Qərbi Azərbaycan İcmasının təşkilatçılığı ilə dünən Göygöl rayonunda “Qərbi Azərbaycanın Basarkeçər rayonunun Zod icmasının ümummilli lider Heydər Əliyevin 100 illiyinə həsr olunmuş “Tarixi torpaqlarımıza mütləq qayıdacağıq” mövzusunda konfransı keçirilib.

İcmadan qəzetimizə bildiriblər ki, Heydər Əliyev Mərkəzində keçirilən konfransı giriş sözü ilə açan Göygöl Rayon İcra Hakimiyyətinin başçısı Elvin Paşayev Ulu öndərin dövlət qu­ruculuğundan və Azərbaycanın tarixi torpaqlarının işğaldan azad olunma­sından, ölkə iqtisadiyyatının inkişafı ilə bağlı gördüyü nəhəng işlərdən, Göygöl rayonunun sosial-iqtisadi cəhətdən in­kişafına göstərilən dövlət qayğısından danışıb. 

Qərbi Azərbaycan İcmasının İdarə Heyətinin sədri, Milli Məclisin depu­tatı Əziz Ələkbərli Qərbi Azərbaycan məsələsinə ulu öndər Heydər Əliyevin həssas münasibətini qeyd edib. O, qeyd edib ki, Heydər Əliyevin Qərbi Azərbaycan məsələsi ilə bağlı tutdu­ğu mövqe, əsasını qoyduğu siyasət bu gün Prezident İlham Əliyev tərəfin­dən layiqincə və uğurla davam etdirilir. QAİ-nin yaradılması və fəaliyyətinin təşkilinə göstərilən qayğı barədə da­nışan icma rəhbəri Qərbi Azərbaycan məsələsinin dünya ictimaiyyətinin diqqətinə çatdırılması istiqamətində görülən işlər, Qayıdış Konsepsiyasının mahiyyəti haqqında məlumat verib. 

Tədbirdə Qərbi Azərbaycan İcması Ağsaqqallar Şurasının sədri, Milli Məclisin deputatı, akademik Əhliman Əmiraslanov ulu öndər Heydər Əliyevin Azərbaycan dövlətçiliyinin qorunub saxlanılmasındakı rolundan, Qərbi Azərbaycan məsələsinə dair əsasını qoyduğu siyasi kursun mahiyyətindən bəhs edib. 

İcma ağsaqqalı Azadxan Haqverdi­yev və Əməkdar müəllim Dilarə Qazı­yeva çıxışlarında Zod kəndindən olan insanların ağır qaçqınlıq həyatından danışıb, əhalinin Qərbi Azərbaycana qayıdacağına güclü inamını ifadə edib­lər. 

Zod icmasının üzvlərinin fikirləri əsasında akademik Əhliman Əmiras­lanovun Zod kənd icmasının rəhbəri seçilməsi təklifi yekdilliklə dəstəklənib. 

“Xalq qəzeti”