“Gəzdi Avropanı, İranı, Hindistanı, - doğma bildi Rusiyanı”. Bu epik improvizənin bizim məşhur aforizmə birbaşa dəxli olmasa da, fikrimizcə, son vaxtlar “yerində addımla”yan Ermənistan siyasi isteblişmentinin kəskin “geriyə dön”məsini özündə dəqiq ehtiva edir. Hayastanın baş naziri Nikol Paşinyanın gec-tez üzünü Şimala çevirəcəyini proqnozlaşdıran siyasi ekspertlər yanılmadılar. İrəvanın son bir həftədə sərgilədiyi bir-birinə zidd siyasi mövqeyi onun kənardan yönəldilən marionet dövlət olduğunun növbəti dəfə isbatıdır. Ermənistan XİN-in martın 18-də Azərbaycan əleyhinə verdiyi bəyanata məhz kənardan, konkret olaraq, Kremldən edilən siyasi təzyiqlərin nəticəsi kimi baxmaq daha düzgün olardı.
Reallığı qəbul et, İrəvan!
Azərbaycan Xarici İşlər Nazirliyinin İrəvanın 18 mart 2023-cü il tarixli bəyanatına cavabı kifayət qədər arqumentli və tutarlı oldu: “Ermənistan Xarici İşlər Nazirliyinin bəyanatı daxil olmaqla bu ölkənin siyasi rəhbərliyinin son vaxtlar daha da kəskinləşən ritorikası, təcavüzkar mahiyyətli bəyanatları, xüsusilə Azərbaycanın ərazi bütövlüyü və suverenliyini birbaşa hədəf alan hərəkətləri Ermənistanın növbəti dəfə sülh üçün yaranmış tarixi fürsətdən istifadə etmək niyyətində olmadığını nümayiş etdirir”.
Ermənistanın Azərbaycanın beynəlxalq qurumlarla əməkdaşlığına müdaxilə cəhdlərinin dərhal dayandırmalı olduğunun vurğulandığı bəyanatda beynəlxalq təşkilatların respublikamızın ərazisində fəaliyyətinin məhz Azərbaycanın qanunvericiliyi çərçivəsində davam edəcəyi və ölkəmizin daxili işlərinə müdaxiləyə heç zaman imkan verilməyəcəyi bildirilib. Yəni, İrəvanın diqqətinə bir daha çatdırılır ki, o, reallığı qəbul etməli, utopik revanşist siyasətindən əl çəkməli, əks təqdirdə, bunun hansı aqibətlə sonuclanacağını beyninə yaxşı-yaxşı yeritməlidir. Hayastanın baş naziri Nikol Paşinyanın Twitterdə son paylaşımına diqqət yetirin: “Ermənistan və Azərbaycan arasında sülh müqaviləsi bağlanacaq və bu, ən yüksək səviyyədə verilən rəsmi bəyanatlara əsaslanacaq. Yeni eskalasiya olmayacaq”.
Ermənistan XİN-in Azərbaycan əleyhinə yaydığı məlum bəyanatla Paşinyanın bu açıqlaması arasındakı vaxt fərqi cəmi 5 gündür. Baş nazirin ardınca xarici işlər naziri Ararat Mirzoyan Misirin “Al Khair news” nəşrinə müsahibəsində nikbin notlu açıqlama verib: “Bakı və İrəvan arasında müzakirələrin fərqli komponentləri var. Birincisi, regionda bütün nəqliyyat kommunikasiyalarının açılması, ikincisi, sərhədin demarkasiyası və sərhədlərin təhlükəsizliyinin təmin edilməsi, üçüncüsü isə sülh sazişidir”. Kommunikasiya məsələsində mövqelərin üst-üstə düşdüyünü deyən Mirzoyan sülh müqaviləsi ilə bağlı danışıqların davam etdiyini vurğulayıb. Doğrudanmı, İrəvanın avantürist siyasi ritorikadan yumşaq diplomatiyaya keçməsi, ağlını başına toplaması üçün cəmi beş gün kifayət edib, yoxsa, bu, gözə külüfürmə, yaxud arxalandığı güclərdən aldığı növbəti qulaqburmasının nəticəsidir? İkinci versiya daha ağlabatandır. Amma artıq dabbaqda gönünə bələd olduğumuz hayların növbəti dəfə nala-mıxa vurması göz qabağındadır. Avropalı “tərəfdaşları”ndan, asiyalı “dost”larından əli tamamilə üzülən İrəvan indi mövqeyini 180 dərəcə dəyişərək Rusiyaya arxalandığını, sülh sazişindən boyun qaçırmadığını bəyan etməklə, yeni diplomatik riskin altına girir. Azərbaycana qarşı saxta ittihamlardan, sülhə aparan yolu əngəlləməyə hesablanmış bəhanələrdən əl çəkdiyi görüntüsünü yaradan N.Paşinyan beynəlxalq ictimaiyyətə barışa hazır olması mesajını ötürməyi də unutmur. Hansı bucaqdan baxsaq da, onun sonuncu açıqlaması düşdüyü çarəsizlik uçurumundan çıxmaq üçün vurnuxmanın əlamətidir. Nikolun son açıqlamasında nə qədər səmimi olmasının üzə çıxması üçün uzağı bir həftə yetər. Düşünürük ki, Hayastan liderinin bu dəfə fərqli “cinahdan” endirilə biləcək diplomatik zərbənin qarşısında ağ bayraq qaldırmasına göstərdiyimiz müddət kifayətdir. İrəvanı qarşıda gözləyən və qəbul etməyə məcbur olacağı yeni reallığın çağırışı isə belədir: sən sadəcə sülh prosesini deyil, III Qarabağ savaşını da uduzacaqsan!
