Milli Məclisin sədri Sahibə Qafarova Polşa Respublikasına rəsmi səfəri çərçivəsində bu ölkə Seyminin sədri Elzbieta Vitek ilə görüşüb. Seymin sədri ölkələrimiz və qanunverici orqanlarımız arasında münasibətlərdən razılığını ifadə edib. O, bu səfərin parlamentlər arasında əlaqələrin dərinləşməsinə töhfə verəcəyinə inamını ifadə edib.

Milli Məclisin Mətbuat və ictimaiy­yətlə əlaqələr şöbəsindən redaksiya­mıza verilən məlumata görə, Seymin sədri parlament diplomatiyasının bey­nəlxalq münasibətlərdə mühüm rolunu qeyd edərək, bu mənada qanunvericilik orqanları arasında əməkdaşlığın əhə­miyyətini vurğulayıb. O, Azərbaycanın Polşa üçün dost ölkə olduğunu, müxtəlif sahələrdə əməkdaşlığın genişləndiyini bildirib. 

Milli Məclisin sədri ölkələrimiz ara­sında əlaqələrin yüksək səviyyədə olduğunu qeyd edib və bunu ikitərəfli əməkdaşlığın bütün sahələrdə inki­şafı ilə əlaqələndirib. O, Azərbaycan Prezidenti İlham Əliyevin Polşaya, Pol­şa Respublikası dövlət başçılarının Azərbaycana səfərlərini xatırladıb və bunun ölkələrimiz arasında əlaqələrin inkişafında xüsusi əhəmiyyət kəsb et­diyini bildirib.

Ötən il Azərbaycanla Polşa arasında diplomatik münasibətlərin qurulmasının 30-cu ildönümünün tamam olduğunu xatırladan S.Qafarova deyib ki, xalqla­rımız arasında dostluq və əməkdaşlıq ənənələrinin tarixi daha genişdir: “Azər­baycanın Polşa ilə əlaqələri həm ikitərəf­li qaydada, həm də Avropa İttifaqı çər­çivəsində inkişaf edir. Avropa İttifaqı ilə əməkdaşlıq Azərbaycanın xarici siyasə­tinin prioritetlərindən biridir və Azərbay­can Avropa üçün etibarlı tərəfdaşdır. Bu səfər parlamentlər arasında olan müna­sibətlərə daha bir təkan olacaq”. 

Görüşdə qarşılıqlı maraq kəsb edən digər məsələlər barədə də fikir müba­diləsi aparılıb.