Türkiyədəkı seçki kampaniyasının gedişatı və mümkün nəticələri bütün dünyanı düşündürür. Təbii ki, “Köhnə qitə” də bunun fərqindədir. Xüsusilə Almaniya və Hollandiya ənənəvi olaraq qardaş ölkənin siyasi həyatında baş verənləri daim diqqətdə saxlayır, yeri oldu-olmadı, haqqı çatdı-çatmadı, yersiz müdaxilələr etməyə cəhd edir.
Amma bu dəfə gözlənildiyindən fərqli olaraq, nə Berlin, nə Amsterdam səsini çıxarır. Təkcə Almaniya və Hollandiya deyil, qitənin əksər dövlətlərinin yetkililəri bu il mayın 14-nə təyin olunan seçkilərə münasibətdə bir susqunluq nümayiş etdirirlər. Qəribədir, deyilmi?
Bu məqamda hörmətli oxucu haqlı olaraq soruşa bilər ki, bu “biganəlik” nədən qaynaqlanır? Bu suala konkret cavab verməzdən əvvəl, kollektiv Qərbin son onillər boyu Türkiyəyə qarşı sərgilədiyi münasibətin səciyyəvi cəhətlərinə qısa da olsa, nəzər yetirmək lazımdır.
Beləliklə, özlərini yeni sivilizasiyanın daşıyıcıları sayan avropalılar, demək olar ki, istisnasız olaraq Asiya və Afrikadakı xalqlara zahirən hiss olunmasa da, daxillərində yuxarıdan aşağı baxır, onları özlərinə borclu sayırlar.
Qərbin niyyəti bu zaman heç də yaxın-uzaq toplumlara insan haqları və demokratiya dərsi keçib, onları öz sıralarına qatmaq deyil. Bu missiya üçün vaxt və vəsait xərcləyib yüksək fədakarlıq göstərmək fikrində də deyillər. Son məqsəd, həmin ölkələrin sərvətlərini mənimsəməkdir. Bu, iki vur iki qədər hamı üçün bəllidir.
Belə yanlış yanaşma Avropada ilkin kapitalizmin təşəkkül tapdığı XVI-XVII əsrlərdə də, sonrakı yalançı “sosial kapitalizm” dönəmində də belə olub, hazırkı “Soros imperializmi” mərhələsində də belədir. Yəni Avropada Asiya, yaxud Afrikaya səmimi münasibət bəsləmir və bundan sonra bəsləməyəcəklər.
Belə çıxır ki, hər kəs öz başına çarə tapmalıdır. Çağdaş dünyanın ən xarizmatik liderlərindən olan Rəcəb Tayyib Ərdoğanın rəhbərliyi ilə Türkiyə dövləti inkişaf və tərəqqinin yolunu tapıb və bu istiqamətdə öz yolu ilə inamla irəliləyir.
Bəli, XXI minilliyin əvvəllərinə kimi, Qərbin neokolonalizm torunda çapalayan Türkiyə bu gün regionun və dünyanın ən müstəqil dövlətlərindən biridir. Türklər dünəninə və bugününə hörmət bəsləyən millətdir. Onun inkişaf və tərəqqisi təsadüfi sayıla bilməz! Bu qardaş ölkənin inkişafının qızıl dövrüdür və bu xoşbəxtlik böyük dövlət adamı R.T.Ərdoğanın taleyinə yazılıb!
“Əzilənlərin gur səsi, susqun dünyanın hürr səsi olan” bu tarixi şəxsiyyət son iyirmi ildə ölkəsinin iqtisadi və hərbi sənayesini addım-addım irəli aparıb. Xüsusilə müdafiə sahəsində ölkə böyük uğurlar qazanıb. Türkiyə yeni innovasiyaslar və texnologiyalara da tamamilə açıqdır. Bütün bunlar təqdirə və alqışa layiqdir.
R.T.Ərdoğanın Türkiyə dövləti və xalqı qarşısında ən böyük xidməti isə odur ki, millətin ruhunu oyadaraq gücləndirib. Artıq dünya siyasətində özünə inanan, güvənən, haqqın yanında durmağı bacaran Türkiyə var! Biz bunun Şuşada, Qarabağda şahidi olmuşuq.
Bu gün Türkiyə dünyanın hərbi və “yumşaq” güc mərkəzlərindən biridir. Türk vətəndaşı bu şanlı ölkənin vətəndaşı olması ilə sonsuz qürur və fəxarət duyur. Bütün türk dünyası qüdrətli Türkiyə ilə fəxr edir, ondan ilham və güc alır. Dünya siyasətinin üfüqlərindən qüdrətli Turan boylanır!
R.T.Ərdoğanın “Yeni Türkiyə” vizionu Qərb dövlətlərini məmnun etmir. Kələfin ucu bundadır. Qərb görür ki, Ankara onun “demokratik idarəçilik siyasəti”nə ehtiyac duymur. Türkiyə “Böyük iyirmilər”dən ibarət “güclülərin klubu”na bərabər hüquqlu oyunçu kimi daxil olur. Onun çağdaş dünyanın ən böyük on dövlətindən biri olacağı gün də uzaqda deyil.
Yenidən yazının əvvəlində qaldırdığımız mövzuya qayıdaq. Türkiyədəki seçkilərlə bağlı Qərbin susqunluğuna aydınlıq gətirək. Əvvəlki seçkiqabağı kampaniyalar zamanı Almaniya və Niderlanddan prosesi pisləyən kəskin səslər eşidilirdi. Bu hay-küy hətta ölkənin özündə müxalifətin iqtidara qarşı qaldırdığı etiraz səslərini arxada qoyurdu.
Avropa mətbuatı R.T.Ərdoğan haqqında tonlarla hədyanlar yazırdı. İndi yazmırlar. Bəlkə, Türkiyə iqtidarına inam və rəğbətləri artıb. Xeyr! Başa düşüblər ki, Ərdoğanı çox tənqid etdikcə, ölkə daxilində Prezidenti dəstəkləyənlərin sıraları sıxlaşır. Avropa siyasətçiləri buna görə də indi səslərini çıxarmır, şüuraltı və strateji olaraq müxalifəti dəstəkləyirlər.
FETÖ tərəfdarları, gülənçilər hələ də Almaniya və ABŞ-da xeyli təsirə malikdirlər. Avropalılar kimi onlar da indi açıq şəkildə Ərdoğanı pisləmirlər. Lakin saman altından su yeridib hiyləgərcəsinə radikal müxalifətə maddi və mənəvi dəstək göstərirlər. Ürəklərində Ərdoğanın bu dəfə yıxılacağına ümid bəsləyirlər. Niyyətləri ürəklərində qalacaq!
Türk xalqı yolayrıcındadır. Ölkə vətəndaşları yenidən ya milli birlik və həmrəylik nümayiş etdirib sayın R.T.Ərdoğana səs verməli, ya da bundan 40-50 il əvvəl olduğu kimi, ölkənin milli maraqlarını Qərbə təslim etməlidirlər. Müdrik türk xalqının bu il mayın 14-də bütün çətinliklərə rəğmən doğru seçim edəcəyinə inanmaq istəyirəm…
Məsaim ABDULLAYEV, “Xalq qəzeti”