Prezident İlham Əliyevin Çinin “China Media Group” media korporasiyasına verdiyi və “China Global Television Network” televiziya kanalında yayımlanmış müsahibəsində bir neçə məqam diqqətimizi çəkdi. Həmin məqamlardan biri çinli müxbirin ölkəsindəki məşhur atalar sözünü xatırlatması idi: “Ticarət dayananda, müharibələr başlayır.” Ardınca bildirdi ki, ticarət nə qədər çox olarsa, ölkə əhalisi üçün daha çox fürsətlər açılar. Bu deyimlərlə həmrəyliyini ifadə edən dövlətimizin başçısı vurğuladı ki, ticarət sabitliyi, təhlükəsizliyi möhkəmləndirir və müəyyən dərəcədə, sözün yaxşı mənasında, qarşılıqlı bağlılığı artırır: Bu şəraitdə, əlbəttə, sabitlik bərqərar olur”.
Bundan sonra çinli müxbirin Azərbaycan-Ermənistan münasibətlərinə keçid alması məntiqidir. Çünki hazırda bu münasibətlərin qaydaya salınmaması, normallaşmaması həm də ticarətə zərər vuran, onun qarşısını alan amil rolunda çıxış edir. Söhbət, əlbəttə ki, qlobal ticarətdən gedir. O ticarətdən ki, cənab İlham Əliyev müsahibəsində onun müxtəlif tərəflərindən, mövcud müstəvidə Azərbaycanın oynadığı roldan, ölkəmizin mövqeyindən, maraq və mənafelərindən, kifayət qədər əhatəli söz açdı...
Məlumdur ki, Azərbaycan 44 günlük müharibədə məğlub etdiyi, rüsvayçı duruma saldığı Ermənistana əl uzadıb, ölkəni sülhə dəvət edib. Həm Prezident İlham Əliyevin, həm də dövlət rəsmilərimizin açıqlamalarında İrəvanın bölgədəki iqtisadi inkişafdan öz payını götürəcəyi fikri üzərində dayanılıb. Yəni dolayısı ilə Azərbaycan Ermənistan üçün böyük ticarət şansının, gəlir mənbəyinin yaranacağını vurğulayıb. Nəzərə alaq ki, Bakı zaman-zaman İrəvanın Zəngəzur dəhlizi kimi nəhəng layihəyə qoşulmasının mümkünlüyü məsələsini də qabardıb. Bir sözlə, Azərbaycan savaş yerinə ticarət, əməkdaşlıq formulunu prioritet götürüb və bu məramını bütün beynəlxalq platformalarda açıqlayıb, təminat verib.
Lakin Ermənistandan adekvat münasibət yoxdur. Əksinə, ölkənin rəhbərliyinin, eləcə də xaricdəki erməni lobbi və diaspor təşkilatlarının reallıqları dəyişmək, avantürist mövqe tutmaq cəhdlərinin şahidiyik. Nəticədə çinli müxbirin də vurğuladığı kimi, atəşkəs mövcuddur, lakin vəziyyət mürəkkəb olaraq qalır. Bu mənada onun dövlətimizin başçısından sülh müqaviləsinin nə zaman imzalanacağını soruşması məntiqidir. Çünki jurnalist təmsil etdiyi ölkənin regiondakı qlobal iqtisadi maraqlarından xəbərdardır. O yaxşı bilir ki, həmin maraqlar Cənubi Qafqazda dayanıqlı sülhün yaranmasını, belə demək mümkünsə, diktəyə çevirib. Bu yerdə “China Media Group” media korporasiyasının müxbirinin cənab İlham Əliyevə daha əvvəl ünvanladığı bir suala da nəzər salaq: “Məndə çox maraqlı məlumatlar var ki, Sizinlə bölüşmək istərdim. Oradan görünür ki, Çindən Avropaya göndərilən mallar dənizlə orta hesabla 36 gün çəkir, əgər siyasi məsələlər olmasa, Transsibir marşrutu ilə 20 gün çəkir və Bakı-Tbilisi-Qars dəmir yolundan istifadə edərək, Orta Dəhlizlə isə cəmi 12 gün çəkir”.
