Azərbaycan və Ermənistan XİN rəhbərlərinin Moskva təmasına sözardı
Məlum olduğu kimi, iyulun 25-də Moskvada Azərbaycan, Rusiya və Ermənistanın xarici işlər nazirlərinin üçtərəfli görüşü keçirildi. Görüş barədə ilk təəssürat budur: iki Cənubi Qafqaz ölkəsinin xarici siyasət idarələrinin rəhbərləri Rusiyanın paytaxtına, sadəcə, öz mövqelərini bildirmək üçün yollanmışdılar. Onların nələrdən söz açdıqlarını diqqətə çatdıracağıq. Hələlik isə azacıq da olsa, pozitivə köklənək və Rusiyanın Xarici işlər naziri Sergey Lavrovun görüşdən əvvəlki fikirlərinə nəzər salaq. Çünki, əslində, nikbin əhval-ruhiyyə yalnız onda idi. Görünür, Kremlin çoxdandı reallaşdırmaqda çətinlik çəkdiyi görüşü, belə demək mümkünsə, reallaşdırması S.Lavrovun ovqatına müsbət təsir göstərmişdi.
Nikbin preambuladan gerçəkliklərə doğru
Bəli, Rusiya vasitəçilik anlamında ortaya yenilik qoymadı. Lavrov ölkəsinin Cənubi Qafqazda sülh və sabitliyin qorunmasındakı marağını ifadə etdi. Bildirdi ki, Kreml Ermənistan, Azərbaycan və Rusiya arasında bütün üçtərəfli sazişlərə bütövlükdə və qarşılıqlı münasibətlərdə hörmətlə yanaşılmasının və həyata keçirilməsinin tərəfdarıdır. Bu, o deməkdir ki, Bakı və İrəvanın təmsilçiləri dünyanın harasında görüşürlərsə-görüşsünlər, əsas kimi həmin sazişləri götürməlidirlər.
Lavrov Azərbaycan və Ermənistan XİN rəhbərləri – Ceyhun Bayramov və Ararat Mirzoyanla birlikdə təmasdan əvvəl, onlarla təkbətək danışıqlar apardığını vurğuladı və dedi: “İndi isə üçümüz Azərbaycan və Rusiya prezidentlərinin və Ermənistanın baş nazirinin arasında Qarabağ probleminin həlli ilə bağlı sazişlərdən irəli gələn vəzifələrin, daha geniş mənada Bakı ilə İrəvan arasındakı münasibətlərin tam normallaşması vəzifələrinin həyata keçirilməsi üçün səylərimizi davam etdirəcəyik”.
Göründüyü kimi, Lavrovun düşüncəsində Qarabağ problem kimi qalır. Halbuki, konseptual baxımdan bu yanaşma yolverilməzdir. Ona da diqqət yetirək ki, Qərb tənzimləmə xətti Bakı–İrəvan nizamlamasını prioritet götürür. Orada ayrıca Qarabağ seqmenti yoxdur. Rusiya isə köhnə dalğalara köklənir. Əlbəttə, niyyətini yeni ab-havaya uyğunluq görüntü ilə pərdələməyi də yaddan çıxarmır. Bunun izahını verəcəyik...
Moskvanın üçtərəfli sazişlərə bütövlükdə və qarşılıqlı münasibətlərdə hörmətlə yanaşılmasını və praktikada tətbiqini müdafiə etdiyini bildirən Rusiyanın baş diplomatı Azərbaycan və Ermənistan XİN rəhbərlərinin dəvətinin daha bir məqsədinə də aydınlıq gətirib. Deməli, Rusiya Qarabağ probleminin həllinə, necə deyərlər, mükəlləf imiş, amma: “Bu gün mən sizi Azərbaycan və Ermənistan arasında sülh müqaviləsi üzrə danışıqlar prosesinin hazırda nə yerdə olduğu barədə fikir mübadiləsi aparmağa dəvət etmək istərdim. Biz ekspert potensialımızdan və burada təmsil olunan dostlarımızla yaxşı münasibətlərimizdən yararlanaraq, prosesin koordinasiyasında hər cür kömək göstərməyə hazırıq. Ümidvarıq ki, bütün bu məsələləri praqmatik, konstruktiv atmosferdə müzakirə edəcəyik”.