Moskva yenə ikibaşlı oyuna girişib
Əli həm okeanın o üzündən, həm də bu üzündən - Avropadan, böyük ümidlər bəslədiyi Asiyadan üzülən Paşinyan hakimiyyətinin Şimala uzatdığı imdad əli, deyəsən, son ünvanda hələlik sıxılmayıb. Qarabağ münaqişəsinin yekun həlli mərhələsində, eləcə də bölgədə yenidən söz sahibi olmağı hədəfləyən Kremlin bu uzunömürlü problemi üçtərəfli formatda çözə biləcəyi daha inandırıcı görünmür. Çünki onun bölgədə sülh yaratmaq üçün müvəqqəti yerləşdirdiyi kontingentin “üzərinə düşən vəzifə borcunu yerinə yetirməməsi bölgədə gərginliyin artmasına zəmin yaradır”. Bununla bağlı Azərbaycan Müdafiə Nazirliyinin yaydığı bəyanatda aydın şəkildə o da qeyd olunur ki, “sülhməramlı kontingentin müvəqqəti yerləşdiyi Azərbaycan ərazilərində fəaliyyət göstərən qeyri-qanuni erməni silahlı birləşmələri qanunsuz fəaliyyətlərini davam etdirir”.
Sülhməramlı komandanlığın və Xocavəndi yenə “Martuni” kimi yazan Rusiya Müdafiə Nazirliyinin aşkar görünən “sülhyaratmaz” davranışı ən azı Kremlin 10 noyabr Bəyanatına atdığı öz imzasına hörmətsizliyidir. Bu cür ikibaşlı oyunçunun, məkrli vasitəçinin Bakı və İrəvan arasında ədalətli sülh müqaviləsinin hazırlanmasına verəcəyi dəstəyin tərəfsiz və obyektiv olacağına kim inanar?
Əgər hər şeyi öz adı ilə çağırmalı olsaq, açıq şəkildə deyilməlidir ki, bu gün Cənubi Qafqaza sülhün və əmin-amanlığın gəlməsini istəməyən, bütün vasitələrdən istifadə etməklə bölgədə silahlı qarşıdurmanın yaranmasına çalışan, bu məqsədlə çeşidli təxribatlar törətməyə cəhdlər edən məhz rus-erməni ortaqlığıdır.
Düzdür, Azərbaycanın əlində istər Rusiyaya, istərsə də Ermənistana qarşı istifadəyə tam yararlı əks-təsir vasitələri var və belə əşyayi-dəlillər kifayət qədərdir. Ən əsas sənəd-sübut isə 10 noyabr üçtərəfli Bəyanatı və onun Ermənistan ordusunun tör-töküntülərinin Azərbaycanın Qarabağ iqtisadi rayonundan çıxarılmasını nəzərdə tutan 4-cü bəndidir. Hər şeydən göründüyü kimi, bu bənddə göstərilən şərti Azərbaycan Ordusu icra etməli olacaq. “Dəmir yumruq”lu ordumuzun bu vəzifənin öhdəsindən uğurla gələcəyinə isə heç kəs şübhə eləmir. Sülh sazişinə münasibətdə Rusiyanın mövqeyinin hansı siyasi maraq və məntiqdən qaynaqlandığı aydındır. Bakının siyasi məntiqi isə onu deyir ki, əgər Kreml Cənubi Qafqazda sülhün bərqərar olmasında maraqlıdırsa, onda bu prosesdən kənara çəkilməlidir. Bu mənada Azərbaycan üçün ABŞ-ın sülh prosesinə yönəlik mövqeyi daha sağlam və effektlidir. Bakı Birləşmiş Ştatların və Qərbin bitərəf vasitəçilik missiyasını dəstəklədiyini gizlətmir. Azərbaycan Prezidenti İlham Əliyev bir müddət öncə açıqlamasında demişdi ki, sülh sazişinin mətninin hazırlanması prosesində müəyyən pozitiv irəliləyişlər mövcuddur.
