“Türkiyədə mayın 28-də keçirilən prezident seçkilərinin ikinci turunda AKP lideri Rəcəb Tayyib Ərdoğan parlaq qələbə qazandı. Bu, son dərəcə böyük əhəmiyyəti olan tarixi uğurdur!”
Bu fikirləri “Xalq qəzeti”nə Türkiyənin hakim Ədalət və İnkişaf Partiyasının (AKP) İstanbuldan olan millət vəkili Şamil Ayrım bildirib. Son prezident və parlament seçkilərini dəyərləndirən millət vəkili deyib ki, seçki sakit, qalmaqalsız başa çatdı: “Biz Avropaya və bütün dünyaya demokratik seçki necə keçirilir, bunu nümayiş etdirdik”.
Millət vəkilinin sözlərinə görə, Türkiyə Cümhuriyyəti tarixində ilk dəfə bu qədər böyük tərkibli ittifaqlar seçki kampaniyası aparıb:
“Nəticələrdən də görünən odur ki, “Cümhur İttifaqı” çox məhsuldar fəaliyyət göstərib. Prezident Rəcəb Tayyib Ərdoğan seçki kampaniyası zamanı Türkiyəni qarış-qarış gəzdi. Millət vəkilliyinə namizədlər də yerlərdə aktiv bir seçki kampaniyası nümayiş etdirdi. Nəticədə xalqımızın milli iradəsi qalib gəldi. Türkiyə Böyük Millət Məclisində (TBMM) yenə də böyük üstünlüyü AK Partiyadan olan millət vəkilləri qazandı. Bu, çox önəmli bir məsələdir”.
Şamil Ayrım, yeni dönəmdə TBMM-də həyata keçirilməsi nəzərdə tutulan layihələrə də toxundu: “Bu layihələr arasında Azərbaycanla bağlı məsələlərə böyük əhəmiyyət verilir. Türkiyənin həll olunması lazım olan bəzi problemləri var ki, bu “Cümhur İttifaqı” vasitəsilə həll ediləcək. Zəngəzur dəhlizinin açılması məsələsi gündəmimizdə ən vacib məsələlərdən biri olacaq. Ermənistanın yanlış davranışına qarşı ciddi mübarizə aparacağıq”.
Millət vəkili seçki kampaniyası müddətində başda Prezident İlham Əliyev olmaqla Azərbaycan xalqına göstərdiyi həmrəylik, diqqət və qayğıkeşliyə görə minnətdarlığını bildirdi.
Qeyd edək ki, Şamil Ayrım Türkiyə Parlamentində təmsil olunan Azərbaycan əsilli millət vəkilidir. İkinci azərbaycanəsilli millət vəkili isə AKP-nin Iğdırdan yeni seçilən namizədi Cantürk Alagözdür.
M.SULTANOVA,
Ankara
