Səhiyyə Nazirliyinin akademik C.Abdullayev adına Elmi-Tədqiqat Kardiologiya İnstitutunun ürəyin işemik xəstəlikləri şöbəsinin müdiri, tibb üzrə fəlsəfə doktoru Mədinə Əzimova ilə son zamanlar daha çox müşahidə edilən qəfil ölümlərin səbəblərindən, eləcə də infarktdan danışdıq. Ürək xəstəliklərinin profilaktikası üçün sağlam həyat tərzinin, zərərli vərdişlərdən uzaq olmağın və balanslı qidalanmanın vacibliyini vurğulayan kardioloq XQ-nin infarktla bağlı suallarını cavablandırdı:
– Mədinə xanım, öncə qəfil ölümlərin səbəbi barədə məlumat verərdiniz...
– Havaların soyuması ilə əlaqədar ürək xəstəliklərinin insanları daha çox narahat etməsi müşahidə olunur. Ölümlə nəticələnən xəstəliklər içərisində infarkt öncül yerdə durur. Miokard infarktı – ürək əzələsinin işemik nekrozudur və qan dövranının kəskin pozulması nəticəsində əmələ gəlir. Bu zaman ürək əzələsinin bir nahiyəsinə gələn qan axınının kəsilməsi nəticəsində həmin hissədə hüceyrələr məhv olur.
Bir çox hallarda miokard infarktının baş verməsinin səbəbi koronar arteriyaların aterosklerozu olur. Lakin 5–25 faiz hallarda koronar arteriyaların emboliyası (infeksion endokardit, mədəcikdaxili tromb), digər xəstəliklər zamanı damarların zədələnməsi (revmatizm, revmatoid artrit nəticəsində əmələ gələn koronartritlər), tac damarların anadangəlmə defektləri və s. səbəbdən də miokard infarktı baş verə bilər. Ən çox rast gəlinən isə qeyri-obstruktiv koronar arteriya xəstəliyi nəticəsində baş verən miokard infarktıdır (MİNOCA).
– Bu xəstəliyin əlamətlərinin damarların tutulması ilə baş verən miokard infarktından fərqi nədir?
– MINOCA infarktı olan xəstələrdə gözlə görünən bütün koronar damarlar açıq olur və aterosklerotik lövhələr və ya tromblar müşahidə edilmir. Ancaq adından da göründüyü kimi, bu, miokard infarktıdır. Koronar damarların tıxanması ilə yaranmayan miokard infarktı ilə simptomlar eynidir. Angioqrafiya zamanı dəyişikliklər gözlə görünməyən çox kiçik damarlarda olur. Həmin kiçik arteriyalar kortəbii şəkildə partlaya, orada qan laxtaları yarana bilər. Bu zaman koronar arteriyalar kəskin daralır. MINOCA infarktının baş verməsində mühüm rol oynayan spastik stenokardiyalar (tutmalar), damarların obstruksiya zamanı baş verən stenokardiyalardan fərqli olaraq, qısa təsirli nitratların qəbulu ilə daha tez keçir.
– MINOCA infarktı hansı səbəblərdən baş verə bilər?
– Qeyri-obstruktiv koronar arteriya xəstəliyi nəticəsində baş verən miokard infarktı müxtəlif səbəblərdən ola bilər. Epikardial arteriyaların zədələnməsi (aterosklerotik düyünlərin dağılması, xoralaşma) də, koronar arteriyaların spazmı da infarkt yarada bilər. Bu, həm endogen – stres zamanı baş verən stenokardiya nəticəsində, həm də ekzogen – damardaraldıcı vasitələrin təsirindən meydana çıxa bilər. İnfarktın narkotik vasitələrin təsirindən, koronar damarların endotelinin disfunksiyası zamanı onun bir və ya bir neçə hissəsində baş verən spazmalardan miokardit və kardiomiopatiya zamanı baş verməsi mümkündür.