Xəbərdarlıq limiti tükəndi
Son bir həftə ərzində istər Azərbaycan XİN-in, istərsə də Müdafiə Nazirliyinin İrəvana və Moskvaya yönəlik bəyanat və xəbərdaqlıqlarına adekvat reaksiyanın şahidi olmadıq. Əgər xəbərdarlıq kara gəlmirsə, onda son sözü demək səlahiyyəti ordumuzun öhdəsinə buraxılmalıdır. Anlaqsızı başa salmaq məqamı yetişib və bu addımı atmaq üçün Bakının əlində kifayət qədər əsas və sübut toplanıb. Martın 24-də növbəti dəfə Xankəndi-Xəlfəli-Turşsu torpaq yolu ilə Rusiya sülhməramlı kontingentinə məxsus 1 ədəd "ZTR-82A" döyüş maşını, ermənilərə məxsus 3 ədəd tentli "KamAZ" və üzərində yanacaq çəni olan 1 ədəd "KamAZ" avtomobilinin hərəkəti texniki müşahidə vasitələrimiz tərəfindən qeydə alındı. Martın 25-də isə Azərbaycan MN Laçın yolunun şimalındakı torpaq yolla Ermənistandan Rusiya sülhməramlı kontingentinin müvəqqəti yerləşdiyi Azərbaycan ərazisindəki qeyri-qanuni erməni silahlı dəstələri üçün canlı qüvvə, silah-sursat, mina, eləcə də digər hərbi təyinatlı vasitələrin daşınmasının intensivləşdiyi barədə informasiya yaydı. Vəziyyətin gərginləşməsinin və potensial təxribatların törədilməsinin qarşısının alınması məqsədilə Azərbaycan Ordusunun bölmələri lokal zəruri nəzarət tədbirləri həyata keçirdi. Həm Xankəndi-Xəlfəli-Turşsu marşrutu üzərində, həm də separatçıların ondan şimalda çəkdikləri qanunsuz iki torpaq yolda ordumuzun nəzarət postları yaradıldı.
Həmin gün Azərbaycan Respublikasının Prezidenti İlham Əliyev Avropa İttifaqı Şurasının prezidenti Şarl Mişellə telefon danışığında Rusiya sülhməramlı qüvvələrinin müvəqqəti yerləşdirildiyi Azərbaycan ərazilərinə Ermənistan tərəfindən silah-sursat və şəxsi heyətin daşınması prosesinin hələ də həyata keçirildiyini bildirib. Cənab Prezident İrəvanın təhlükəli və eskalasiyaya yönəlmiş rəsmi açıqlamalarına da diqqət çəkib.
Artıq ox yaydan çıxıb. Yuxarıda yazdığımız kimi, hay həyasızlığının cavabını növbəti “Qisas” əməliyyatı və “dəmir yumruq”la verməkdən başqa yol qalmayıb.
Əgər Bakıya gəlməsələr...
Rəsmi Bakı Xankəndi və ətraf bölgələrdə yaşayan erməni sakinlərlə danışıqların məkanını dəyişməkdə qərarlıdır. Növbəti görüşün birbaşa, vasitəçisiz, ələlxüsus da Rusiya sülhməramlı qüvvələrinin qərargahında deyil, Bakıda təşkil etmək niyyətində olduğunu açıqlaması məhz siyasi qətiyyətin nümayişidir. Aydın məsələdir ki, nə Kreml, nə də rəsmi İrəvan indiki mərhələdə hadisələrin bu məcrada inkişafından məmnundur.
