Dinc ekoloji aksiyanın davam etdiyi müddət ərzində, ümumilikdə, Rusiya sülhməramlıları və Beynəlxalq Qırmızı Xaç Komitəsinə (BQXK) məxsus 5600-dən çox avtomobil Laçın–Xankəndi yolundan maneəsiz keçib. Yeni Laçın yolunun istifadəyə verilməsi ilə əlaqədar Azərbaycan Ordusu tərəfindən Laçın rayonunun Cağazur və Zabux kəndləri arasında yerləşən bir neçə yüksəklik, əsas və yardımçı yollar, eləcə də sərhədboyu geniş sahələr nəzarətə götürüldükdən sonra Laçın–Xankəndi yolundan keçən nəqliyyat vasitələrinin sayında artım müşahidə edilir.

Ermənilərin talançılığı tək Azərbay­can üçün yox, bütövlükdə region üçün ekoloji təhlükədir. Ermənistana hava­darlıq edən beynəlxalq təşkilatlar da bilməlidirlər ki, o ərazilərdəki meşələ­ri, heyvanat aləmini, biomüxtəlifliyi bu gedişlə bərpa etmək çox çətin olacaq. Məsələn, ölkəmiz tərəfindən işğaldan azad edilmiş ərazilərə ceyranlar bu­raxıldı, xeyli ağac əkildi. Bütün bunlar təbiətin bərpasıdır. Bəs ermənilər tə­biətə ziyan vurmaqdan başqa nə edib­lər? Oradakı çaylar zəhərlənib, meşələr qırılıb, nadir ağacların kökü kəsilib, bu­laqlar, kəhrizlər quruyub və s.

Kəlbəcər, Zəngilan və digər yerlər­də təbii sərvətlərimizin olduğu yataqlar istismar edilib. Həmin ərazilərimizdə olan qızıl, gümüş və digər əlvan metal­lar qanunsuz şəkildə daşınıb. Bu işlər həyata keçirilərkən heç bir ekoloji nor­mativə əməl edilməyib. Nəticədə həmin ərazilər çirkləndirilib. 44 günlük Qələbə­mizdən sonrakı 2 il ərzində də Rusiya sülhməramlılarının yerləşdiyi ərazilərdə bu istismar davam etdirilib. Təbii sərvət­lərimiz Laçın yolu və digər yollar vasitə­silə qeyri-qanuni daşınıb. 

Əgər biz tərəfdən Ermənistan əra­zisinə bir silah aparardıqsa, bədxahlar dünyada vay-şivən qoparardılar. Qəri­bədir, öz sərhədlərindən bir quşun belə keçməsinə imkan vermək istəməyən dövlətlər, Azərbaycanın başına ağıl qoymaq istəyirlər. Özünüzə rəva bilmə­diyinizi bizdən niyə tələb edirsiniz? La­çın–Xankəndi yolunda keçirilən aksiya­nın tələbləri həm ölkə qanunlarına, həm də beynəlxalq hüquq normalarına əsas­lanır. Bu aksiyalar yalnız bir qrup ictimai fəalın deyil, bütövlükdə, Azərbaycan cəmiyyətinin iradəsini ifadə edir. Ölkə­mizin hər qarışı üzərində suverenliyimiz bərqərar olmalıdır. 

Ötən gün Şuşada hava soyuq ke­çib, qar yağıb. Havanın temperaturu­nun aşağı düşməsinə, soyuq, şaxtalı və qarlı hava şəraitinin hökm sürməsinə baxmayaraq, ekokönüllülər etirazları­nı yüksək əhvali-ruhiyyə ilə davam et­dirirlər. Hazırda aksiya iştirakçılarının Laçın–Xankəndi yolunda fəallığı mü­şahidə olunur. Artıq 112 gündür davam edən haqlı etirazlar onu deməyə əsas verir ki, heç bir kənar təzyiq aksiyanı dayandıra bilməz!

Etirazçılar hər zaman olduğu kimi, humanitar məqsədlərlə istifadə olunan avtomobillərin hərəkətinə maneə törət­məyiblər. Dünən də humanitar təyinatlı avtomobillər Laçın–Xankəndi yolundan keçib. Həmin nəqliyyat vasitələrinin ara­sında evakuasiya, tibbi yardım maşını, təminat-təchizat və minik avtomobilləri də olub.

Rizvan FİKRƏTOĞLU, “Xalq qəzeti”