Ustad Şirməmməd Hüseynovun 99 yaşına
Şirməmməd Hüseynov. Bu ad Azərbaycanın ictimai fikri, elmi mühiti, jurnalistikası, nəhayət, milli ziyalılıq üçün, sözün əsl mənasında, etalondur. Bu ad zirvədir. Elə bir zirvə ki, onu fəth etməyə, sadəcə, cəhd göstərməyin özü belə Azərbaycana xidmətdir.
Şirməmməd Hüseynov məfkurə zirvəsindəki Azərbaycan nəhəngdir. Onun nəzərlərindəki Azərbaycan özünün milli mənlik şüuru, identikliyi ilə bütöv bir orqanizmdir. Bu orqanizmi dəyərli alimimizin həyat və fəaliyyətinin zənginlik ruhu qidalandırmışdı.
Şirməmməd Hüseynovun həyat fəlsəfəsi Azərbaycanı, belə demək mümkünsə, vətənləşdirmək amalıdır. Alim bu amal uğrunda gecəsini gündüzünə qataraq, böyük əzm və fədakarlıqla çalışmışdı. Onun keçdiyi yola diqqət yetirəndə, istər-istəməz, yada klassiklərimiz düşür.
Milli mətbuatımızın qurucusu Həsən bəy Zərdabidən sonrakı qəzet bumu o dövrün Azərbaycan cəmiyyətinə təfəkkür sahiblərimizi, fikir dühalarımızı qazandırmışdı. Elə bir dühaları ki, cəmiyyətin yükünü çiyinlərində daşımaqdan mənəvi zövq alırdılar. Şirməmməd müəllim də işindən zövq alırdı. Onun aldığı zövqdə istiqlalçı klassiklərin irsinin daşıyıcısı olmaq milli ləyaqət düsturuna çevrilmişdi. Onun milli kimlik düşüncəsi və hissi milli haqq və ədalət mübarizəmizə işıq salmışdı. O, özünün zənginlik dünyası ilə bu mübarizəyə ideoloji parlaqlıq gətirmişdi.
Tam qətiyyətlə demək mümkündür ki, Şirməmməd Hüseynov obrazı bir körpüdür. Keçmişlə müasirliyi birləşdirən körpü. O, keçmişin zənginlik ruhunu gələcəyə doğru istiqamətləndirmək məqsədinə köklənmişdi. Mövcud anlamda Şirməmməd Hüseynov şəxsiyyəti həm də ənənə daşıyıcısıdır.
Şirməmməd Hüseynov adı artıq bir ənənədir. Alimliyə fövqəladəlik gətirən dəyərdir. Onun fövqəladəliyində jurnalistika mütəhərrikdir, ictimai münasibətlər sisteminin katalizatorudur. Şirməmməd müəllimin jurnalistikası elmi-publisistik məzmunu düşüncə dərinliyi, mövzu rəngarəngliyi ilə cəmiyyətə kolorit verən müstəsna missiyalı nəhəng məfkurə strukturudur.
Bütün sahələrdə xidməti olan insanlarımız, ictimai simalarımız var. Hər birinin əməyi danılmazdır. Amma düşünürəm ki, Şirməmməd Hüseynovlu jurnalistika bu peşənin digər sahələrdən üstünlüyünün vurğulanmasıdır. Bu vurğulanmada genimizə hopmuş yüksək mənəvi çalarların əsaslandırılmış bəyan məntiqi var. Axı, Şirməmməd müəllim, hər şeydən əvvəl, bir mənəvi dünyadır. Zənginliyində Azərbaycan amalının dayandığı dünya.
Nəhayət, Şirməmməd Hüseynov Ustaddır. O, “ustad” sözünün haqqını tam şəkildə ödəməyi bacarmış mükəmməl obrazdır. Bu bacarıqda uzun ömrünün Azərbaycan adlı ürək döyüntülərinin inikası duyulmaqdadır. Ona görə də anadan olmasının 99-cu ildönümündə Ustadı yada salmaq böyük fəxrdir, mənəvi borcdur.
Ad gününüz mübarək, ey Ali ruh! Bilirəm, Siz yaşayırsınız. Bilin ki, qəlbinizdə yaşatdığınız Azərbaycan sevdası daim pöhrələnməklə qol-budaq atıb yaşamaqdadır və əbədi yaşayacaqdır. Tam əmin olun, Siz də qəlbimizdə əbədi yaşayacaqsınız!
Bir il də yaşayaq. Sizin yüzilliyinizi qeyd edək. Bu, bütün Azərbaycan mətbuatının bayramı olacaq.
Allah Şirməmməd müəllimə rəhmət eləsin!
Əflatun AMAŞOV,
Baş redaktor