Qardaş Türkiyədə səs vermək hüququ olan vətəndaşlar cəmi üç gündən sonra “sandıq başı”na keçərək prezidentliyə bu və ya digər layiq bildiyi namizədin lehinə səs verəcəklər. Hər bir seçim böyük dəyər kəsb edir. Bütövlükdə, xalqın doğru və ədalətli seçimi sayəsində qazanan Türkiyə olacaq!
Bu seçkilər təkcə Türkiyə üçün deyil, bütün region, eləcə də geniş bir coğrafiyada yerləşən böyük türk dünyası üçün taleyüklü əhəmiyyət daşıyır. Təsadüfi deyil ki, ölkə mediası 14 may seçkilərini “Əsrin seçimi” adlandırır. Zərrə qədər şübhə etmirik ki, müdrik türk xalqı seçkilərdə ən doğru seçimini edəcək.
İndi ölkədə son dərəcə həssas durum yaranıb. Hamı məhz öz seçimini ən doğru və alternativsiz hesab edir. Bu, ona dəlalət edir ki, cəmiyyətdə siyasi cəhətdən qütbləşmə yaranır. Bu, təhlükəli tendensiyadır. Çünki təxribatçı ünsürlər gərginlikdən sui-istifadə edə bilərlər. Lakin iqtidar lazımi təhlükəsizlik tədbirləri həyata keçirir.
Təhlilçilər bildirirlər ki, ölkədə seçkisonrası mümkün qarşıdurmalara ciddi zəmin yoxdur. Türkiyədə sivil, fəal vətəndaş cəmiyyəti formalaşıb. Özəl seçim hər kəsin təməl haqqıdır. Bu haqqı heç kəs onun əlindən ala bilməz. Türk xalqı heç vaxt seçki saxtakarlığına qol qoymayıb. Burada çox yüksək seçki mədəniyyəti formalaşıb.
Ankaradakı Bilkənd Universitetinin professoru, tanınmış politoloq Əmrulla Məmmədli qeyd edir ki, 14 may seçkilərində yüksək seçici fəallığı hiss olunacaq. Son bazar günü “Cümhur İttifaqı”nın lideri Rəcəb Tayyib Ərdoğanın iştirakı ilə keçirilən toplantıya bir milyondan çox insan qatılıb. “Millət İttifaqı”nın rəhbəri Kamal Kılıçdaroğlunun da seçicilər ilə görüşləri izdihamla keçir.
Prezidentliyə namizədlər əvvəlcədən nəzərdə tutulan cədvəl üzrə ölkənin ictimai televiziyası -- TRT vasitəsilə seçicilərə müraciət edir, bu zaman öz proqramlarını şərh edir, arzu və təkliflərini dilə gətirirlər. Namizədlər son bazar axşamı telekanalın tribunasından növbəti dəfə çıxış ediblər. Bu çıxışlar ölkə və qlobal mediada geniş müzakirə edilir.
Hazırkı dövlət başçısı Rəcəb Tayyib Ərdoğan seçiciləri AKP-nin “Güvən və sabitlik” proqramına səs verməyə çağırıb. O, iqtidarın hazırda bütün sahələrdə, o cümlədən iqtisadi, müdafiə, insan haqları və s. istiqamətlərdə həyata keçirdiyi geniş islahatlardan da danışıb.
Deyib ki, seçicilər özlərinin və övladlarının xoşbəxt gələcəyi naminə doğru seçim etməlidirlər. AKP son 21 ildə 15 dəfə seçkilərdə qalib gələrək insanların etimadını qazanıb. R.T.Ərdoğanın fikrincə, iqtidar bundan sonra da bütün çətinliklərin və çağırışların öhdəsindən gəlməyi bacaracaq.
Natiq çıxışında sonra vurğulayıb ki, onun hakimiyyətinin ən böyük uğuru insanların şüur və düşüncə tərzlərini dəyişdirməyi bacarmasıdır. Bu, şüurlarda baş verən inqilabdır. Bu gün Türkiyədə heç kim dini inancına və etnik mənsubiyyətinə görə təqib olunmur, özünü cəmiyyətdə unudulmuş və təcrid edilmiş hiss etmir.
R.T.Ərdoğan deyib: “Heç kim Əziz Səncərin, Uğur Şahinin, Rza Kayalpın, yaxud Səlcuk Bayraqdarın etnik mənsubiyyəti ilə bağlı sual etmir. Məhz şüurlarda baş verən inqilab sayəsində Türkiyə yaxın gələcəkdə daha möhtəşəm uğurlar qazanacaq!”
Qeyd edək ki, yuxarıda adları çəkilən məşhur isimlər müvafiq olaraq Nobel mükafatı laureatı, COVİD-19 peyvəndinin yaradıcısı, güləş üzrə dünya çempionu və insansız uçuş aparatının yaradıcısıdır. Reallıq budur ki, Türkiyə bu gün böyük və güclü dünya dövlətidir!
CHP lideri Kamal Kılıçdaroğlu isə çıxışında TRT-ni “hakim partiyanın yayımçısı” adlandırıb. Ana müxalifətin lideri seçicilərə müraciətlə deyib: “Qarşıdakı seçkilər bütün 85 milyon insanın seçkisidir. Siz 14 mayda mənə yox, ədalətə səs verəcəksiniz”.
“Məmləkət” Partiyasından prezidentliyə namizəd Məhərrəm İncə də çıxışında TRT-yə ittihamlar yağdırıb. O, hökuməti dövlət qurumlarının işinə müdaxilə etməkdə, bununla da həmin idarələrin öz funksionallığını itirməsinə səbəb olmaqda suçlayıb. Bildirib ki, ölkədə nəzarətdən çıxan kəskin qaçqın problemi yaranıb ki, bu da Türkiyənin ictimai-siyasi həyatı üçün böyük təhdiddir.
M.İncə həmçinin bildirib ki, onun rəhbərlik etdiyi partiya nə sağçı, nə də solçudur. Bu partiya Böyük Atatürkün müəyyən etdiyi yolla gedir: “Atatürk ölkəni necə idarə edibsə, eləcə də biz idarə edəcəyik!”. O, terrora qarşı güzəştsiz mübarizə aparacağını, PKK-dan tutmuş FETÖ-yə qədər hər kəsi yerində oturdacağını bildirib. Xarici siyasətdə isə Avropa İttifaqı ilə üzvlük danışıqlarının davam etdirilməsinin vacibliyini söyləyib.
ATA İttifaqından prezidentliyə namizəd olan Sinan Oğan isə çıxışı zamanı bildirib ki, onun seçki platformasında bir prioritet var. O, qalib gələcəyi təqdirdə ilk növbədə suriyalı və bütün qaçqınların geri qayıtmaları üçün əmr imzalayacaq. Belə ki, Türkiyənin daxili nizamını pozmaq olmaz! S.Oğan sonra bildirib ki, 14 may seçkiləri Türkiyənin gələcək taleyini həll edəcək. O, seçicilərə müraciətlə deyib: “Siz qarşıdakı bazar günü 13 milyon qaçqının Türkiyədə qalıb-qalmamasına səs verəcəksiniz!”.
Sonda bildirək ki, prezidentliyə namizədlər TRT-də son dəfə iki gün sonra, mayın 13-də axşam çıxış edəcəklər.
M.HACIXANLI, “Xalq qəzeti”