Laçın–Xankəndi yolunda ekofəallar şərəfli missiyalarını davam etdirirlər. Heç şübhəsiz ki, erməni mətbuatında yolun bağlı olması ilə bağlı yer alan saxta bilgilər Azərbaycanın əleyhinə hesablanmış növbəti avantüradır. Onların bu çirkin kampaniyalarına baxmayaraq, Xankəndi-Laçın yolunda sərbəst hərəkət edən hər bir nəqliyyat vasitəsinin maneəsiz keçidi yolun humanitar məqsədlər üçün açıq olmasına sübutdur.
Novruz bayramı günlərində Xankəndi-Laçın yolunda etiraz aksiyasının keçirildiyi yerdə bayram tonqalı çatılıb. Bayram simvolu sayılan səməninin təsviri quraşdırılıb. Eyni zamanda, aksiya iştirakçıları üçün Novruz süfrəsinin təamlarından olan şəkərbura, paxlava, qoğal və digər şirniyyatlar hazırlanıb. Orada quraşdırılan bayram çadırında Azərbaycanın milli mətbəxinin xörəkləri bişirilib.Bununla yanaşı, ərazidə musiqi səhnəsi quraşdırılıb, tanınmış müğənnilərdən Hiss, Nuri Sərinləndirici, Jane və Röya Ayxanın ifasında mahnılar dinlənilib.
***
Ötən günlərdə Amerika Birləşmiş Ştatlarının Dövlət katibi Antoni Blinken Azərbaycan Prezidenti İlham Əliyevə zəng edib. Telefon danışığı zamanı Azərbaycanın Laçın-Xankəndi yolu ətrafındakı vəziyyəti də müzakirə olunub. Dövlətimizin başçısı qeyd edib ki, yolun, guya, blokadada olması barədə məlumat Ermənistanın yalançı təbliğatıdır. Azərbaycan Prezidenti onu da vurğulayıb ki, Ermənistanın Laçın yoluna köməkçi yoldan istifadə edərək Rusiya sülhməramlılarının müvəqqəti yerləşdirildiyi ərazilərimizdə qanunsuz hərbi daşımalar, şəxsi heyətin rotasiyasını həyata keçirməsi, habelə Ermənistan silahlı qüvvələrinin 10 minə yaxın hərbçisinin hələ də Azərbaycan ərazisində olması ciddi narahatlıq doğurur. Bu xüsusda dövlətimizin başçısı Azərbaycanın Laçın yolunun Ermənistanla sərhədinin son nöqtəsində nəzarət-keçid məntəqəsinin yaradılmasının labüdlüyünü xüsusilə vurğulayıb.
Qeyri-qanuni erməni silahlı dəstələri tərəfindən bəzi dağlıq və torpaq ərazilərdən keçməklə bir neçə marşrut üzrə yeni yolların çəkilməsi, həmçinin köhnə cığırların genişləndirilməsi üzrə işlər həyata keçirirdilər. Bu məqsədlə, hərbi, mühəndis və xüsusi texnikadan, habelə işçi qüvvəsi kimi müqavilə əsasında hərbi xidmətə cəlb olunmuş şəxslərdən və yerli sakinlərdən istifadə edilirdi.
Yaranmış vəziyyət nəzərə alınaraq, Laçın yolunun şimalındakı torpaq yollarından qeyri-qanuni fəaliyyətlər üçün istifadənin, eləcə də Ermənistan tərəfindən silah-sursat daşımaqla vəziyyətin gərginləşməsinin və potensial təxribatların törədilməsinin qarşısının alınması məqsədilə Azərbaycan Ordusunun bölmələri tərəfindən lokal zəruri nəzarət tədbirləri həyata keçirilib.
Ermənistanın Azərbaycan ərazisindəki qeyri-qanuni erməni silahlı dəstələrinin üzvlərinin son günlər törətdikləri təxribatlar onu deməyə əsas verir ki, rəsmi İrəvan sülh müqaviləsinin imzalanmasından boyun qaçırır. Ermənistanın eskalasiyaya can atması, habelə Azərbaycanın Qarabağ bölgəsinə qeyri-qanuni erməni silahlı dəstələri üçün canlı qüvvə, silah-sursat, mina, eləcə də digər hərbi təyinatlı vasitələrin daşınmasının intensivləşməsi onu göstərir ki, bu terror dövləti xislətindən əl çəkənə oxşamır. Ekofəallar Laçın yolunda nəzarət-keçid məntəqəsinin yaradılmasını qanuni haqları hesab edirlər. Həmçinin Xankəndi-Xəlfəli-Turşsu torpaq yolu ilə qanunsuz hərbi daşımalar və Rusiya sülhməramlı kontingentinin onları müşayiət etməsi, mütəmadi baş verən bu kimi qeyri-qanuni fəaliyyətlər Laçın yolunun Azərbaycan-Ermənistan sərhədinin son nöqtəsində Azərbaycan tərəfindən sərhəd-keçid və nəzarət məntəqəsinin qurulmasını zərurətə çevirib.
Ermənistan mətbuatında Azərbaycanı üçtərəfli razılaşmanın bəndlərini pozmaqda ittiham edən bu ölkənin “başbilənləri” hər dəfə siyasi rəhbərliyinin necə simasız və ikiüzlü olduğunu göstərir. Rəsmi İrəvan təkcə Azərbaycanla Ermənistan arasında müxtəlif platformalarda əldə edilən razılaşmalara qarşı çıxmır, sərhəddə atəşkəsi tez-tez pozur, təxribatlar törədir. Ermənistanın narahatlığının başqa bir səbəbi odur ki, Laçın yolu vasitəsilə Xankəndiyə və ətraf rayonlara silah-sursat, hərbi texnika daşıya bilmirlər.
Rizvan FİKRƏTOĞLU, “Xalq qəzeti”
