Məlum olduğu kimi, aprelin 7-də və 8-də Azərbaycanın xarici işlər naziri Ceyhun Bayramov ilə iranlı həmkarı Hüseyn Əmir Abdullahian arasında telefon danışığı olub. Diqqətçəkən ilk məqam telefon danışığının dalbadal iki gün olmasıdır. Bu, münasibətlərdəki gərginlikdən xəbər verən, kifayət qədər ciddi göstərici sayıla bilər. Ancaq, heç şübhəsiz, iki gün davam edən təması, eyni zamanda, həmin gərginliyi aradan qaldırmağa yönəlmiş müsbət addım kimi də qiymətləndirmək mümkündür. Üstəlik, telefon danışığı zamanı bir çox məqamlara yetərincə açıq formada yanaşıldığını da nəzərdən qaçırmamalıyıq. Deməli, nazirlər “örtülü bazar – dostluğu pozar” deyimindən kənar dayanıblar.
Başlayaq tərəflərin qarşılıqlı şəkildə hər iki ölkənin ərazi bütövlüyünə və suverenliyinə hörmətlə yanaşdıqlarını bildirmələrindən. Bu fikrin ifadəsi onu göstərir ki, münasibətlərdəki gərginlik fonunda ərazi bütövlüyünə və suverenliyə hörmətsiz yanaşılma hallarının qeydə alındığı etiraf edilir. Hər halda, nazirlər bu məsələyə səbəbsiz toxunmazlar.
Reallığa gəlincə isə Azərbaycanın ərazi bütövlüyünü təhdid edən İrandır. Bununla bağlı müxtəlif fikirləri bir kənara qoyub, bu il martın əvvəlində İrana məxsus qırıcı təyyarənin Azərbaycan–İran sərhədi boyunca uçuşunu diqqətə çatdıraq. Nəzərə alsaq ki, belə hallar əvvəllər də yaşanıb. İranın XİN rəhbərinin haqqında söhbət açdığı digər məsələlərdən də sezmək mümkündür ki, ərazi bütövlüyümüzə yanaşmada problemlər qalmaqdadır. Bu barədə söz açacağıq.
Hələlik isə onu deyək ki, telefon danışığı zamanı iki ölkə arasında mövcud olan narazılıq və anlaşılmazlıqlarla bağlı müfəssəl müzakirə aparılıb, onların aradan qaldırılması üçün danışıqların davam etdirilməsinin vacibliyi vurğulanıb. Əlbəttə, telefonla təmas iki gün davam edibsə, deməli, gərginliyi yaradan, eyni zamanda, anlaşılmazlıqlardır. Müsbət hal odur ki, tərəflər durumun aradan qaldırılmasının vacibliyi üzərinə gəliblər və bu zaman Azərbaycanın XİN rəhbəri C.Bayramov ölkəmizin milli maraqlarına əsasən həyata keçirdiyi müstəqil xarici siyasətinə və region ölkələri ilə ikitərəfli münasibətlərinə hörmətlə yanaşılmasının vacibliyini diqqətə çatdırıb.
Son aylar baş verənlər onu göstərir ki, bu vacibiyyəti düzgün dəyərləndirməyən İrandır. Məsələn, Azərbaycan martın 28-də İsraildə səfirlik açıb, İran parlamenti isə Bakının öz işi olan məsələni müzakirəyə çıxararaq pisləyib. Normal məntiq bunu anlamaqda çətinlik çəkir. C.Bayramov da cənab Abdullahianın diqqətinə məhz bu məqamı çatdırıb.
***
Ümumən İran illərdir ölkəmizə münasibətdə daxili işlərimizə hörmətlə yanaşmağı öyrənə bilməyib. Arazın bu tayındakı müstəqil Azərbaycan dövlətinin varlığını həzm etməyib. Bakı bunun qarşılığında dözüm göstərib. Eyni zamanda, ümid edib ki, Tehran öz baxışlarında korrektələr aparacaq. Bakı, hətta, cənub qonşusuna ehtiram əlaməti olaraq, Azərbayacan dövlətinə və xalqına dost münasibətdə olan İsrail Dövləti ilə münasibətlərini tamlaşdırmaqdan kənar dayanıb – uzun müddət Tel-Əvivdə ölkəmizin səfirliyi olmayıb.Yeri gəlmişkən, telefon danışığı zamanı İranın xarici işlər naziri azərbaycanlı həmkarına sionist rejimin (İsraili nəzərdə tutub – red.) region ölkələrinin birliyinə, təhlükəsizliyinə və tərəqqisinə qarşı sui-qəsdini vurğulayıb. Göründüyü kimi, ölkəmizin İsraildə səfirlik açmasından narahatlıq telefon danışığının mövzusuna da təsir göstərib.