Deməli, sülh müqaviləsi üzrə danışıqlar kənarda gedəcək, Rusiya onu müzakirə edəcək. Belə yanaşma olurmu? Moskva bunu hansı haqla edəcək? Əlbəttə, özü üçün haqq müəyyənləşdirmək Rusiya üçün problem olmayıb. Yenə də problem deyil və Rusiya istəyir ki, tərəflər Qərb platformasında aparılan danışıqların detallarını bölüşsünlər. Nə üçün? Bir halda ki, Moskva üçtərəfli bəyanat məntiqi ilə hərəkət edir, o zaman beynəlxalq ictimai rəydə ikitərəfli danışıqlar, yəni birbaşa təmas kimi qəbul edilən Brüssel və ya Vaşinqton formatı ona hansı səbəbdən maraqlı olmalıdır?
Rusiya vasitəçidir, yoxsa tərəf?
Digər yandan, Rusiya üçtərəfli razılaşmalara əsasən, özünü Azərbaycan–Ermənistan münasibətlərində birbaşa tərəf qismində görürsə, deməli, hər bir halda, onun Qərb formatı ilə razılaşmayacağı aşkardır. Hesab edək ki, müharibəyə bu şəkildə son qoyan Kremldir. Amma bu amilin onu tərəfə çevirməsi nə dərəcədə qanunidir? Bu kimi suallar ritorikdir, çünki cavabı bəllidir.
Rusiyanın Cənubi Qafqaz siyasi akvatoriyasında müəyyənləşdirdiyi oyun var və ölkə istəmir ki, mövcud platforma kənar qüvvələrin nəzərində, yaxud marağında olsun. Bu yerdə Lavrovun diqqətə çatdıracağımız növbəti fikirləri əhəmiyyətini itirir. Yaxud həmin fikirlərin səmimiliyinə inanmaq mümkünsüzləşir. Rusiyanın XİN rəhbəri deyir ki, Moskva Azərbaycanın və Ermənistanın sülh prosesinə digər vasitəçiləri də cəlb etməkdə maraqlı olduğunu başa düşür və Bakı ilə İrəvan arasında razılığa gəlinməsi yönündə atılan addımları alqışlayır. Alqışlayırsa, üçtərəfli bəyanatı üstün tutmaq nə üçündür? Axı, həmin üçtərəfli sənədlərdə iki Cənubi Qafqaz ölkəsi arasındakı münasibətlərin tənzimlənməsi baxımından fundamental heç nə yoxdur. Bu razılaşmalar daha çox atəşkəsin əldə edilməsi və möhkəmləndirilməsi xəttini rəhbər tutur. Qərb formatı isə əsaslı sülh üçün daha təkmil və fundamental platforma təəssüratı yaradır.
Kremlin üçtərəfli Bəyanatı ehkamlaşdırmaq məqsədilə düzənlədiyi görüşün özünə gəlincə, bu yerdə əvvəldə vurğuladığımız pozitivi bir kənara ataq və görək ki, Azərbaycanın və Ermənistanın XİN rəhbərləri Moskvada nələrdən danışdılar. Başlayaq ölkəmizin Xarici işlər naziri Ceyhun Bayramovun fikirlərindən.