Koronar qan dövranının kəsilməsi və ya kəskin məhdudlaşması “ağırlaşmış“ aterosklerotik düyünün olduğu nahiyədə koronar arteriyanın trombozu nəticəsində baş verir. Düyünün incəlmiş kapsulu zədələnir, spazm daralmış damar mənfəzini bir az da daraldır. Tədricən trombun ölçüləri böyüyür. Əgər spontan lizis (ərimə) baş verməzsə və ya trombolitik terapiya aparılmazsa, tromb damarın mənfəzini tamamilə tutur və həmin damar şaxəsinin qidalandırdığı nahiyədə miokard hüceyrələrinin nekrozu (ölümü) baş verir.
– Bəs xəstəlik hansı klinik əlamətlərlə özünü büruzə verir?
– Demək olar ki, 80–90 faiz hallarda miokard infarktının anginoz variantına rast gəlinir. Ümumi şikayət döş sümüyü arxasında ağrıdır. Bu ağrı stenokardiya tutmasından fərqlidir – daha güclü, əzabverici olub, sıxıcı, təzyiqedici, yandırıcı, göynədici xarakterlidir, ölüm qorxusu ilə müşayiət olunur.
Əksər xəstələrdə ağrı sindromunun pik vəziyyətində kəskin damar çatışmazlığının əlamətləri – intensiv tərləmə, başhərlənmə, kəskin halsızlıq, taxikardiya, ətrafların soyuması, arterial təzyiqin enməsi və s. baş verə bilər. Təngnəfəslik və aritmiya, kəskin dövrdə bədən temperaturunun yüksəlməsi də müşahidə oluna bilər.
Miokard infarktının klinik olaraq anginoz, astmatik, abdominal, aritmik, serebrovaskulyar və simptomsuz variantları mövcuddur.
– Qeyri-obstruktiv koronar arteriya xəstəliyi nəticəsində baş verən miokard infarktının diaqnostikası və müalicəsi necə aparılır?
– Diaqnoz xəstənin şikayətlərinə və instrumental-laborator müayinələrin nəticəsinə əsasən qoyulur. Elektrokardioqramma (EKQ) və exokardioqramma (ExoKQ) müayinələrinin aparılması mütləqdir. Xəstənin döş qəfəsinin rentgenoqrafiyası, koronar angioqrafiya, ürəyin MRT müayinəsi də aparılmalıdır.
Miokard infarktlı xəstələrdə, eləcə də MİNOCA infarktlı xəstələrdə diaqnozun təyini üçün qanın laborator müayinəsi – miokardın nekroz markerlərinin təyini də mütləqdir.
Müalicə ən qısa zamanda damar mənfəzinin açılmasına, sonrakı tromb əmələ gəlməsinin qarşısının alınmasına, nekroz ocağının və infarktətrafı zonanın məhdudlaşdırılmasına, infarktın ağırlaşmalarının aradan qaldırılmasına əsaslanır. Ağrının başlanmasından ən çox 6–12 saat ərzində xəstə stasionara çatdırılmalı və koronar angioqrafiya olunaraq miokardın reperfuziyası (qan təchizatının bərpa olunması) həyata keçirilməlidir.
– MİNOCA infarktının proqnozu və profilaktikası ilə bağlı nə deyərdiniz?
– Xəstəliyin proqnozu pasiyentin stasionara nə qədər tez çatdırılmasından asılıdır. Erkən başlamış stasionar müalicə xəstənin həyatda qalma şansını artırır, ağırlaşmaların qarşısını alır, infarktdan sonrakı dövrdə fiziki və psixoemosional reabilitasiyanı yaxşılaşdırır.
Xəstəliyin profilaktikası üçün sağlam həyat tərzi sürmək, alkoqol, nikotin qəbulu kimi zərərli vərdişlərdən uzaq durmaq, sağlam və balanslaşlı qidalanmağa üstünlük vermək tövsiyə olunur. Xüsusilə risk qrupunda olan insanlar mütəmadi olaraq kardioloji müayinələrdən keçməlidirlər. Ölümə bir addım yaxınlaşmamaq üçün həkim tövsiyələrinə əməl etmək vacibdir.
Zərifə BƏŞİRQIZI
XQ