Rusiyanın Xarici işlər naziri Sergey Lavrovun Kollektiv Təhlükəsizlik Müqaviləsi Təşkilatı Xarici İşlər Nazirləri Şurasının iyunun 20-də keçirilmiş iclasının yekunları ilə bağlı jurnalistlərə açıqlamasında səsləndirdiyi fikirlər, əslində, yenilik deyil. Məlumdur ki, Moskva Azərbaycan-Ermənistan münasibətlərinin nizamlamasının Qərb formatına qısqanclıqla yanaşmaqdadır. Xüsusi məqam isə ondan ibarətdir ki, Lavrov bunu Rusiyanın hazırda danışıqlar prosesinə real töhfəsinin olmadığı şəraitdə dilə gətirir. O şəraiti yaradan isə Ermənistandır. Kreml isə sanki “Axırıncı aşırım” filmindəki Kərbalayi İsmayıl obrazıdır. Qəmlo demişkən, o, Şura hökumətinin, indiki halda Ermənistanın nazı ilə çox oynayır.
Ancaq məsələdəki dramatizm bununla məhdudlaşmır. Lavrov əvvəlki açıqlamalarında daha çox Qərb vasitəçiliyi xəttinin aktivləşməsinə görə İrəvanı günahlandıran eyhamlar vururdusa, hazırda belə nəticəyə gəlmək olar ki, tərəzinin gözünə Azərbaycanı da qoyub. Diqqət yetirək və görək Rusiya XİN rəhbəri nə deyir: “Ermənistan və Azərbaycan anlamalıdırlar ki, Qərbin onlar arasında sülh yolu ilə nizamlamaya kömək etmək üçün səmimi istəyi yoxdur”.
Belədə dərhal bir sual meydana çıxır: Rusiya səmimidirmi? Yaxud, ölkə 44 günlük müharibədən sonrakı nizamlama prosesində səmimi davranıbmı? Yaxşı, bunu da bir kənara qoyuruq. Moskva Azərbaycan-Ermənistan danışıqlarının davam etdiyi 30 ilə yaxın müddətdə hansı səmimiyyəti nümayiş etdirib? Hələ biz nisbətən uzaq tarixə getmirik. Halbuki getməliyik. Nəzərə almalıyıq ki, o tarix həm də Rusiyanın tarixidir. Yəni, işğalçılıq tarixidir və bu, həm də erməni qövmünün Azərbaycan torpaqlarına Rusiya tərəfindən məqsədli şəkildə yerləşdirilməsinin tarixidir.
Əlbəttə, cənab Lavrovun diqqətinə 1813 və 1828-ci illərin Gülüstan və Türkmənçay müqavilələrini də çatdıra bilərik. Bilirik cavabını. Çox güman, deyəcək ki, ağlınız olardı, işğalla üzləşməzdiniz və haqlı da çıxacaq. Eynilə 30 ilə yaxın müddətdə də vasitəçilik adı ilə Rusiya bu deyimi bizə sırımaqdan başqa bir iş görmədi.
Ancaq Rusiya ötən müddətdə, dolayısı ilə işğalla barışmağımızı da istədi. Bunun üçün müxtəlif açıq və qapalı təzyiq üsullarına baş vurdu. Soyuq yanaşdıq, ölkənin belə mövqeyini qeyri-səmimi, dostluğa zidd davranışın nəticəsi kimi qiymətləndirmədik. Nəhayət, düşündük ki, qlobal siyasət deyilən bir məsələ var və bu siyasətdə gərək yıxılmayasan. Biz 30 il əvvəl böyük ölçüdə yıxılmışdıq. Ayağa qalxdıq. Düşündük ki, özümüz yıxılmışıqsa, ağlamamalıyıq.
Lavrovun şəxsində isə Rusiya bu gün ağlamaqla məşğuldur. Vaxtilə Cənubi Qafqaza pərçimlədiyi erməni qövmünün əlində qalıb, bilmir nə etsin. Tutaq ki, Ermənistan nəyisə anlamalı imiş. Azərbaycanın anlamalı olduğu nədir? Özünün əzəli və əbədi torpağı olan Qarabağın taleyini müəyyənləşdirməyi Rusiyanın sonraya saxlamaq niyyətinimi? Bəlkə, Ermənistanın güclənib yenidən üstümüzə şığımasını gözləyək?
