İqtisadi diplomatiya yolu ilə dünya siyasətində xüsusi çəkisini durmadan artıran Çin Xalq Respublikası Yaxın Şərqin iki ölkəsini – İran və Səudiyyə Ərəbistanını barışdırmaq istəyir.
Rəsmi Pekinin bu istiqamətdəki səyləri artıq nəticə verib: Tehran və Səudiyyə Ərəbistanı iki ay ərzində diplomatik əlaqələrin bərpası və səfirliklərin açılması barədə razılığa gəliblər. Bununla bağlı martın 10-da yayılan məlumata görə, saziş İranın Ali Milli Təhlükəsizlik Şurasının rəhbəri ilə onun səudiyyəli həmkarı arasında Pekində keçirilən danışıqlar zamanı imzalanıb. Yayılan məlumatda qeyd olunur ki, gələcəkdə iki dövlətin xarici işlər nazirləri sazişin icrasını müzakirə etmək niyyətindədirlər.
Bundan sonra Səudiyyə Ərəbistanı Kralı Salman bin Əbdüləziz Al Səud İran Prezidentini ölkəsinə səfərə dəvət edib. Martın 19-da İran Prezidentinin siyasi məsələlər üzrə müavini Məhəmməd Cəmşidi “Twitter” hesabında yazıb ki, Səudiyyə Ərəbistanı Kralı İran Prezidentini rəsmi olaraq Ər-Riyada səfərə dəvət edib və İbrahim Rəisi onun dəvətini qəbul edib.
Bu istiqamətdə son hadisə martın 26-da İran və Səudiyyə Ərəbistanının xarici işlər nazirləri arasında telefon danışığının baş tutması olub. İran XİN-in bununla bağlı yaydığı məlumatda bildirilib ki, iranlı nazir Hüseyn Əmir Abdullahian və şahzadə Faysal bin Fərhan Al Səud iki ölkə arasında münasibətlərin normallaşdırılmasını müzakirə ediblər. Nazirlər tezliklə görüşmək barədə razılığa gəliblər. Daha əvvəl Abdullahian deyib ki, o, şahzadə Faysalla neytral ərazidə görüşməyi planlaşdırır.
***
Göründüyü kimi, Çinin səyləri nəticəsində Tehranla Ər-Riyad arasında buzlar yavaş-yavaş əriməyə başlayıb. Münasibətlərin normallaşmasında Pekinin də marağı az deyil. Çin dünyanın ən böyük enerji istehlakçılarından biridir. Asiya nəhəngi gündə on milyon bareldən çox neft idxal edir. Səudiyyə Ərəbistanı isə dünyanın ən böyük neft ixracatçısıdır (gündəlik 7,37 milyon barel). Səudiyyə Ərəbistanının 2022-ci ildə Çinə ixracının ümumi dəyəri təxminən 10 milyard ABŞ dolları təşkil edib ki, bunun da böyük hissəsi enerji resurslarının payına düşüb. Krallığın isə Çindən idxalının dəyəri 7 milyard dollara yaxın olub. 2022-ci ildə İran və Çin arasında idxal-ixrac əməliyyatlarının ümumi dəyəri 14,8 milyard dollar təşkil edib. Səudiyyə Ərəbistanı Ərəb Dövlətləri Liqası ölkələrinə, əsasən də Körfəz Əməkdaşlıq Şurasının bütün dövlətlərinə və onların iqtisadiyyatına təsir göstərmək gücünə malikdir. İranın təsir dairəsinə isə yalnız Suriya və İraqın bir hissəsi daxildir.
İrandan fərqli olaraq Səudiyyə Ərəbistanına hər hansı beynəlxalq sanksiya tətbiq edilmir. Nəticədə, Ər-Riyad Çinlə asanlıqla ticarət edir. Amma İrana tətbiq edilən beynəlxalq sanksiyalar Tehranla Çin arasında ticarəti çətinləşdirir. Sirr deyil ki, Səudiyyə Ərəbistanı hazırda ABŞ-ın bölgədəki əsas müttəfiqlərindən biridir. Geniş perspektivdə Çin Krallıqla İranın münasibətlərini yaxşılaşdırmaqla Tehrana tətbiq olunan sanksiyaların yumşaldılmasını, bundan sonra isə İranla ticarətin asanlaşmasını nəzərdə tuta bilər. Eyni zamanda iki ölkə arasında münasibətlərin normallaşmasında Rusiya da maraqlı görünür. Elə Hüseyn Əmir Abdullahianla Faysal bin Fərhan Al Səud arasında telefon danışığının Çin lideri Si Cinpinin Moskvaya 20-22 mart tarixlərində baş tutan səfərindən sonra həyata keçirilməsi diqqətdən yayınmır.
