Dünən Azərbaycan Respublikası Prezidenti Administrasiyası Qarabağın erməni ictimaiyyətinin nümayəndələrinə ikinci dəfə müraciət etdi. Martın 13-dəki birinci müraciət kimi, ikinci də xoş məramın ifadəsidir. İndi sual yaranır: bu mərama qarşılıq olacaqmı? Yəni, Qarabağ ermənilərindən kimsə Bakıya gələcəkmi? Nəzərə alaq ki, PA müraciətində görüşün gündəliyini də açıqlayır: reinteqrasiya, həmçinin Qarabağda infrastruktur layihələrinin icrası məsələlərinin müzakirəsi. Yeri gəlmişkən, PA görüş vaxtını da müəyyənləşdirir – aprelin birinci həftəsi.
Bəli, Azərbaycan ictimaiyyəti yenə qarşı tərəfdən müsbət reaksiya gözləyir. Yeri gəlmişkən, martın 1-də Xocalı şəhərində keçirilmiş ilk görüşdən sonra Ermənistandan bununla bağlı pozitiv olmayan siqnallar gəldi. Separatçı rejimdən də bildirdilər ki, heç bir halda, Azərbaycanın tərkibində olmaq məsələsi müzakirəyə çıxarıla bilməz.
Əlbəttə, bütün bunlar Ermənistan, eləcə də Qarabağdakı separatçı rejim daxilində kütləvi psixozun hökm sürdüyünün göstəricisi idi. Mövcud durum yenə də aktuallığını saxlamaqdadır. Ancaq vurğulanmalı vacib məqam da var. PA növbəti görüş təklifini boş yerə irəli sürmür. Qarabağda separatçılıq üçün çəmbər daralmaqdadır və bunu edən Azərbaycandır.
Ordumuz martın 25-də bir həmlə ilə Laçın dəhlizindən şimalda yerləşən yolları – Xankəndi–Kosalar – Mirzələr-Turşsu, habelə, Xankəndi-Xəlfəli-Turşsu yollarını nəzarətə götürub. Beləliklə, ,həmin torpaq yollardan qeyri-qanuni fəaliyyətlər üçün istifadənin, eləcə də Ermənistan tərəfindən silah-sursat daşımaqla vəziyyətin gərginləşməsinin və potensial təxribatların törədilməsinin qarşısı alınıb. Bakı isə hazırda növbəti görüş təklifi ilə Qarabağ ermənilərini separatçılardan ayrı tutmaq niyyətini ortaya qoyur. Əslində, təklifin mütərəqqi mahiyyəti və xoş məramı da məhz budur.
Bəs, Bakının ikinci görüş təklifinə reaksiyalar necədir? Ermənistan və Qarabağdakı separatçı rejim baş verənlərdən nəticə çıxarırmı? Təəssüf ki, yox! Ermənistanın media vasitələri yenə də separatçı rejimin nümayəndələrinin “danışıqlar üçün beynəlxalq mexanizmlər olmalıdır” kimi sarsaqlamalarını tirajlamaqdadırlar. Elə ölkənin ayrı-ayrı siyasiləri də eyni mövqeyi bölüşməkdədirlər. Yenə belə təəssürat yaranır ki, Ermənistan daxilindəki müəyyən qüvvələr prosesi satqınlıq kimi qiymətləndirdiklərindən, istənilən nəticə hasil olmur.
Bəli, Bakı Ermənistanın siyasi rəhbərliyində təmsil olunanlardan və separatçılardan fərqli olaraq, Qarabağ ermənilərinin taleyini düşünür. İstəmir ki, onlar siyasi oyunbazlığın girovuna çevrilsinlər və bunun nəticəsində bölgəni tərk etmək məcburiyyətində qalsınlar. Bu istək səmimidir, ancaq ona adekvat münasibət də şərtdir. Bu adekvatlıq Qarabağ ermənilərinin öz evlərində rahat yaşamalarının, bir növ, təminatıdır. Deməli, onlar seçim etməlidirlər. Ermənistan hakimiyyətinin, dünya erməniliyinin və onun xaricdəki havadarlarının ambisiyalarında iştirakdan uzaq durmalıdırlar, qısası, qərar verməlidirlər.
Azərbaycan hakimiyyəti və cəmiyyəti anlayır ki, vaxtilə olub-keçənlərə rəğmən, ermənilərin doğulduqları, həyatlarını bağladıqları bölgədə yaşamaları vacibdir. Cəmiyyətimiz ümid edir ki, onlar özlərinin nümunəvi davranışları ilə bizə keçmişin acı xatirələrini bir kənara qoyub irəliyə doğru baxmağa kömək edəcək, səmimiyyət göstərəcəklər. Səmimiyyətin nümayiş meydanı isə Bakıdır.
Qarabağ erməniləri təklifin prinsipial tərəflərini də nəzərdən keçirməlidirlər. Qarabağda erməni separatizmi üçün çəmbər daralırsa, deməli, bunu nəzərə almadan addım atmaq onları separatçıya çevirəcəkdir. Bu isə o deməkdir ki, bölgəni tərk etməyə məcbur qalacaqlar. Çünki Azərbaycan hakimiyyəti separatçılığın kökünü kəsməkdə israrlıdır və buna qarşı hər hansı alternativ ola bilməz.
Digər tərəfdən, Qarabağ ermənilərinin ayrıca nümayişkəranə şəkildə fəallıq göstərmələri vacibdir. Çünki Ermənistan hakimiyyətini onların taleyi maraqlandırmadığından və rəsmi İrəvan Bakıya qarşı avantürist iddialara düşdüyündən, məqsədli şəkildə Qarabağ ermənilərini də qətlə yetirtdirib günahı Azərbaycanın boynuna atmaq planını işə sala bilər. Tarix göstərir ki, dünya erməniliyi dəfələrlə belə bir mənfur planı həyata keçirib. 44 günlük müharibə zamanı Azərbaycan Ordusu Şuşanı işğaldan azad etdikdən sonra da eyni “davranışı” Xankəndidə gerçəkləşdirmək, məsələni Azərbaycanın soyqırımı kimi qiymətləndirmək istəyirdilər. 10 noyabr 2020-ci il tarixli üçtərəfli Bəyanat Qarabağ ermənilərinin, necə deyərlər, qanının arasına girdi.
Onu da nəzərə alaq ki, indiki durumda ermənilərsiz Qarabağ Ermənistan hakimiyyəti üçün gələcəkdə Azərbaycana qarşı ərazi iddiası irəli sürmək üçün rıçaqdır. Bu düşüncə tipik erməni xəstəliyindən irəli gəlir. Qarabağ erməniləri bu xəstəliyə qarşı çıxmalı, yollarını Bakıya salmalıdırlar. Başqa cür mümkün deyil. Digər xilas yolu da yoxdur. Nicat Bakıdadır.
R.ƏVƏZ, “Xalq qəzeti”