Səhiyyə naziri Teymur Musayev Birləşmiş Millətlər Təşkilatının (BMT) Azərbaycandakı rezident əlaqələndiricisi Vladanka Andreyeva ilə görüşüb.
Səhiyyə Nazirliyinin mətbuat xidmətindən XQ-yə verilən məlumata görə, Teymur Musayev görüşdə ölkəmizdə səhiyyə sisteminin inkişafının dövlət siyasətinin prioritet istiqamətlərindən biri olduğunu qeyd edib. Nazir bildirib ki, bu sahədə aparılan islahatlar Prezident İlham Əliyevin müəyyən etdiyi strateji inkişaf xəttinə uyğun olaraq ardıcıl şəkildə həyata keçirilir. O, beynəlxalq tərəfdaşlarla, xüsusilə BMT ilə əməkdaşlığın səhiyyə sahəsində davamlı inkişafın təmin olunmasında mühüm rol oynadığını vurğulayıb.
Azərbaycanın səhiyyə naziri əməkdaşlığın bundan sonra da səmərəli olacağına əminliyini ifadə edib.
Səmimi qarşılanmaya görə minnətdarlığını bildirən Vladanka Andreyeva BMT-nin Azərbaycanla tərəfdaşlıq və əməkdaşlığının, xüsusilə də 2026–2030-cu illəri əhatə edən Dayanıqlı İnkişaf üzrə Əməkdaşlığa dair Çərçivə Sənədinin həyata keçirilməsi vasitəsilə davam etdirilməsinə möhkəm sadiqliyini vurğulayıb. O, Azərbaycanın səhiyyə sahəsində əldə etdiyi nailiyyətləri yüksək qiymətləndirərək, BMT-nin gələcəkdə də Səhiyyə Nazirliyi ilə əməkdaşlığa hazır olduğunu bildirib.
Görüş zamanı səhiyyə sahəsində mövcud əməkdaşlıq əlaqələri, eləcə də gələcək perspektivləri ətrafında fikir mübadiləsi aparılıb. Azərbaycanla BMT strukturları arasında səhiyyə sahəsində həyata keçirilən birgə layihələrin əhəmiyyəti vurğulanıb.
