Ermənistan hakimiyyəti ölkədə 1999-cu il oktyabrın 27-də baş vermiş parlament terrorunda təqsirli bilinərək azadlıqdan məhrum edilmiş Karen Hunanyanı əfv etməyə hazırlaşır. Bunu “Ayeli” (“Güzgü”) mətbuat klubunun rəhbəri Anjela Tovmasyan deyib.
A.Tovmosyan bildirib ki, 1999-cu ildə parlamentin deputatı olmuş bir neçə şəxs Ermənistanın Ədliyyə Nazirliyinə məsələ ilə bağlı məktub ünvanlayıb. Məktubda hələlik söhbətin K.Hunanyandan getdiyi bildirilir. Amma ola bilsin ki, Karenin iş ortağı Nairi Hunanyan da sonra əfvə düşsün.
Xatırladaq ki, 1999-cu il oktyabrın 27-də Nairi Hunanyan və onunla əlbir olan bir neçə şəxs (qardaşı Karen Hunanyan, dayısı Vram Qalstyan, həmçinin Derenik Becanyan, Edik Qriqoryan və Aşot Knyazyan) Ermənistan parlamentinə daxil olaraq baş nazir Vazgen Sarkisyanı güllələyiblər. Onlar, həmçinin, Milli Assambleyanın spikeri Karen Dəmirçyanı, sədr müavinləri Yuri Baxşyanı və Ruben Miroyanı, əməliyyat məsələləri üzrə nazir Leonard Petrosyanı, deputatlar Armenak Armenakyanı, Henrix Abramyanı və Mikayel Kotanyanı qətlə yetiriblər.
Qeyd edək ki, qətlə yetirilənlərdən baş nazir Sarkisyan və spiker Dəmirçyanın islahata meyilli koalisiyası həmin ilin mayında keçirilən parlament seçkilərini səs çoxluğu ilə qazanmış və praktiki olaraq 1998-ci ildə prezident postuna yiyələnmiş Robert Koçaryanı siyasi səhnədən kənarlaşdırdılar. Onların fiziki cəhətdən məhvi isə ölkənin siyasi mənzərəsində ciddi dəyişikliklərə səbəb oldu.
Hadisənin şahidi olmuş jurnalistlərin dediyinə görə, silahlılar baş nazir Sarkisyana tərəf gedərək “yetərincə qanımızı içdin” deyə qışqıranda, Sarkisyan sakitcə cavab vermişdi: “Hər şey sizin və uşaqlarınızın gələcəyi üçün edilir” – deyə dillənmişdi. Bu, onun son sözləri olmuşdu.
İstintaq Köçəryanı Hunanyanın silahlı qrupu ilə əlaqələndirən heç bir əhəmiyyətli dəlil tapmasa da, bir çox erməni siyasətçi və təhlilçi hesab edir ki, V.Sarkisyanın və digər aparıcı siyasətçilərin qətlinin arxasında prezident Robert Köçəryan və Milli Təhlükəsizlik naziri Serj Sarkisyan (sonradan prezident oldu) durur.
Onu da bildirək ki, Ermənistanın ilk prezidenti Levon Ter-Petrosyan dəfələrlə R.Köçəryanı və S.Sarkisyanı, bu şəxslərin cinayətkar-oliqarxik sistemini parlament hücumunda ittiham edib. 2008-ci il prezident seçkiləri ərəfəsində o, açıq şəkildə bildirmişdi ki, “əgər fevralın 19-da Serj Sarkisyana səs versəniz, Nairi Hunanyana səs verəcəksiniz. Serj Sarkisyanı seçənlər Karen Dəmirçyan və Vazgen Sarkisyanın ruhlarını alçaldacaqdır”.
2009-cu ildə Ter-Petrosyanın rəhbərlik etdiyi Erməni Milli Konqresi parlament terrorunun 10-cu ildönümü ilə əlaqədar açıqlamasında Köçəryanı və Sarkisyanı bir daha sözügedən terrorda günahlandırdı. Qurumun açıqlamasında deyilirdi: “27 oktyabr terror yolu ilə iqtidarın zorla ələ keçirilməsi idi. Bununla da terrorizm rejimin iqtidara yapışmaq və özünü göstərmək üçün əsas vasitəsinə çevrildi”.
Bir məqamı da xatırladaq ki, 2005-ci il aprel ayının sonlarında Rusiyanın sabiq məxfi xidmət agenti Aleksandr Litvinenko Azərbaycan qəzeti olan “Realni Azerbaijan”a müsahibəsində Rusiya Silahlı Qüvvələri Baş Qərargahının Baş Kəşfiyyat İdarəsini Dağlıq Qarabağ münaqişəsini həll edəcək sülh prosesini təxirə salmaq üçün Ermənistan parlamentində terror aktını təşkil etməkdə suçladı. 2013-cü ilin mart ayında isə Vazgen Sarkisyanın kiçik qardaşı Aram Sarkisyan da R.Köçəryan və S.Sarkisyanı məlum qanlı olayda təqsirli bildi.
R.AMİN
.jpg)
