeyri-insani rəftarda, sadə insanların həyatını siyasi oyunlarda alətə çevirməkdə günahlandırırlar.
Qərb bir şeyi ciddi düşünməlidir: Ukraynaya münasibətdəki yanaşma sonda böyük müharibə doğurdu ki, bu gün də həmin müharibə neçə-neçə insanın arzularını torpağa gömür. Yəni, Ukraynadakı müharibəyə görə Rusiya nə qədər təqsirkardırsa, Qərb də eyni dərəcədə müqəssirdir. Sabah Qarabağda müharibə başlasa, yenə təqsirkar Rusiya və Qərb olacaq. Çünki ikili standartlar siyasəti fonunda bu iki cinahın bir-biri ilə apardığı rəqabət perspektivdə yalnız müharibə vəd edir.
Ə.CAHANGİROĞLU, “Xalq qəzeti”