***
Bu arada Qərb mətbuatı İranla İsrail arasında məxfi danışıqların başlandığına dair sensasiyalı məlumat da yayıb. Bildirilir ki, danışıqlar yenə Çinin vasitəçiliyi ilə Honkonqda keçirilir. Görüşün təşəbbüskarı kimi Pekin çıxış etsə də, bu işdə Rusiyanın da maraqları yox deyil. Pekin İsraillə İranı qarşıdurmadan çəkindirmək istəyir. İranın həm Rusiya, həm də Çinlə sıx əlaqələri var. İsrail Çin və Rusiya ilə İran qədər tərəfdaş olmasa da, Moskva və Pekinlə dialoqu mövcuddur. Ona görə də Çin və Rusiya İsraillə İranı qarşıdurmadan çəkindirmək istəyirlər. Bunun başlıca şərti İran nümayəndə heyətini nüvə silahı əldə etməyi düşünmədikləri barədə Tel-Əvivi inandırmaqdır. Bu alınmasa, danışıqlar nəticə verməyəcək.
Tehranın İsraillə belə yarıgizli, yarıaçıq danışıqlara getməsinin səbəblərindən biri də İranın daxilində yaranan və gündən-günə dərinləşən böhranla bağlı ola bilər.
Beləliklə, artıq təkcə nəhəng aktorların deyil, ikinci dərəcəli oyunçuların da dəyişdiyi yeni dünya düzəni ilə üz-üzəyik. Dünənki düşmənlərin bu gün dostlaşması, bugünkü dostların isə düşmənə çevrilməsi artıq heç kəsi təəccübləndirmir. Vaxtilə Böyük Britaniyanın Baş naziri olmuş Uinston Çörçillin dediyi kimi, siyasətdə daimi dostlar olmur, daimi maraqlar olur.
İlyas HÜSEYNOV,
politoloq
İranla Səudiyyə Ərəbistanı arasında yaxınlaşmanın əldə olunması Pekinin diplomatiyası sayəsində mümkün olub. Kənar müşahidəçilər, ekspertlər hazırkı prosesi məhz Çin diplomatiyasının uğuru kimi qiymətləndirirlər. Çin daha çox iqtisadi, geoiqtisadi rıçaqlara malik olmaq yönündə strateji addımlar atır və “Bir kəmər, bir yol” layihəsində iştirak edən ölkələrlə investisiya əməkdaşlığını davam etdirir. Çinin Ticarət Nazirliyinin fevral ayında yaydığı məlumata görə, 2022-ci ildə xaricə birbaşa investisiya 0,9 faiz artaraq 146,5 milyard dollar təşkil edib. Pekin bununla həmin ölkələrdə həm də maraq dairəsini təmin etmiş olur.
Lakin rəsmi Pekin tərəfindən məhz barışdırıcı addımların atılması yeni və ciddi bir hadisədir. Bu, eyni zamanda, qütbləşməni ciddi şəkildə dərinləşdirir. Çünki Səudiyyə Ərəbistanı Yaxın Şərq bölgəsində Qərbin əsas dayağıdır. Hazırkı durumda bir geosiyasi üçbucaq formalaşıb. Yəni, İran, Rusiya və Çin arasında əməkdaşlıq müşahidə olunur. Bu gün Səudiyyə Ərəbistanının da müəyyən formada Qərbin orbitindən çıxaraq bu geosiyasi üçbucağın təsiri altına düşməsi çox ciddi məsələdir. Çünki Krallıq dünyanın neft ixracatında önəmli yerdədir.
Digər tərəfdən, Çin bununla özünü dünya siyasətində də mühüm geosiyasi aktor kimi sübut edir və böyük coğrafiyalarda maraqların təminatçısı qismində görür. Düşünürəm ki, indiki durumda Çinin məhz sülh və təhlükəsizlik yönündə atdığı addımlar Qərb tərəfindən də ciddi təhlil ediləcək. Qarşıdakı dönəmdə Qərbin əsas rəqibi kimi Çin faktoru meydana çıxacaq. Pekin də məhz bu təhdidləri nəzərə alaraq ətrafında koalisiya yaratmaq niyyətindədir. Si Cinpinin Vladimir Putinlə görüşündə də biz Çinin məhz dünya liderliyinə iddialı olduğunun müəyyən işartılarını müşahidə etdik.
Səxavət HƏMİD, “Xalq qəzeti”