Bayramovun dedikləri
C.Bayramov Lavrovla ikitərəfli və Ermənistanın xarici işlər naziri Ararat Mirzoyanla üçtərəfli görüşlərdə Bakı–İrəvan normallaşma xəttinin müzakirəyə çıxarıldığını vurğulayıb. Yəni, Rusiya XİN rəhbərinin “Qarabağ müzakirəsi” məntiqi dövriyyədən çıxır. Nazir C.Bayramov bölgədəki mövcud vəziyyət kontekstində Azərbaycanın regionda sülh və təhlükəsizliyin yaranması naminə atdığı addımlara qarşı Ermənistan tərəfindən hədə və qeyri-qanuni fəaliyyətlərin törədildiyini, habelə təyyarələrin uçuşuna maneələrin yaradıldığını, hərbi təxribatlar gerçəkləşdirildiyini diqqətə çatdırıb. O, bölgədə humanitar vəziyyətə dair səsləndirilən iddiaların tamamilə əsassızlığını, bu iddiaların siyasi manipulyasiya olduğunu da bildirib.
C.Bayramovun fikirlərindəki daha bir diqqətçəkən məqam onun İrəvanın 10 noyabr 2020-ci il tarixli üçtərəfli Bəyanatdakı öhdəliklərə zidd fəaliyyət göstərdiyini söyləməsidir. Azərbaycanlı nazir mövcud xüsusda Laçın yolundan hərbi məqsədlər, habelə Azərbaycanın təbii sərvətlərinin qanunsuz daşınması üçün sui-istifadə hallarına yol verildiyini bildirib və deyib ki, belə təmayüllərlə mübarizə aparmaq Azərbaycanın suveren hüququdur. XİN rəhbəri bu məqsədlə ölkəmiz tərəfindən Laçında nəzarət-buraxılış məntəqəsinin təsisini zəruri tədbir kimi dəyərləndirib. O məntəqənin ki, orada erməni sakinlərin hər iki istiqamətdə şəffaf, təhlükəsiz və nizamlanan keçidi üçün şərait yaradılmışdı. Lakin Ermənistan iyunun 15-də ərazidə təxribat törətdi və bununla da həmin erməni sakinlərin keçidinə maneçilik yarandı.
Görüşdə C.Bayramovun üzərində dayandığı başlıca məqam Azərbaycanın erməni sakinlərin ehtiyaclarının qarşılanması üçün “Ağdam-Xankəndi” yolundan və digər alternativ yollardan istifadə daxil olmaqla, bir sıra təkliflər irəli sürdüyünü vurğulamasıdır. Məlumdur ki, erməni tərəfi buna qarşı çıxır, məkrli niyyətlər güdür və humanitar vəziyyət barədə iddiaları siyasi şantaj vasitəsinə çevirir. Buna qarşılıq ölkəmiz özünün suveren ərazilərində yaşayan ermənilərin reinteqrasiyasına müdaxilə cəhdlərinə son qoyulmasını, ərazi bütövlüyümüzün sözdə və əməldə qeyd-şərtsiz təsdiqlənməsini, Qarabağdakı erməni silahlı qüvvələrinin oradan çıxarılmasını zəruri sayır.
Bəli, nazir C.Bayramov Moskvada bunları vurğulamaqla faktiki olaraq Rusiyanın ön plana daşımağa çalışdığı üçtərəfli bəyanata əməl olunmadığını bildirib. Ən əsası isə o, Ermənistanın Moskvanın deyil, Qərbin vasitəçiliyinin gündəmində yer alan məsələlərdən boyun qaçırdığını da diqqətə çatdırıb. Məsələn, humanitar yardımların daşınması üçün “Ağdam-Əsgəran” yolunu götürək. Bu, o yoldur ki, Rusiyanın Qarabağdakı adamı sayılan Ruben Vardanyan həmin yola beton plitələr düzdürərək, oradan humanitar yardımların daşınmasının qarşısını almışdı. Yeri gəlmişkən, R.Vardanyanın saxta etiraz aksiyasının Rusiyanın Xarici İşlər Nazirliyinin Azərbaycan və Ermənistan liderlərinin 15 iyul Brüssel görüşü ilə bağlı bəyanatından dərhal sonraya təsadüf etməsi qəribədir. Bir çox siyasilər Rubenin bu hərəkətini Moskvanın Qərb formatına etirazı kimi qiymətləndirirlər...