Əslində, Ermənistan da nəyisə anlamaq məcburiyyətində deyil. Ölkənin baş naziri deyir ki, Qarabağ da daxil olmaqla, 86,6 min kvadratkilometr ərazidə Azərbaycanın suveren hüquqlarını tanıyır. Burada baş sındırılacaq nə isə yoxdur. Görəsən, Rusiya düşünür ki, Nikol Paşinyanın bunu deməməli idi? Belə yanaşma nə dərəcədə səmimidir? Keçək, Rusiya XİN rəhbərinin digər fikrinə. “Təəssüf ki, indi ABŞ-ın və Avropa İttifaqının gördüyü işlərdə biz artıq danışıqlara kömək etmək arzusunu yox, regiona nüfuz etmək istəyini və Rusiya Federasiyasının qanuni maraqlarına təzyiq göstərmək, burada demək olar ki, həlledici rol oynayacaq bəzi qüvvələr kimi özünü təsdiqləmək istəyini görürük”, – deyə Lavrov bildirir. Azərbaycan öz qanuni haqqını istəyir. Bizə nə dəxli var ki, Avropa İttifaqı və ABŞ hansı məqsədi güdür? Bu yerdə də Azərbaycanla Ermənistanı eyniləşdirmək, əsla düzgün deyil.
Birincisi, Bakı illərdir balanslı siyasətinə sadiqdir. Yəni, heç bir halda özünü hansısa qlobal gücün mübarizə plasdarmı kimi görmək istəməyib. Heç indi də belə bir niyyəti yoxdur. Qərbin “altına yıxılıb” nankorluq edən Ermənistandır ki, onu da 30 ilə yaxın müddətdə bəsləyən məhz Rusiya olub. İrəvana görə Bakının qanuni istəklərinə üz çevirən axtarsaq, yenə Moskvanı görürük...
Qanuni maraqları var imiş! Harda yazılıb o qanun? Varmı elə bir sənəd ki, Cənubi Qafqazın Rusiyanın olduğunu təsdiqləsin? Qanuni haqq parçalayıb hökm sürməkdirmi? Cənubi Osetiya, Abxaziya, Dnestryanı, indi də Qarabağ?.. İstəmir də Ermənistan. Paşinyan daha necə deməlidir? Sərhəddə – Həkəri çayı üzərindəki körpüdə Azərbaycan hərbçisinə güllə atılır, Ermənistan Xarici İşlər Nazirliyi Rusiyanın ölkədəki səfirini çağırtdırıb deyir ki, məsələ sizlikdir. Yəni, təxribata görə, günahı Moskvada görür. Rusiya səfiri də XİN-dən çıxıb münaqişənin ancaq üçtərəfli bəyanat əsasında həllini rəhbər tutduğunu deyir. Faktiki olaraq, ittihamı üzərinə götürür. Budurmu səmimiyyət? Yaxşı, hərbçimizə güllə atan kim imiş?..
Rusiya 44 günlük müharibədən sonra yaxşı şans qazanmışdı ki, ədalətli vasitəçi olsun. Ölkə nə etdi? Özünün ermənipərəstlik duyğularına meydan tanıdı. İstədi ki, ondan üz döndərmiş İrəvana, necə deyərlər, şirinlik etsin. Alınmadı. Nə Paşinyan buna getdi, nə də böyük ölçüdə Ermənistanın ictimai rəyi. Nəticədə pusquda dayanmış Qərb bölgəyə yaxınlaşmağa başladı ki, həmin yaxınlaşmanın səbəbkarı yenə İrəvan oldu.
Bakı Azərbaycan-Ermənistan sərhədinin öz tərəfinə avropalı müşahidəçilərin gəlməsinə imkan vermədiyi – öz çapında Rusiyanın maraqlarını nəzərə aldığı, oyun qaydalarını pozmadığı halda, Paşinyan administrasiyası məsələ ilə ikiəlli razılaşdı. Bu gün də həmin missiya fəaliyyətdədir və Rusiyanın duruma təsir göstərəcək hansısa vəsiləsi yoxdur. Amma deyəsən, var. Qarabağda olan hərbi kontingent. Bölgədəki erməni separatizmi üçün silah-sursat daşınmasını müşahidə və müşayiət edən kontingent! Adları da var – sülhməramlı. Bəlkə, Lavrovun nəzərdə tutduğu səmimiyyət budur?