Bu “ayrılmaz ikiliy”in son vaxtlar Bakının birmənalı və qətiyyətli çağırışlarına şərikli müqavimət göstərmək səyləri kənar müşahidəçinin gözündən yayınmır. Elə Nikol Paşinyanın Vladimir Putinə ekstern telefon zəngi təsadüfi sayıla bilməz. V.Putin “Qarabağda yaranmış problemlərin rus sülhməramlıları ilə təmas qurmaqla, konstruktiv şəkildə həll edilməsinin vacibliyini” vurğulayıb.
10 noyabr 2020-ci il tarixli Bəyanatdan keçən iki il beş ayda dəfələrlə dövriyyəyə buraxılan bu köhnə və faydasız siyasi tezisi eşitməkdən yorulduq. Rəsmi Bakı Qarabağ iqtisadi rayonundakı erməni icmasına ikinci görüşü paytaxt Bakıda keçirməyi təklif edib. Əgər ermənilər reintiqrasiya da daxil olmaqla, mövcud problemlərin həllində maraqlıdırlarsa, görüşə razılıq verməlidirlər. Yox, əgər onlar Bakı görüşündən imtina edərlərsə, onda Rusiya sülhməramlılarının himayəsi altında dialoqu manipulyasiya etdikləri öz təsdiqini tapacaq. Bundan sonra Azərbaycan beynəlxalq hüququn ölkələrin suverenliyi və ərazi bütövlüyü prinsipi çərçivəsində real əməli addım ataraq bölgəyə tam nəzarətini və hakimiyyətini həm də erməni əhalisinin hüquqlarının qorunması adı altında legitimləşdirəcək. Azərbaycan XİN-in İrəvanın 18 mart bəyanatına cavabında bu mövqe də aydın şəkildə ortaya qoyulub:
“Ermənistan tərəfi anlamalıdır ki, Azərbaycan Respublikasının vətəndaşlığı hüquqla yanaşı, bir öhdəlikdir. Bunları qəbul edən erməni sakinlərin Azərbaycanda yaşaması üçün lazımi şərait yaradılacaq”.
Uzaq və ən yaxın tariximiz bu aksiomu dəfələrlə qarşımıza çıxarıb: İstər qonşuluq münasibətlərində, istərsə də diplomatiyada haylardan nə desəniz gözləmək olar. Əgər İrəvan 180 dərəcəlik “geriyə dön”mədən sonra bir daha 360 dərəcə “yerində fırlanaraq” başlanğıc vəziyyətə qayıdarsa, onun aqibətinin “xəstə hinduşka sindromu” olacağını indidən təxmin etmək mümkündür. Bu sindromun mahiyyəti ondan ibarətdir ki, sağalmaz xəstəliyə düçar olmuş hind toyuğunun, digərlərini yoluxdurmaması üçün başını üzüb atırlar...
Rasim MUSABƏYOV,
Milli Məclisin deputatı, politoloq
Bakı həm Qarabağ ermənilərinin separatçı xuntasına, həm də Rusiya sülhməramlılarının komandanlığına dəfələrlə xəbərdarlıq etmişdi: Azərbaycan öz ərazisinə Ermənistandan qanunsuz hərbi yüklərin daşınmasına yol verməyəcək! Amma onlar sözümüzü eşitmədilər və qanunsuz fəaliyyətlərini davam etdirdilər. Hətta onlara Qarabağa silah-sursat daşıyan hərbi kolonların video-görüntülərini belə təqdim etməyimizə baxmayaraq, yenə də adekvat reaksiya görmədik. Bu səbəbdən Azərbaycan həmin yollara və cığırlara nəzarəti özü təşkil etməyə məcbur oldu. İndi lap dəridən-qabıqdan çıxsalar da, harada istəyirlər hay-küy qaldırsalar da xeyri yoxdur. Azərbaycan Ordusu öz torpağımızda tutduğu mövqelərdən bir addım belə geri çəkilməyəcək.
Biz hələ buna qədər Fərrux kəndində oxşar əməliyyat keçirmişdik və haylar bu faktı qəbul etməyə məcbur oldular. Daha sonra, ötən ilin yayında Sarıbaba və digər yülsəklikləri nəzarətə götürdük və orada möhkəmləndik. İndi də Azərbaycan tutduğu mövqelərdən geri çəkilməyəcək. İrəvan bu barədə bəyanatlar verməyə, haralarasa yazmağa başlayıb. Bu, artıq onların və onları himayə edən xarici qüvvələrin öz işləridir.
Bəli, Azərbaycan reallığı özü dəyişir və bu reallıqla hamı hesablaşmalı olacaq.
İmran BƏDİRXANLI, “Xalq qəzeti”