Mirzoyan isə dedi ki...
Əslində, Ermənistan XİN rəhbəri Ararat Mirzoyan Moskvada ölkəsinin üçtərəfli bəyanata məhəl qoymadığını bir daha göstərdi. Qarabağda erməni hərbi birləşmələri qalırsa, deməli, sənəd faktiki olaraq işləmir. İrəvan təmsilçisi bunu deyil, Laçın dəhlizinin bağlanmasını və Qarabağın erməni əhalisinin, guya, blokadaya alınmasını həmin bəyanata zidd məqam kimi qabardır. Maraqlıdır ki, Mirzoyan ölkəsinin təmsilçilərinin Azərbaycan nümayəndələri ilə görüşlərinin və danışıqlarının kifayət qədər intensiv xarakter daşıdığını, bəzi məsələlərdə konkret nəticələrin əldə olunduğunu, tərəflərin qarşılıqlı razılığa gələ biləcəkləri perspektivin yarandığını bildirib. O, fikirlərini diqqətə çatdırarkən, Qərb tənzimləməsi xətti üzərinə fokuslanıb. Mövcud müstəvidə problemli məqamların da qaldığını deyən erməni nazir əlavə edib ki, həmin məqamlarla əlaqədar mövqelər bir-birindən çox uzaqdır.
Əlbəttə, A.Mirzoyan Moskvadakı çıxışında Qarabağda humanitar böhran şousu ilə bağlı “sentimental zəngulələr” vuraraq manipulyasiyaya yol verməyi yaddan çıxarmayıb. Onun çıxışındakı başlıca məqam isə budur ki, Ermənistan bütün platformalarda və sahələrdə danışıqlara sadiq qalacaqdır. Deməli, İrəvan Moskvaya sərfəli trayektoriyanı özü müəyyənləşdirəcəyinə dair mesajını çatdırır.
Lavrov hələ “sülhə gəlmir”, lakin Qərbə ilişir
Bu yerdə görüş zamanı S.Lavrovun Rusiyanın Cənubi Qafqazda sülh və sabitlikdə maraqlı olduğunu vurğulamasının hansı əhəmiyyət daşıdığını müəyyənləşdirmək çətindir. Belə nəticəyə gəlmək mümkündür ki, Kreml nazirlərin digər platformalardakı danışıqlar məntiqini vacib saymır. Hərçənd, Rusiyanın baş diplomatı ölkəsini Qərb tənzimləmə xəttinin bir seqmentinə kökləməyi də yaddan çıxarmır. Necə deyərlər, tutar qatıq, tutmazsa... ayran onsuz da var.
Lavrov deyir ki, “bizim səylərimiz həm Ermənistan–Azərbaycan sərhədində vəziyyətin sabitləşməsinə, həm də humanitar problemlərin həllinə, iqtisadi və nəqliyyat əlaqələrinin bərpasına, insanlar, vətəndaş cəmiyyətləri və politoloqlar arasında kommunikasiyanın inkişafına yönəlib”. Göründüyü kimi, Rusiyanın baş diplomatı sülh müqaviləsindən söz açmır. Təxminən belə: hər şey yaxşı olsun, ancaq qeyri-müəyyən qalsın. Hərçənd, bir azdan diplomatın “sülhə gəldiyini” də görəcəksiniz.
Hələlik onu deyək ki, Azərbaycanla Ermənistan arasında sülh müqaviləsi imzalanmayacaqsa, qeyri-müəyyənlik davamlı xarakter alacaq. Burada Lavrovun vətəndaş cəmiyyəti institutlarının xalqlar arasında yaxınlıq yaratmasına dair ritorikası tam mənasızdır, haqqında söz açdığımız qeyri-müəyyənliyin davamına hesablanıb. Vaxtilə Qərb dairələri də xalq diplomatiyası yolu ilə Azərbaycan-Ermənistan münasibətlərini tənzimləmək istəyirdilər. Lakin belə cəhdlər uğursuz olurdu. Daha doğrusu, uğursuz olacağı əvvəlcədən bilinən cəhdlər ölkəmizi torpaqlarının itirilməsi reallığı ilə barışdırmağı hədəf seçsə də “istəklər” gerçəkliklə uzlaşmadı. “Planlar” baş tutmadı, Ermənistan özünün məkrindən qalmadı və nəticədə 44 günlük müharibə baş verdi. İndi Rusiya Qərbin keçmişdəki təcrübəsinə baş vurur. Onun sülh çağırışları yalnız dilucu səslənir.