Otuz ilə yaxın müddətdə Azərbaycanın torpaqları Ermənistanın işğalı altında qaldı. Söhbət regionun tərəqqisindən gedirsə, bir milyondan artıq azərbaycanlının öz dədə-baba yurdlarından didərgin düşməsi, kifayət qədər böyük ərazinin rəzil duruma salınması demək idi. Həmin ərazilərin insanının düşdüyü acınacaqlı vəziyyət də öz yerində. O zaman düşünək, İran indiyədək region ölkələrinin birliyinə, təhlükəsizliyinə və tərəqqisinə xidmət edən addımlar atıbmı? Yəni, Tehran Cənubi Qafqaz adına hansısa mütərəqqi prosesin gerçəkləşməsinə çalışıbmı? Ədalətli mövqe tutubmu? Əlbəttə, yox!
***
Bəli, illərlə Ermənistan özünün işğalçı ampluası ilə regionun təhlükəsizliyinə ciddi təhdid yaratdı. O təhdidə son qoyulmasının təhlükəsizlik üçün vacib amil olduğu yetərincə dərk edilirdi. Amma Tehran işğalçı ilə işbirliyinə üstünlük verirdi. Bu gün də Ermənistan öz “mahiyyətindən” daşınmır. Ölkə regionun tərəqqisi baxımından mühüm layihə sayılan Zəngəzur dəhlizinin reallaşmasına maneçilik törədir. İrəvan Azərbaycanın digər əraziləri ilə Naxçıvanı birləşdirən quru və dəmir yolunun açılmasına maneçilik törədir. Ermənistanın siyasi rəhbərliyi 10 noyabr 2020-ci il tarixli üçtərəfli Bəyanatla mövcud istiqamətdə üzərinə öhdəlik götürdüyü halda, bunun gerçəkləşməsinə qarşı çıxır. Onun ən böyük dəstəkçisi isə İrandır. Tələm-tələsik şəkildə Qafanda konsulluq açaraq, erməni iqtidarının maraq və mənafeləri baxımından ortaya prinsipial mövqe qoyan rəsmi Tehrandır.
Hələ də İranın müxtəlif hakim dairələrində və ona yaxınlığı ilə seçilən siyasi çevrələrdə Ermənistanın ərazi bütövlüyünün önəmi vurğulanmaqdadır. Həmin çevrələr, eyni zamanda, Qarabağın Azərbaycanın nəzarətinə keçməsinin İranın milli maraqları baxımından yolverilməzliyini əsaslandırmaqdadırlar. Mövcud xüsusda bölgədəki separatçılığın dəstəklənməsinə çağırışlar da ifadə olunmaqdadır. Görəsən, cənab Hüseyn Əmir Abdullahian bunu regionun rifahına və tərəqqisinə zidd meyillər kimi nə üçün qiymətləndirmir? Elə bunun özü də Azərbaycanı saymamağın təzahürüdür.
***
İran anlamalıdır ki, otuz ilə yaxın davam etmiş işğal dövründə Azərbaycan dövləti və xalqı böyük məhrumiyyətlərlə üzləşdi. Ermənistan İranla birləşərək, taladığı torpaqlardan insan izini sildi. Ötən müddətdə qazanılmışlar erməni vandallarının qarət etdiyi qəbirlərə gömüldü. İndi itirilmişlərin bərpası zamanıdır. Bunun üçün isə Azərbaycanın haqqı olan Zəngəzur dəhlizi reallaşmalıdır. Məsələyə prinsipial baxış belədir və bu baxış Abdullahian, yaxud onun yerinə kim olursa-olsun, həmin şəxs tərəfindən dərk edilməlidir. Dərk edilməlidir ki, əsas olan məsələyə səmimi münasibətin göstərilməsi, qarşılıqlı mənfəət və faydanın hesablanmasıdır, nəinki prosesə qarşı çıxıb kor inadın nümayiş etdirilməsi. Bir daha bildirək ki, burada böyük haqq var. Onu da nəzərə alaq ki, Azərbaycanın haqqı həm də ölkənin işğal nəticəsində itirdiklərinin təzminatıdır.
Ancaq o da görünür ki, İran dövləti o haqqı nəzərə almır və “sionist rejimi” tipli ifadələri ilə özünün ənənəvi baxış bucağından manipulyasiya yolu tutur. Bəli, İsrail Azərbaycanla dost ölkədir və bu dostluq kifayət qədər sınaqlardan çıxıb. Ancaq indiki halda İranın göstərdiyi müqavimət nəyədir? Əsas məsələ budur. İran Ermənistanı dəstəkləyir və mövcud xüsusda Azərbaycana qarşı demarşlar səsləndirir. Fikrini belə əsaslandırır ki, guya, rəsmi Bakı sionist rejimi kimi qiymətləndirdiyi İsraillə işbirliyindədir. Axı, hər kimlə işbirliyi, bu öz yerində, ortada böyük həqiqət var. O həqiqəti danan, reallığa müqavimət göstərən Ermənistandır, ölkəni açıq şəkildə müdafiə edən isə İran.