Diqqət yetirək, çinli media təmsilçisi, bilavasitə gün məsələsindən söz açır. O, yaxşı dərk edir ki, genişlənməkdə və şaxələnməkdə olan Çin iqtisadiyyatı üçün satış bazarları önəmli faktordur, bu, öz yerində. Əsas məsələ malların həmin bazarlara, yəni istehlakçılara maksimum tez bir zamanda çatdırılmasıdır. Axı hər gün maliyyə deməkdir. Bir günün itirilməsi isə maliyyənin itirilməsidir. Deməli, çinli müxbirin Prezident İlham Əliyevdən Ermənistanla sülh müqaviləsi haqqında nə düşündüyünü, həmin müqaviləni nə vaxt gözləməyin mümkünlüyünü soruşması adi sual deyil, eyni zamanda Çinin strateji maraqlarından irəli gələn məsələdir.
Prezident İlham Əliyev müsahibəsində Ermənistanla sülhə ən yaxın gələcəkdə nail olmağın mümkünlüyünü bildirib: “Nəyə görə mən bu cür düşünürəm, çünki Ermənistan çox mühüm bəyanatla çıxış etməli idi ki, onlar nəinki Azərbaycanın ərazi bütövlüyünü tanıyırlar, – əslində, onlar bunu rəsmən ötən ilin oktyabrında bəyan etdilər və sonra bir neçə dəfə təsdiqlədilər, – həmçinin bu ilin mayında onlar bunu aydınlaşdırdılar. Çünki biz tələb etdik ki, onlar Qarabağı Azərbaycanın hissəsi kimi tanıdıqlarını qeyd etsinlər. Onlar Azərbaycanın ərazi bütövlüyünü 86,6 min kvadratkilometr ərazidə tanıdılar. Bu əraziyə Qarabağ və Ermənistan ərazisində olan səkkiz Azərbaycan anklavı da daxildir. Bu, əslində, mühüm bəyanatdır. Bundan sonra qalan yeganə məsələ, bunu kağız üzərinə köçürmək və imzalamaqdır”.
Göründüyü kimi, bir məsələ qalıb – dildə bəyan edilənlərin kağız üzərinə köçürülməsi. Ancaq çinli müxbirin də vurğuladığı kimi, bu xüsusda mürəkkəblik var. Əslində durum, ilk baxışdan Azərbaycanla Ermənistan arasında sülh müqaviləsi üçün müsbət zəminin olmadığından xəbər verir. Görürük ki, Ermənistan çeşidli təxribatlara əl atır, anti-Azərbaycan ritorikasını işə salır, İkinci Qarabağ müharibəsindən sonra Cənubi Qafqaz regionunda formalaşmış reallıqları saymazdan gəlməyə cəhd göstərir. Əlbəttə, onu da nəzərə almalıyıq ki, Ermənistan hakimiyyəti müharibədən ötən iki il yarımdan artıq müddətdə indi dilə gətirdiklərini deməmək üçün çox çalışıb, ancaq yekunda Azərbaycanın mövqeyi ilə razılaşmaq məcburiyyətində qalıb.
Heç şübhəsiz, ölkə sülh müqaviləsi imzalayacaqsa, bu, onun istəyinin nəticəsi kimi meydana çıxmayacaqdır. Ancaq bizim rəsmi İrəvanın, eləcə də erməni cəmiyyətinin nə zaman səmimiyyət notlarına köklənəcəyini gözləməyə vaxtımız yoxdur. Üstəlik, erməni qövmünün heç vaxt səmimi olmadığını təsdiqləyən tarix var. Deməli, nəticəyə gəlirik ki, sülh müqaviləsi imzalanacaqsa, bu, Ermənistan hakimiyyətinin, necə deyərlər, başına-gözünə döyməklə gerçəkləşdirəcəyimiz proses kimi dəyərləndiriləcəkdir. Çox güman, çinli müxbir, böyük anlamda götürsək, Çin dövləti bunu bilməmiş deyil. Hər bir halda cənab İlham Əliyev izah edir və bildirir ki, İkinci Qarabağ müharibəsi bitdikdən sonra, sülh müqaviləsi ilə bağlı ölkəmizin mövqeyi həmin müqavilənin beynəlxalq hüququn norma və prinsiplərinə əsaslanmasından ibarətdir: “Biz sülh müqaviləsinin əsasını təşkil etməli olan beş beynəlxalq təməl prinsipini hazırladıq. Bir neçə dəfə danışıqlar aparılıb və iyunun sonunda davam etdiriləcək. Fikir ayrılığının yeganə əsas müddəası onunla bağlı idi ki, Ermənistan Qarabağı rəsmən Azərbaycanın hissəsi kimi tanısın. Artıq dediyim kimi, bir – onlar qeyd etməlidir ki, Qarabağ Azərbaycandır və indi isə, onlar ikincini etməlidirlər: imzalamalıdırlar”.