Lavrovun ikinci nikbinliyi və ya üçtərəfli bəyanat var, döndü yoxdu
S.Lavrov Azərbaycan və Ermənistan XİN rəhbərləri ilə üçtərəfli görüşdən əvvəl açıqlama ilə çıxış etdiyi kimi, görüşdən sonra da bu təmasın yekunlarına dair geniş şərh verməyi unutmur və yenə pozitivə köklənir. O, həmkarları – C.Bayramov və A.Mirzoyanla faydalı danışıqlar apardığını vurğulayır.
Rusiyanın XİN rəhbəri yuxarıda sadaladıqlarımızı faydalı sayırsa, deməli, fantaziyası böyükdür. Hərçənd, Lavrovun sonrakı fikirləri göstərir ki, onun pozitivliyi yalnız ölkəsinin mövqeyini rahat çatdırmağa əsaslanır. Əlbəttə, Kreml üçün ən böyük dividend Azərbaycan və Ermənistanın XİN rəhbərlərinin Moskvaya gəlib çıxmasıdır. Axı, A.Mirzoyanın müxtəlif bəhanələrlə Rusiyanın paytaxtına yollanmaqdan yayındığı hallar az omayıb.
Kremlin baş diplomatının sözlərinə görə, Rusiya sülhməramlılarının verdiyi hesabatları nəzərə alaraq nazir həmkarlarının diqqətinə Qarabağ əhalisinin hüquqlarının təmin olunması naminə təxirəsalınmaz addımların atılmasının zəruriliyini çatdırıb. Söhbət ərzaq, dərman, ilkin tələbat malları, elektrik enerjisi və qazla fasiləsiz təminatdan gedir və Lavrovun fikrincə, bu, sadə ermənilərin maraqlarına uyğundur. Amma onun uyğunluq üçün üçtərəfli bəyanat məntiqini ortaya atması anlaşılan deyil. Nəzərə alaq ki, həmin bəyanatda Qarabağ ermənilərinin təminatı ilə bağlı heç bir müddəa yoxdur. Qarabağ Azərbaycanındırsa və bu, Ermənistan rəhbərliyi tərəfindən qəbul edilirsə, o zaman bölgənin erməni əhalisinin qayğısına qalmalı olan tərəf məhz dövlətimizdir. İndi baş verən proseslər isə onu göstərir ki, buna qarşı çıxan qüvvələr var. Halbuki Lavrovun şəxsində Rusiyanın qəbul etmək istəmədiyi Qərb tənzimləmə xəttində Bakının öz əhalisinə yardım göstərməsi məntiqi əsas götürülməkdədir. Moskva bunun üzərinə, ümumiyyətlə, gəlmir. Onun bölgə ilə bağlı istinad mənbəyinin Rusiya sülh-məramlıları olması isə o deməkdir ki, Kreml yenə köhnə şakərindədir.
