Qondarma “DQR-in lideri” son aylar təkcə İrəvanın deyil, Xankəndidəki ermənilərin də dəstəyindən məhrum olub
Arayik Arutyunyanın erməni toplumu üçün arzuedilməz şəxsə çevrildiyi məlumdur. Buna səbəb onun və əlatılarının özlərinin siyasi ambisiyaları naminə sadə erməniləri, onların maraq və mənafeyi ilə yanaşı, həm də həyatlarını qurban verməkdən çəkinməməsidir. Rəsmi Bakının sülhpərvər təkliflərindən inadla imtina edən, ölkəmizə qarşı təxribatlara ara verməyən Arutyunyan, digər yandan Qarabağdakı ermənilərin hüquqlarını kobud şəkildə pozmaqda, onları hərbi xunta rejiminin əsirinə çevirməkdədir. Arayikin məhz rəsmi İrəvan və Qarabağdakı ermənilərə münasibəti onu yerli medianın hədəfinə çevirməkdədir.
Arayikin İrəvana və Qarabağdakı ermənilərin maraqlarına zidd siyasəti son günlər Ermənistan mətbuatında baş separatçıya yönəlik ittihamların say və çeşidinin artması ilə müşahidə edilməkdədir. Yeni qəbildən olan bu ittihamlardan biri isə onun Azərbaycanla gizli reinteqrasiya tərəfdarı olması, bu məqsədlə rəsmi Bakı ilə anlaşmağa cəhd etməsi ilə bağlıdır.
Ermənistanın “Hraparak" nəşri tərəfindən irəli sürülən bu iddiaya görə, Arayiki Bakı ilə anlaşmaya vadar edən əsas səbəb onun həm Rusiyanın, həm də İrəvanın dəstəyindən məhrum olması ilə bağlıdır. Məhz belə olduğu üçün Arutyunyanın Bakı ilə gizli anlaşmağa çalışdığını bildirən nəşr, bunun Qarabağ erməniləri üçün ağır nəticələrə səbəb ola biləcəyini qeyd edib. Nəşrin yazdığına görə, Arayik bu qərarın məsuliyyətindən özünü sığortalamaq yolunu da müəyyənləşdirib. Belə ki, Arutyunyanın dəstəyi ilə xüsusi səlahiyyətə malik “əlahiddə qurum” yaradılacaq və Bakı ilə reinteqrasiya qərarı bu qurumun dilindən elan ediləcək. Yəni, Arayik bu qərarın məsuliyyətini digər separatçılarla bölüşəcək və bununla da tənqid və ittihamlar üçün “tək hədəf” olmaqdan yayınacaq.
“Hraparak" nəşri Arayiki Azərbaycanla reinteqrasiya tərəfdarı olduğunu iddia etsə də, bugünə qədərki davranışı onun rəsmi Bakı ilə anlaşmadan uzaq olduğunu göstərir. Onun davamlı olaraq ölkəmizə qarşı təxribatlar həyata keçirməsi, Azərbaycanla bağlı mütəmadi şəkildə cəfəng fikirlər səsləndirməsi də baş separatçının rəsmi Bakı ilə anlaşmaq niyyətindən uzaq olduğunu göstərir. Arayik yaxşı başa düşür ki, onun Bakı ilə razılığa gəlməsi bölgədəki separatçılar üzərindəki hakimiyyətinin itirilməsi demək olacaq. Habelə, bu razılıqdan sonra Arayikə qarşı Ermənistandakı revanşist qüvvələrin hücumları artacaq ki, Arutyunyanın bu hücumlar qarşısında uzun müddət davam gətirəcəyi inandırıcı görünmür.
Bundan başqa, rəsmi Bakı ilə anlaşma Arayik Arutyunyanı xaricdəki erməni lobbisi ilə də üz-üzə qoyacaq ki, bu, baş separatçı üçün daha böyük problem deməkdir. Çünki xaricdəki erməni lobbisinin dəstəyi olmadan Arutyunyanın öz liderlik postunu qoruması real görünmür. Ən əsası, Arutyunyanın cinayətkar keçmişi, təfəkkürünün “Böyük Ermənistan” xülyası ilə zəhərlənməsi, türkə pataloji nifrət hissi onu Bakı ilə anlaşmadan uzaq tutan ciddi səbəblərdir. Bu baxımdan Arutyunyanın nə açıq, nə də gizli şəkildə Bakı ilə anlaşacağı inandırıcı görünmür. Şübhə yoxdur ki, Arutyunyanın Bakı ilə gizli reinteqrasiya tərəfdarı olması ilə bağılı deyilənlər onu erməni toplumunda daha da gözdən salmaq, Arayikin başqa bir separatçı ilə əvəzlənməsinin vacibliyi fikirini ictimai şüura diktə etmək niyyətindən irəli gəlir.
Göründüyü kimi, İrəvan və Rusiya ilə yanaşı, Qarabağdakı ermənilərin də dəstəyindən məhrum olan Arayikin vəziyyəti kifayət qədər mürəkkəbdir və bu, hər ötən gün bir qədər də artır. Bu baxımdan, Arayikin Azərbaycana olan nifrət və barışmaz münasibətinə baxmayaraq, rəsmi Bakı ilə anlaşma onun üçün yeganə çıxış yolu ola bilər. Çünki bugünə qədər Arayikə dəstək verən əksər qüvvələrin onu devirməsi, ermənilərin özləri tərəfindən ağır şəkildə cəzalandırması ehtimalı böyükdür. Arayiki bu labüd sonluqdan yalnız rəsmi Bakının gücü və mərhəməti xilas edə bilər. Bunun üçünsə Arayikin Azərbaycanın təkliflərini düzgün şəkildə dəyərləndirməsi, təxribatlardan əl çəkməsi, Qarabağ ermənilərinin ölkəmizə reinteqrasiya prosesinə mane olmaması gərəkdir.
Seymur ƏLİYEV
