Meksikanın ən nüfuzlu mətbu orqanlarından olan “El Universal” qəzetində Azərbaycanın bu ölkədəki səfiri Məmməd Talıbovun “Ucadan danışan həmişə haqlı deyil” başlıqlı məqaləsi dərc edilib.

Bu barədə redaksiyamıza verilən məlumata görə, qəzetin fransız əsil­li, əsasən, Azərbaycana qarşı qərəzli mövqeyi ilə seçilən müxbiri Jean Me­yerin böhtan xarakterli yazılarına cavab olan məqalədə Qarabağın Azərbayca­nın tarixi xanlığı olduğu, rus işğalı ilə indiki Ermənistan ərazisi olan Qərbi Azərbaycanda və ölkəmizin Qarabağ bölgəsində demoqrafik dəyişikliklərin aparıldığı, yüz minlərlə azərbaycanlının İrəvan, Göyçə, Zəngəzur kimi bölgələr­dən çıxarıldığı və bütün toponimlərin və bölgənin demoqrafiyasının dəyişdirildiyi qeyd edilir.

Məqalədə kommunist rejiminin Azər­baycanın Türkiyə ilə birbaşa əlaqəsini kəsmək məqsədilə 1929-cu ildə Meğri rayonunu Ermənistana verdiyi vurğula­nır. Yazıda Azərbaycanın on illər boyu Ermənistan hərbi təcavüzünün qurba­nı olduğu, 1987-ci ilədək yüz illər boyu azərbaycanlıların hazırkı Ermənistan ərazilərindən qovularaq, mədəni irsinin məhv edildiyi, Qafqazın Xirosiması sa­yılan Ağdam və digər işğal altında ol­muş şəhər və kəndlərdə bir milyondan çox azərbaycanlının etnik təmizləməyə məruz qaldığı faktlarla açılıb göstərilir. 

1992-ci ildə Xocalıda yüzlərlə dinc azərbaycanlının soyqırımına məruz qal­ması və bu günədək taleyi məlum olma­yan 4 mindən çox insanın itkin düşməsi, 2020-ci ildə 44 günlük Vətən mühari­bəsi zamanı Azərbaycanın sıx məs­kunlaşmış ərazilərində yaşayan onlarla azərbaycanlının Ermənistan tərəfindən ballistik raket hücumlarının qurbanı ol­ması da qeyd edilir.

Ermənistanın baş naziri və ovaxtkı müdafiə nazirinin “yeni ərazilər uğrunda yeni müharibə” hədələrinə baxmayaraq, Azərbaycanın BMT Təhlükəsizlik Şura­sının 1993-cü il qətnamələrinin şərtlərini yerinə yetirərək, beynəlxalq ictimaiyyət, o cümlədən, Meksika tərəfindən tanı­nan ərazi bütövlüyünü bərpa etməsi də yazıda əksini tapıb. 

Məqalədə Ermənistandan fərqli ola­raq Azərbaycanın multikultural ölkə ol­duğu, burada 40-dan çox etnik qrupun, o cümlədən, ermənilərin sülh şəraitində, heç bir ayrı-seçkiliyə məruz qalmadan yaşadığı, Ermənistandan qovulan azər­baycanlılardan fərqli olaraq, Azərbay­canda yaşayan ermənilərin bu ölkənin vətəndaşları olduğu və hər bir azər­baycanlı kimi ölkə qanunvericiliyinə və Konstitusiyasına tabe olduğu bildirilir.

Təkzib xarakterli materialda J.Me­yerin erməni iddialarına istinadən söy­lədiyinin əksinə, Azərbaycanın Qarabağ bölgəsində yaşayan ermənilərin heç bir blokadaya məruz qalmadığı vurğulanır, bundan əlavə Ermənistanın Azərbay­can ərazisinə silah və piyada əleyhinə mina gətirmək, habelə Azərbaycan əra­zisindəki təbii sərvətləri qeyri-qanuni istismar edərək Ermənistan ərazisinə aparmaq məqsədilə gizli yollardan isti­fadə etdiyi göstərilir.

“El Universal” qəzetinin 7 milyondan çox izləyicisi olan “Twitter” hesabında paylaşılan məqaləyə 3 saat ərzində minlərlə baxış olub.

“Xalq qəzeti”