Digər tərəfdən, Lavrov bildirir ki, azərbaycanlı və erməni həmkarı ilə 44 günlük müharibədən sonra imzalanmış üçtərəfli bəyanatlarda əksini tapmış müddəalardan biri kimi, regionda maneəsiz hərəkətin təmin edilməsi, nəqliyyat və iqtisadi kommunikasiyaların bərpasını nəzərdən keçirib. Yəqin, həmin sənədlərdə iki Cənubi Qafqaz ölkəsi arasında sülh müqaviləsinin imzalanmasından söz düşmədiyindən, indi də məsələ lazımi səviyyədə qoyulmur. Halbuki, hazırda Azərbaycan-Ermənistan gündəmində 2023-cü ilin sonunadək həmin sülh müqaviləsinin reallaşması məntiqi dayanmaqdadır. Söhbət Qərb tənzimləməsi xəttindən gedir. Belə qənaətə gəlirik ki, hazırda Rusiya durumu daha əvvələ aparmaq niyyətindədir.
Sülh “stansiyası”, amma qapılar açılmır
İndi isə gələk anonsunu verdiyimiz məqama – Lavrovun sülh gündəliyinə. Ümumən aşkar görünür ki, Rusiyanın XİN rəhbəri sülh müqaviləsi məsələsinin üzərinə yalnız xırda eyhamlarla gəlməyi üstün tutur. O, tədricən bir az da mətləbə yaxınlaşması ilə diqqət çəkir. Çünki müqavilənin qaçılmazlığını görür. Buna görə də deyir: “Ümid edirik ki, bu müqavilənin imzalanması ermənilərin və azərbaycanlıların Rusiya Federasiyasının Prezidenti Vladimir Putinlə üçtərəfli görüşləri zamanı başlatdıqları səylərin altından xətt çəkəcək böyük danışıqlar prosesinin kulminasiya nöqtəsi olacaqdır”.
Bəli, Putin amili üzərində Rusiyanın rolunun vurğulanması həm də o deməkdir ki, Azərbaycan və Ermənistan arasında yekun razılıq yalnız Moskvanın sərəncamındadır. Amma Rusiya XİN-in rəhbəri sülh yolunun asan başa gəlməyəcəyinin anonsunu verir. Həll edilməli çoxlu mürəkkəb və vacib məsələlərin qaldığını vurğulayır. Diplomatın fikrincə, onlardan ən həssası keçmiş sovet respublikalarının rəhbərləri tərəfindən imzalanmış 1991-ci ilin Alma-Ata Bəyannaməsinə tam uyğun olaraq, Azərbaycanın ərazi bütövlüyünün təmin edilməsidir. Əlbəttə söhbət bu kontekstdə Qarabağ ermənilərinin hüquq və təhlükəsizliyinin təmin edilməsi və sülh müqaviləsi üzərində işin aparılmasından gedir .
Ermənistan Qarabağ ermənilərini inandırmalı imiş
Lavrovun sözlərindən gəlinən qənaət budur ki, Ermənistan hakimiyyəti Qarabağ ermənilərini Azərbaycanın beynəlxalq hüquqdan irəli gələn prinsiplərə əməl edəcəyinə inandırmaq istiqamətində səylər göstərəcək. Sən demə, bu səylər ikincilərin Azərbaycan nümayəndələri ilə görüşə razılaşmağın zəruriliyini mümkün qədər tez başa düşmələri üçündür. Sanki 1988-ci ildə Qarabağda avantürist niyyətlər baş qaldıranda bölgənin erməni sakinlərinin mövqeyi nəzərə alınmışdı. Əlbəttə, nəzərə alınmamışdı. Bəlkə, indi onlardan nə isə soruşan var? Qətiyyən yoxdur. Deməli, Lavrov nəyi nəzərdə tutur?
Rusiya XİN rəhbəri onu da bildirir ki, Azərbaycan öz ərazisində yaşayan şəxslərə münasibətdə qarşılıqlı əsasda zəmanətləri verməyə hazırdır. Ermənilər də bütün konvensiyaların Ermənistanda yaşayan vətəndaşlara tətbiqi ilə bağlı eyni şeyi etməkdə problem görmürlər.