Əlbəttə, Azərbaycan Prezidenti Çinin media qurumuna müsahibəsində indiyədək keçilmiş yola, təcrübəyə diqqət yetirərək, sülh müqaviləsinin imzalanmasına maneçilik motivlərini də açıqlayır. Ermənistanın siyasi manevr, prosesi yubatmaq cəhdlərindən söz açır. Ancaq cənab İlham Əliyev dəfələrlə vurğulayıb ki, İrəvan gec-tez sülh müqaviləsini imzalamağa məcbur olacaq.
Buna görə dövlətimizin başçısı müsahibəsində perspektiv sülh mühitinə baxışını ifadə edir. Azərbaycan Prezidenti bildirir ki, sülh müqaviləsi, həqiqətən, mühüm geosiyasi amilə çevrilə bilər, uzunmüddətli qarşıdurmaya son qoyar. Qafqazda real sülhün formalaşması isə həm də bütün kommunikasiyaların açılması anlamı verən hadisədir.
Deməli, yekun nəticəyə gəlirik ki, hazırda Cənubi Qafqazda region ölkələrinin, həmçinin Çinin də maraq və mənafelərindən irəli gələn ab-havanın formalaşması üçün zəmin var. Azərbaycan göstərir ki, mövcud durumun qərarlaşması naminə üzərinə düşən hər şeyi edir, bütün iddiaları cavablandırır, çətinliklərə sinə gərir.
Bəli, ölkəmiz Ermənistan tərəfindən gətirilən “arqumentləri” cavabsız qoymamaqla göstərmək istəyir ki, sülh gündəliyinə sadiqdir. Əlbəttə, bu gündəlik suveren haqlarımızı ikinci plana atmamalıdır. Rəsmi Bakı heç bir halda imkan verə bilməz ki, Qarabağda erməni avantürizmi üçün şans yaransın. Buna görə Prezident İlham Əliyev Çinin nüfuzlu media qurumuna müsahibəsində bildirir: “Həmçinin əlavə etmək istəyirəm, Azərbaycandakı erməni azlığına gəldikdə, biz artıq rəsmən bəyan etmişik ki, onların hüquqları və təhlükəsizliyi Azərbaycan Konstitusiyası əsasında lazımınca qorunacaq. Bununla belə, Azərbaycan onlarla etnik qrupun, o cümlədən ermənilərin yaşadığı ölkədir. Bizim dini və ya etnik zəmində heç zaman hər hansı problemimiz olmayıb. Buna görə, Azərbaycanın Qarabağ bölgəsində yaşayan ermənilər hər hansı digər Azərbaycan vətəndaşı qədər bərabər hüquq və təhlükəsizlik zəmanətinə malik olacaqlar. Düşünürəm ki, bu, tam şəkildə beynəlxalq hüququn normalarına uyğundur və fikrimcə, Azərbaycanın bu mövqeyi beynəlxalq ictimaiyyət tərəfindən dəyərləndirilir”.
Sonda onu da deyək ki, Azərbaycan Prezidenti İlham Əliyev hər zaman, xüsusən də 44 günlük müharibədən sonra yaşadığımız Cənubi Qafqaz coğrafiyasını qlobal əməkdaşlıq platforması kimi xarakterizə edən fikirlər səsləndirməsi ilə gündəmə gəlib. Dövlətimizin həm bu müsahibədə, həm də 2023-cü il iyulun 21-23-də keçirilmiş Şuşa Qlobal Media Forumunda sualları cavablandırarkən bildirdikləri fikirlərlə, həmin əməkdaşlıq platformasının, bir növ, yol xəritəsini çəkmiş oldu. Bu yanaşma əməkdaşlığı nifaqa, mənfəəti təfriqəyə, gəliri təxribat meyillərinə, faydanı separatçılığa, nəhayət, tərəqqini və inkişafı düşmənçilik təmayüllərinə qarşı qoyan nəhəng, uzaqgörən düşüncə tərzidir. Hazırda Ermənistan cəmiyyətinin də bu düşüncənin gətirəcəyi imkanlardan faydalanmaq şansı var. Haylar nəzərə almalıdırlar ki, şans, birincisi, hər zaman ələ düşmür, ikincisi, istifadə edilmədikdə üz döndərir.
Ə.CAHANGİROĞLU, “Xalq qəzeti”