Tehran ermənipərəst mövqeyindən geri çəkilməli, obyektiv davranmalıdır. Bunu bacarmır və İsrail amilini gündəmə gətirir. Nəzərə almır ki, Bakının hansı dövlətlə münasibət saxlaması onun öz işidir. İranın XİN rəhbəri dövlətimizin müstəqil siyasətinə hörmətlə yanaşıb, ümumiyyətlə, İsrail söhbətini, sionist rejimi kimi ifadələri ortaya atmamalı idi. Ancaq, bu, baş verir və istər-istəməz, o nəticəyə gəlirik ki, İran dövləti yanaşmasında səmimi deyil.
***
İkitərəfli münasibətlərdəki inkişafın, bəzi regional məsələlərin ətraflı müzakirəsinin aparıldığı telefon danışığı zamanı XİN rəhbəri Abdullahianın region ölkələri arasında ixtilafların mövcudluğunun yalnız düşmənlərin xeyrinə olduğunu vurğulaması da ayrıca məqamdır. Görəsən, İranın XİN rəhbəri “düşmən” dedikdə hansı qüvvələri nəzərdə tutur? Axı, regiondakı açıq düşmənçiliyin nədən qaynaqlandığı aşkardır – ixtilafın, təfriqənin mənbəyi Ermənistandır.
Tehranın İrəvana dəstəyini vurğuladıq. Hələ dəstəyin hərbi-texniki tərəfləri də var. Bu öz yerində. Amma hazırda Ermənistan özünün məkrli siyasətini davam etdirməkdə və regiona üçüncü qüvvələri gətirmək istəyindədir. Bu baxımdan Fransanı vurğulamaq mümkündür. İrəvan Parisin patronajlığı ilə Avropa İttifaqının, tərkibində silahlıların da yer aldıqları, mülki missiyasını Azərbaycanla sərhəddə yerləşdirməklə, regionda yeni reallıqlar formalaşdırmaq yolunda cəhdlər göstərir. Bu, həm də düşmənçiliyin davamı istiqamətindəki “təşəbbüsdür”. Belə olan halda İran, fəaliyyət dairəsinin bir ucu onun sərhədini də əhatə edən, Aİ missiyasının mövcudluğunu özünə təhlükə kimi görmədiyini bildirirsə, deməli, Abdullahianın regional təəssübleşliklə bağlı fikirləri yalnız diplomatik manipulyasiyadır.
***
Əlbəttə, Azərbaycanla İran arasında münasibətlərin sahmana salınması, narazılıqların aradan qalxması vacibdir. Ölkəmizə ortaq tarixi və mədəniyyəti bölüşdüyümüz İran dövləti ilə gərginlik lazım deyil. Əslində, gərginlik qarşı tərəfə də tam gərəksizdir. Nikbinlik üçün hesab edək ki, XİN rəhbərləri arasında iki gün davam edən telefon danışığı bunun nəzərə alınması istiqamətində irəliyə doğru atılmış addımdır. Ancaq bu addımın gələcəkdə səmərə verməsi üçün, ilk növbədə, Tehranın dürüst davranması, özünün ambisiyalarından əl çəkməsi, Azərbaycanın müstəqilliyini sözdə deyil, əməldə nəzərə alması başlıca şərtdir.
İran Zəngəzur dəhlizi ideyasının reallaşmasına əngəl törətməməlidir. Hər halda, onun bu layihədən faydalanması üçün kifayət qədər böyük imkanları var. İran üçün Ermənistanın ərazi bütövlüyü “qırmızı xətt” olmamalıdır. Həm də ona görə ki, onu pozmaq istəyən yoxdur. Azərbaycan, sadəcə, çalışır ki, İrəvan 44 günlük müharibədə məğlub tərəf kimi üzərinə götürdüyü öhdəlikləri yerinə yetirsin. Hazırda Azərbaycanın suveren ərazisi olan Qarabağda erməni hərbi birləşmələri qalmaqdadırsa, ən azı buna görə öhdəlik yerinə yetirilmir və bu, İranın da maraqlı olduğunu bildirdiyi regional təhlükəsizliyə və sabitliyə zidd təmayüldür, nəinki Azərbaycan – İsrail əməkdaşlığının dərinləşməsi.
Tehran onu da nəzərə almalıdır ki, ölkəmiz illərlə mehriban qonşuluq münasibətlərinə sadiq qalıb. İrana qarşı ən sərt beynəlxalq sanksiyaların mövcudluğu şəraitində ona baxışını dəyişməyib. İmkan verməyib ki, hansısa üçüncü qüvvə Azərbaycan ərazisini İrana qarşı plasdarm kimi istifadə etsin. Əgər Tehran indi öz ambisiyalarını kənara qoyub, Bakı ilə səmimi münasibətlər saxlamağa qərar verəcəksə, əmin olmalıdır ki, Azərbaycan bu səmimiyyətə qarşılıq verəcək və əvvəlki kursunda qalacaqdır. İranın isə Azərbaycana münasibətdəki əvvəlki kursunu koordinal şəkildə dəyişməsi son dərəcə vacibdir. Bu, həm də regional tərəqqinin, inkişafın və təhlükəsizliyin mühüm şərtidir.
Ə.CAHANGİROĞLU, “Xalq qəzeti”