Əlbəttə, Lavrovun məsələləri bu qədər açıq qoyması bir ilkdir. Amma məsələnin qoyuluşuna diqqət yetirin. Ermənistan Qarabağ ermənilərini Azərbaycanın səmimiyyətinə inandırmalıdır. Bu, nə deməkdir? Axı, biz görürük ki, İrəvan bölgənin erməni əhalisinin hüquq və təhlükəsizliyini manipulyasiya predmetinə çevirir. İstəyir ki, bu məqam sülh müqaviləsində əksini tapsın. Azərbaycanın bununla razılaşmadığı gün kimi aydındır. Mövcud durumda Moskvadakı müzakirələrin faydalı keçdiyini söyləmək nə dərəcədə doğrudur?
Vurğuladığımız kimi, Rusiyanın baş diplomatı çətinliyi gizlətmir və dərhal da diplomatik manevr edərək başqa, yəni ənənəvi məsələyə keçir. O deyir ki, hazırkı mərhələdə ən yaxşı nəticə regionda nəqliyyat kommunikasiyalarının blokdan çıxarılması, Rusiyanın, Azərbaycanın və Ermənistanın baş nazirlərinin müavinlərinin rəhbərlik etdikləri üçtərəfli işçi qrupunda razılığın əldə olunmasıdır. Lavrovun fikrincə, bu kontekstdə nəqliyyat sektorunda artıq təkcə regional deyil, həm də daha geniş xarakter daşıyan layihələrin həyata keçirilməsi üçün də perspektivlər açılacaqdır.
Xalq diplomatiyasından sülhə yaxud, qeyri-müəyyənliyin “Lavrov formulu”
Bəli, göründüyü kimi, Lavrovun dili ilə ara-sıra sülh müqaviləsindən söz açan Rusiya özünün əvvəldə də ayrı-ayrı fraqmentlərini diqqətə çatdırdığımız gündəliyinə qayıtdı. Yəni, Kremlin baş diplomatı əvvəlcə əsas məsələdən – sülh müqaviləsindən danışdı, ardınca ənənəvi məsələlələrə keçid aldı. Yeri gəlmişkən, Rusiya XİN rəhbəri azərbaycanlı və erməni həmkarı ilə görüşdən əvvəl də olduğu kimi, sonra da həmin məqamları sadaladı. Azərbaycanın və Ermənistanın vətəndaş cəmiyyəti nümayəndələri və siyasi ekspertlər arasında dialoqun bərpasından danışdı. Hətta parlamentarilər arasında da üçtərəfli dialoqun başlanmasının zəruriliyinə toxundu.
Nəhayət, Lavrovun çıxışının ən əsas hissəsindən bəhs edək. O, tərəflərin Rusiya ilə yanaşı, digər vasitəçilərin də xidmətlərindən istifadəyə maraq göstərməsinin anlaşılan olduğunu yenidən bildirərkən müəyyən qədər xəbərdalıq dilində təxminən belə dedi: erməni və Azərbaycan xalqlarının mənafeyindən uzaq deyil, mətbuatda gözəl başlıqlar üçün, geosiyasi və daxili siyasi mülahizələr naminə süni razılaşmaların tətbiqinə cəhdlər göstərilməməlidir.
S.Lavrovun “süni razılaşmalar” dedikdə nəyi nəzərdə tutduğu aydındır. Deməli, Rusiya Azərbaycanın və Ermənistanın Qərb vasitəçiliyindən bəhrələnməsinə razı deyil. Razıdır, o halda ki, həmin formatdakı görüşlərdə nəticə əldə olunmasın, boş-boş danışıqlar getsin. 30 ilə yaxın müddətdə getdiyi kimi. Yəni, Rusiya XİN rəhbərinin təbirincə desək, mürəkkəb məsələlər qismində dəyərləndirimiş məqamlar müzakirə predmetinə çevrilməsin. Belədə sual yaranır: Rusiya iyulun 25-də XİN rəhbərlərinin görüşünü nə üçün təşkil etmişdi?
Cavab axtarmayaq, çünki bu sual da əvvəlkilər kimi ritorikdir...
Əvəz CAHANGİROĞLU,
“Xalq qəzeti”