Bəli, Lavrov onda haqlıdır ki, Qərbin hərəkətləri onun “NATO və Aİ üzvlərinin sərhədlərindən uzaqda yerləşən regionlara genişlənmək istəyini əks etdirir və bunun vəziyyətin sabitləşməsinə kömək etmək üçün səmimi istəklə heç bir əlaqəsi yoxdur”. Həqiqətən, Qərb Ukraynada da elə etmişdi, yenə də eyni qaydada davam edir. Məsələ tam aydındır. Ancaq bunun Azərbaycana nə dəxli? Ölkəmiz Qarabağda hüquqi hakimiyyətini təmin etmək, haqqı olana sahiblənmək niyyətindədir. Rusiyanın əraziyə göndərdiyi Ruben Vardanyan kimi şarlatanlar isə Qarabağı müstəqil dövlət qismində görürlər. Moskvadakı bir sürü ekspert isə deyir ki, sən demə, Qarabağ erməniləri rusmeyilli imişlər, Paşinyan hakimiyyəti Rusiyaya qarşı çıxmaq üçün onları Azərbaycanın ixtiyarına verir. Belə bir absurdu düşünüb dövriyyəyə gətirmək hansı səmimiyyətin məhsulu ola bilər?
Burada yenə əvvəl vurğuladığımız məqama qayıdaq və diqqətə çatdıraq ki, Moskva 44 günlük müharibəyə son qoyan 10 noyabr 2020-ci il tarixli üçtərəfli Bəyanatın imzalanmasına nail olmaqla, regionda üstünlük qazanmışdı. Hətta, Qərb də onun sülhyaratma missiyasını alqışlamışdı. Bəs sonra nə oldu? Bu barədə danışdıq, yenidən üzərinə gəlmək istəməzdik. Ancaq Sergey Lavrovun növbəti fikirlərinə diqqət yetirməliyik. O deyir: "Biz digər beynəlxalq oyunçuların vasitəçilikdə əlini sınamasına qarşı deyilik... Əsas odur ki, bu vasitəçilik erməni və Azərbaycan xalqlarının, Ermənistan və Azərbaycan dövlətlərinin maraqlarının balansını əks etdirəcək razılaşmaların təmin edilməsi məqsədini güdməlidir”.
Nə maraq? Lavrov ziddiyyətli danışır, özünü faş edir. Bir tərəfdən deyir ki, “NATO və Aİ üzvlərinin sərhədlərindən uzaqda yerləşən regionlara genişlənmək istəyini əks etdirir və bunun vəziyyətin sabitləşməsinə kömək etmək üçün səmimi istəklə heç bir əlaqəsi yoxdur”, digər tərəfdən də xalqların marağından danışır. Bəs, Rusiya hansını seçir? Sual ritorikdir, çünki cavab bəllidir – birincini. Moskvanın xalqların maraqlarını təmin etmək kimi bir niyyətinin olduğu nağılına nə Ermənistanda, nə də Azərbaycanda inanan var.
Təsəvvür edin ki, o boyda Rusiyanın Cənubi Qafqazdakı “mövcudiyyət qalası” qismində Qarabağdakı erməni separatizmi görünürsə, hansı inamdan danışmaq mümkündür. Bu gün Azərbaycan Ermənistanın başına-gözünə döyə-döyə məcbur edir ki, separatizmdən əlini üzsün. Bunu hansı platformada gerçəkləşdirir, Qərbdə, ya Şərqdə heç fərqi yoxdur. Əsas odur ki, bacardığını edir, haqqına sahib çıxır. İndi Lavrov da durub xalqların və dövlətlərin maraqlarından dəm vurur. Halbuki ortada böyük haqq – Azərbaycanın haqqı var. O haqq ki, 30 ilədək müddətdə, obrazlı desək, boynuna kəndir salıb o tərəf-bu tərəfə fırladan Qərblə yanaşı, elə Rusiyanın özü də olmuşdu. Bu idimi səmimiyyət?
Sonda Lavrovun özünəməxsus səmimiyyət nümayişinin Azərbaycanı və Ermənistanı anti-Qərb ovqatına kökləmək motivindəki bir məqama da diqqət yetirək. Rusiya XİN başçısı ümid edir ki, Kremlin mövqeyini həm İrəvandakı, həm də Bakıdakı tərəfdaşları başa düşürlər. “Biz ən azı onlarla açıq şəkildə baş verənləri müzakirə edirik”. Görək, Cənubi Qafqaz xalqlarının maraq və mənafelərini düşündüyünü bildirən Kremlin xarici siyasət idarəsinin rəhbərinin fikri nədir? Çünki açıq danışmır. Yəni, demək istəyir ki, sülhə gəlməyin, bir-birinizi qırmağa davam edin? Yox, Lavrov belə pis fikrə düşməz. O, sülh istəyir, axı...
Ə.RÜSTƏMOV, “Xalq qəzeti”