Bugünlərdə Ermənistanın sabiq müdafiə naziri, parlamentdəki müxalif “Ermənistan” farksiyasının rəhbəri Seyran Ohanyan Qarabağ erməniləri ilə bağlı yeni çağırış səsləndirib. Belə ki, Ohanyan parlamentdə İsveçrənin Ermənistandakı səfiri ilə keçirilən görüşdə Qarabağ ermənilərinin öz müqəddəratını təyin etməsinin vacibliyinə toxunub. O, qeyd edib ki, “Artsax xalqı” yalnız beynəlxalq təhlükəsizlik zəmanəti verildiyi təqdirdə Qarabağda özünü təhlükəsiz hiss edə bilər.
Hərbi uğursuzluğu siyasi müstəvidə çözmək cəhdi
Aydındır ki, “Ermənistan” fraksiyasının Qarabağda referendumun keçirilməsi və ermənilərin öz müqəddəratını bu yolla təyin etməsi ilə bağlı səsləndirdiyi təklif mövcud reallıqdan tamamilə uzaqdır.
Birincisi, ona görə ki, Azərbaycan 44 günlük Vətən müharibəsinə qədər Qarabağ bölgəsindəki ermənilərə ən yüksək səviyyədə özünüidarə hüququ verməyə hazır olduğunu bəyan etsə də, Ermənistan heç vaxt rəsmi Bakının bu təklifini təqdir etməyib, problemin sülh yolu ilə həlli istiqamətində heç bir addım atmayıb.
İrəvan bir milyondan çox azərbaycanlının hüquqlarını kobud şəkildə pozaraq dədə-baba yurdundan silah gücünə didərgin saldığı insanların öz doğma torpaqlarına qayıtmasına imkan verməyib. Azərbaycan Qarabağı silah gücünə - üç min şəhidin canı bahasına azad edib. Bu isə o deməkdir ki, Qarabağdakı bütün xalqların öz müqəddəratını təyinetmə hüququ 8 Noyabr Zəfəri ilə müəyyənləşir. Bu isə o deməkdir ki, Qarabağ Azərbaycandır və burada yaşamaq istəyən hər kəs birmənalı şəkildə Azərbaycan Respublikasının qanunlarına tabe olmalıdır.
“Ermənistan” fraksiyasının Qarabağda referendumun keçirilməsi təklifi 44 günlük müharibədəki məğlubiyyətin nəticələrini siyasi müstəvidə dəyişmək cəhdidir. Hansı ki, Azərbaycan Respublikasının Prezidenti İlham Əliyev 8 Noyabr zəfərindən sonra verdiyi açıqlamalarda separatçıların bütün arzularının, o cümlədən referendum arzusunun tarixin zibilliyinə atıldığını vurğulamış və bildirmişdir ki, bu məsələlərə hansısa formada geriyədönüş heç vaxt baş verməyəcək.
İkincisi, tarixi Azərbaycan torpağı olan Qarabağda hətta sovet dönəmində belə mütləq üstünlük azərbaycanlılara məxsus idi. Bu torpaqlarda məhdud sayda erməni yaşayırdı ki, onların da hamısı sonradan, süni şəkildə yerləşdirilən şəxslər idi. Ohanyanın indi bir ovuc erməniyə görə referendum keçirmək çağırışı xırda bir gölməçəyə görə böyük bir dəryanı çalxalanadırmaq təklifinə bənzəyir ki, bu da gülünc və mümkünsüzdür.
Qatil xilaskar qiyafəsində...
Azərbaycan xalqına qarşı ağır hərbi cinayətlər törədən Ohanyanın, eyni zamanda, öz separatçı, militarist, faşist siyasəti ilə erməni toplumuna da ağır bəlalar gətirdiyi məlumdur. Bu gün də erməni sepratizminin əsas simalarından biri olan Ohanyan, Ermənistanda revanşizmin alovlanmasına cəhd göstərir, öz siyasi ambisiyalarını yeni müharibələr, yeni qurbanlar hesabına təmin etməyə çalışır. Maraqlıdır ki, öz xalqının qatili olan, onu Azərbaycanla toqquşmalara sürükləyən Ohanyan İsveçrənin Ermənistandakı səfiri ilə görüşündə özünü erməni toplumunun xilaskarı, onun aqibətindən narahat olan şəxs kimi təqdim edir.
Əslində, “Ermənistan” fraksiyasının məlum görüşdə səsləndirdiyi təkliflərin hamısı Ermənistanı yenidən Azərbaycanla üz-üzə qoymağa xidmət edir. Çünki Ohanyan yaxşı bilir ki, onun səsləndirdiyi təkliflərin qəbulu Azərbaycan üçün mümkünsüzdür və rəsmi Bakı bu məsələlərdə heç bir güzəştə getməyəcək. Məhz bu səbəbdən də sözügedən təkliflərin icrasında təkid edən Ohanyan, Azərbaycanla Ermənistan arasında yeni bir gərginlik yaratmağa çalışır. Məqsəd növbəti qarşıdurma fonunda siyasi dividend əldə etmək, öz rəqiblərinə qarşı mübarizədə daha ciddi üstünlüyə nail olmaq, hakimiyyət piramidasının zirvəsində təmsil olunmaqdır. Ancaq Ohanyanın nə arzulamasından asılı olmayaraq, reallıq dəyişməz olaraq qalır: Ermənilər üçün Qarabağda yaşamağın yeganə yolu Azərbaycan Bayrağına ehtiram göstərmək və onun qanunlarına tabe olmaqdır! Bunun fövqündə heç bir istisna yoxdur və heç vaxt da olmayacaq!
Seymur ƏLİYEV